Appat zone 3, 4 aamma 5-imi novembarip 1-iani piniagaalerput, ullormut pisassat tuniniaanermullu maleruagassat pillugit eqqaasitsissut

Appat piniarneqarsinnaanerinut piffissaliussat, ullormut pisassat aamma tuniniaanermut malerua¬gassat atuuttut Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmiit matumuuna eqqaasitsis¬sutigi¬ne¬qas¬sapput, takuuk Timmissanik illersuineq piniarnerlu pillugit Namminersorlutik Oqartussat nalunaarutaat nr. 22, maajip 30-at 2023-meersoq. Ilanngullugu eqqaasissutigineqassaaq taateraat zone 1 aamma zone 2-mi piniagaanerat oktobarip 31-ani unimmat.

Inuussutissarsiutigalugu piniarnermut allagartallit:
Inuussutissarsiutigalugu piniarnermut allagartallit Piniarfik / Zone-ni tamani piffissami piniarfiusuni taaneqartuni ullormut piniarfiusumut appanik aamma appanik sigguttuunik ataatsimut katillugit amerlanerpaamik 20-nik pisaqaqqusaapput.

Sunngiffimmi piniarnermut allagartallit:
Sunngiffimmi piniarnermut allagartallit piniarfiit zone-ni tamani piniarfiusumi ullormut aallaaniarfiusumut appanik aamma appanik sigguttuunik ataatsimut katillugit amerlanerpaamik 3-nik pisaqaqqusaapput taamaallaallu nammineq atugassanik.

Upernaakkut piniarneq:
Zone 1-imi piffissami martsip aallaqqaataaniit juunip 15-iat ilanngullugu ullormut aallaaniarfiusumut appanik aamma appanik sigguttuunik ataatsimut katillugit amerlanerpaamik 5-inik pisaqaqqusaapput taamaallaallu nammineq atugassanik.
Zone 1-imi piffissami martsip aallaqqaataaniit juunip 15-iat ilanngullugu ullormut aallaaniarfiusumut appanik aamma appanik sigguttuunik ataatsimut katillugit amerlanerpaamik 3-inik pisaqaqqusaapput taamaallaallu nammineq atugassanik.

Taateraarniarnermi ullormut pisassat:

Piniarnermut allagartallit zone-ni tamani piffissami piniarfiusumi ullormut piniarfiusumut taateraat ataatsimut katillugit amerlanerpaamik 10-nik pisaqaqqusaapput.

Ullormut pisassat:
Ullormut pisassat ulluniit aallaaniarfiunngitsuniit imaluunniit ulluniit pisassat tamakkerneqarfiunngitsuniit sipaarneqaqqusaanngillat. Soorluttaaq ullunut tulliuttunut ullormut pisassat siumoortumik pisarineqaqqusaanngitsut. Ullormut pisassat namminermut tunngapput aamma allanut pisariteqqusaanngillat.

Timmissanik tuniniaaneq:

Inuussutissarsiutigalugu piniarnermut allagartallit taamaallaat timmissanik tuniniaaqqusaapput taamaallaallu nammineq aqutsiveqarfimminni tuniniaaqqusaallutik zone-t siuliani taaneqartut takukkit. Taassuma saniatigut timmissanik piffissami piniarfiusumi aqutsiveqarfiit iluanni taamaallaat tuniniaasoqaqqusaavoq taamaallaallu tuniniaavinni uumasut nakorsaqarfiannit akuerineqartuni, kalaalimineerniarfiit ilanngullugit.

Aqutsiveqarfiit nalunaarsorneri ilanngussami takuneqarsinnaapput.

Erseqqinnerusunik paasissutissat pillugit attavigiuk Amalie Jessen Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik, tlf.: 34 53 04, e-mail: Amalie@nanoq.gl