Rekortiliineq: Qaqortumi ilinniartunut inissialiat nutaat ussissutsinut pitsaassutsinullu nutaamik malitassaqalersitsipput

Nunatsinni illuliat ussinnerpaartarilerpaat!

Qaqortumi ilinniartunut inissialiat nutaat maannamut ussissutsimut rekortiliipput. Qanittumi Blower Door Test-imi ingerlanneqartumi taamaallaat 0,1 l/s/m² (kvadratmeterimut sekuntimut literit) ussissuserigaa uuttorneqarpoq - danskit illuliornermut maleruagassaanni piumasaqaatinit 10-riaammik pitsaanerulluni.

Paasisami pitsaassutsip, nukissianut sunniuteqarluarnerup aammalu Namminersorlutik Oqartussat illuliaanni illup iluata silaannaani malunnaatilimmik siuariarneq malunnartinneqarpoq.

Ineqarnermut, Attaveqaasersuutinut Isorliunerusunullu Naalakkersuisoq, Aqqaluaq B. Egede oqarpoq:
“Paasisaq nuannerluinnartuuvoq, tassani takutinneqarluni illuliani nutaani pitsaassutsimik ussissuutitsinissamillu ukkatarinninnitsinni eqqortup tungaanut ingerlasugut. Illut ussippata, tamanna nukissiamik atuinerup annikinneruneranik, illullu iluata silaannarinneruneranik aammalu sivisunerusumik atorneqarsinnaanerannik kinguneqartarpoq – najugaqartunut inuiaqatigiinnullu iluaqutaasumik.”

Rekorti nutaaq – aamma pitsaassusissaq nutaaq

2014-imi 0,17 l/s/m2 ussissuserigaa uuttorneqarmat rekortiliisoqarpoq. Maannakkut qaffasissusaa affaannangajanngorsimavoq.

Inernerat nutaaq taanna tnt Nuuk A/S-ip siunnersortitut aammalu Permagreen Grønland A/S entreprenøritut qanimut suleqatigiinneranni anguneqarpoq.

Suleqatigisat marluusut tamarmik tikkuarpaat rekortiliilluni kisitsisip appasissumiinnera, illuliat pitsaassusaannik qaffassaalluni siunnerfilimmik ukiorpassuarni sulinerup kingunerigaa.

“Inernera 0,1 l/s/m² immikkut illuinnartuuvoq. Taassuma takutippaa nunatsinni illuliat nunani tamalaani malitassat pitsaanerpaat tulluarsarfigisinnaagaat – pisullu ilaanni aamma qaangersinnaagaat,” oqarpoq Jesper J. Petersen, Permagreen Grønland A/S-imi Tunisassiornermut pisortaq.

Ilinniartunut – siunissamullu - pitsaassuseq

Qaqortumi ilinniartunut inissialiat nutaat taakkua ilinniartut inaannut assigiissaakkanut, Ilulissani, Aasianni, Sisimiuni, Nuummi Qaqortumilu nunatsinni ilinniartunut inissiat peqqinnartuunissaannik nutaaliaanissaannillu qulakkeerisussanut, Namminersorlutik Oqartussat suliniutaannut ilaapput.

Qaqortumi illuliat 1.000 m²-isut angissusilimmik illutaqarput ilinniartunut 36-nut inissaqarluni aammalu siniffissat 40-nik amerlassuseqarlutik, kiisalu ilinniartitsisumut inissiaqarluni aammalu suliniutissanut pisussanut maligassiuilluni.

“Matumani pitsaalluinnartunik illuliorsinnaasugut takutinneqarpoq. Pitsaassusissap taassuma siunissami malitassanngornissaa suli sulissutigissavarput,” oqarpoq Ineqarnermut, Attaveqaasersuutinut Isorliunerusunullu Naalakkersuisoq Aqqaluaq B. Egede.

Maannakkorpiaq illuliornermut malittarisassat iluarsaannissaat sulissutigineqarpoq, tassani pitsaassutsip piujuartitsinerullu nunarput tamakkerlugu siunissami illuliornermi pissusissamisoortunut ilaalernissaa qulakkeerniarlugu ussissutsimut nukissiallu sunniuteqarluarnissaanut piumasaqaatit ilanngunneqassallutik.


Annertunerusumik paasisaqarusunnermi Ineqarnermut, Attaveqaasersuutinut Isorliunerusunullu Naalakkersuisoqarfik attaveqarfigineqassaaq, uunga box909@nanoq.gl