Inalukkakkut kræftimut pitsaanerusumik akiuinissaq: Siunertaqartumik malitseqartitsisumillu misiliummik pilersaaruteqarnikkut misissuisarneq paasisaqapallassinnaanissamut iluaqutaassaaq

Nunatsinni inuit 250-nit ikinnerunngitsut ukiumut napparsimassutigilertagaat, kræfti, toqqutaanerpaasartuni tullertut inissisimavoq. Taamaammat nappaammut tassunga aniguisinnaasoqassappat suussusersisoqapallassinnaanissaq pitsaanerusumillu katsorsaasoqarsinnaanissaq pingaaruteqarpoq.

Kræftimut akiuinissamut naalakkersuinikkut suliniuteqarnissamut Peqqissutsimut tunngatillallugu isumaqatigiissut 2023-meersoq taamatullu Naalakkersuisut akornanni suleqatigiinnissamut isumaqatigiissut naapertorlugu, Nuummi Dronning Ingridip peqqissaaviani, misiliummik suliniuteqartoqarnissaanik aallartitsisoqarpoq. Suliniut ukiup affaanik sivisussuseqassaaq, tassanilu inalugarsuakkut erlukkullu kræftimik nappaateqartoqarnissaanik pasinartoqartillugu innuttaasunik misissuipallattoqarsinnaanermik siunertaqarpoq. Misiliummik suliniutigineqartoq naammassisimaleriarpat ingerlanneqaannassanersoq nunallu sinneranut atuutilersinneqarsinnaanersoq nalilersorneqassaaq.

Suliniutaasumi misissueriaaseq, FIT-test, atorneqassaaq (Fækal Immunkemisk Test), tassani inalukkakkut aanaartoqarnersoq misissorneqartassaaq – taamaattoqartillugu inalukkakkut kræfteqarnermik ersiutaasarmat. Inalugarsuakkut erlukkullu kræfteqarnissamik nalunaatilimmik ersiuteqartut misissorneqarnissaat neqeroorutaassaaq. Misissorneqartoq aataqarpat, allanik ersiuteqartoqarneranik qulakkeerinninniarluni, tamatumani napparsimasoq erlukkut qinnguartarneqarluni misissorneqarnissaanut innersuuneqassaaq.

Napparsimasunut, ingammik inalukkakkut kræfteqartoqarnissaanik ilimanaateqartunut, misissueriaaseq FIT atorlugu misissuisoqartalernera iluaqutaassaaq. Tamanna pisariaqanngitsumik, iluaasinnaasumik kingunerluuteqarsinnaasumillu misissueriaaseqartoqannginnissamik kinguneqassaaq, taamatullu pisariaqartitsisut eqqarsaatigalugit eqqortumik misissuipallassinnaanissaq qulakkeerneqassaaq.

Misissueriaaseq atorneqartoq ilaatigut Tuluit Nunaanni iluaquteqareerpoq, misissueriaasermi, FIT-test, napparsimasunut inalukkakkut kræfteqarsinnaanermik ersernerluttumik ersiuteqartunut misissorneqartarneranut atorneqarpoq. Taamatut misissueriaaseqarneq inalukkakkut kræfteqarnermut paasisaqapallannermik taamaasillunilu pitsaasumik katsorsaasoqarsinnaanermut iluaquteqartoq malugineqarpoq.

”Misiliilluni suliniutaasup inerneri qilanaaraakka, misilittakkallu tunngavigalugit nunap sinneranut atuutilersinneqarsinnaassasoq neriuuteqarpunga.
Inuit taamatut kræfteqarlutik nappaateqartut misissorneqartarsimanerat eqqarsaatigalugu, nuna tamakkerlugu inalukkakkut kræfteqartarnermut akiuiniarluni pisariinnerusumik, tamanut atuuttumik pitsaanerusumillu misissuisoqartarnissaa siunertaavoq”, Peqqissutsimut inunnullu Innarluutilinnut naalakkersuisoq, Anna Wangenheim, oqarpoq.

Paasissutissat allat pissarsiarineqassappata naalakkersuisup allattaa, Nivé Lynge Biilmann, attavigineqassaaq e-mail: nilb@nanoq.gl imaluunniit

Peqqissutsimut inunnullu Innarluutilinnut Naalakkersuisoqarfik. E-mail: pn@nanoq.gl, oqarasuaat +299 34 50 00.

FIT-Testip assitaa.