Eqqaaniut: Hans Anthon Lynge (1945–2025)

Ataqqinnilluta qujaniarlutalu eqqaaniarparput Hans Anthon Lynge – Kalaallit Nunaanni kulturikkut malunnaateqarluartut ilaat.

Hans Anthon Lynge Qullissani 1945-mi inunngorpoq, inuunermi annerpaataa kalaallit kinaassusaata nukittorsarneranut paasissutissiarineranullu, atuakkiornikkut,atuartitsinikkut, inuiaqatigiinnullu tunniusimalluni sulinikkut atorpaa. Kalaallit atuakkiorneranni nutaaliortutut siuarsaasuusimavoq, oqaluttualianik, allaatigisanik eqqarsaatinik saqqummiussanik aamma taallianik, paasisimasaqarluartutut malussarissuseqartumillu piffissami matumani annertuutigut allanngoriartorfiusumi kalaallip inuuneranik, anersaavanik aamma unammilligassaanikallaaserinnittarluni.

Kalaallit kulturiata kalaallillu oqaasiisa atatiinnarnissaanut ineriartortinneqarneranullu atuakkiortoq taamatut piginnaaneqartoq annertuumik sunniuteqarsimavoq.
Suliani aqqutigalugit uppernarsaasuuginnarnani kisiannili aamma kalaallit kulturiata ileqqutoqqanik nutaaliornermillu tunngaveqartoq, nutaaliaasumik kalaallisut paasineqarnissaanut ilusilersuisooqataasimavoq.


Namminersorlutik Oqartussani Kultureqarnermut Ilinniartitaanermullu Pisortaqarfimmi siunnersortitut piffissami 1981 -imiit 1997-imut atorfeqarsimavoq, tamatumalu kingorna Ilinniarfissuarmi lektorinngorpoq, tassanilu aamma kinguaariinnut nutaanut ilinniartitsisunut kulturilerisunullu isummersuisuujuarsimalluni, .

Ukiuni arlalissuarni Kalaallit Atuakkiortut siulittaasoraat, 2002-mi kalaallit oqaasii atorlugit atuagassiami KALAALEQ-mi aaqqissuisunngorpoq, suliarlu taanna piumassuseqarluarluni suliamullu piginnaasaqarluarluni toqunissami tungaanut suliaraa.

Hans Anthon Lynge aamma tunniusimalluni inuiaqatigiinni oqallinnermi peqataavoq, kalaallini siulliit ilagalugu inuiaqatigiinnik nukittuunik pilersitsinissamut kulturikkut imminut ilisimalersitsinikkut aammalu ilinniartitaaneup aqqutaanerannik isummersortartoq. . Suliai inuiaqatigiinni sunniuteqarluarsimasutut inissisimapput, kingornussassanngortitaalu kinguaariinni arlaqartuni eqqumiitsuliortuni, atuakkiortuni aamma kulturikkut suliaqartuni allani nassaassaassapput.

Hans Anthon Lynge Nuummi marlunngornermi oktobarip 28-ani 2025- sivisuumik napparsimareerluni toqukkut qimaguppoq, 80-inik ukioqarluni.

Qamannga pisumik misiginneqataanerput nulianut Inge Lise-mut, ilaqutaanut, inuunerani sulineranilu attorneqartunut allanut ingerlatipparput.

Hans Anthon Lyngep eqqaaneqarnera ataqqinartuuli.


Naalakkersuisut sinnerlugit.

Nivi Olsen
Naalakkersuisoq