Naalakkersuisut Aasianni Ilulissanilu innuttaasunit isummersuutinik pissarsipput – maanna Sisimiut aamma Maniitsoq tullinnguupput

Naalakkersuisut 22. aamma 24. oktobari 2025-mi Aasianni Ilulissanilu silap pissusia pillugu sammisaqartitsipput. Tassani innuttaasut tunniusimalluarnertik takutippaat, aammalu silap pissusia pillugu suliniutissanik, nunatsinni silap pissusianut periusissiassamut iluaqutaasussat iluaqutaasussanik siunnersuuteqarlutik. Isumaginninnermut, Suliffeqarnermut, Nunamut Namminermut Avatangiisinullu Naalakkersuisoq Bentiaraq Ottosen nunatsinni silap pissusia pillugu sammisaqartitsinernik aaqqissuussivoq, innuttaasut silap pissusiata allannguutai pillugit misigisaannik aamma silap pissusianut naleqqussaanissamut pinaveersaartitsinermilu suliniutissanut isumaannik aallussiviusumik akuutinniarlugit. Silap pissusia pillugu sammisaqartitsinerit tulliit Sisimiuni Maniitsumilu ingerlanneqassapput.

Nuna tamakkerlugu silap pissusianut periusissiaq suliarineqarnermini suli ilusileriartorpoq – maanna Aasianni Ilulissanilu innuttaasut silap pissusia pillugu isumaannik naleqartunik ilaqalerluni. Silap pissusia pillugu periusissiaq nunatsinni silap pissusianut anguniakkanik suliniutissanillu pingaarnernik imaqassaaq, nunatsinnilu ineriartornissamut periarfissanik aallussiffiussalluni. Aasianni Ilulissanilu silap pissusia pillugu sammisaqartitsinernut Pinngortitaleriffik Pinngortitamut Avatangiisinullu Naalakkersuisoqarfimmiit aallartitat ilagalugit peqataatitaqarpoq, innuttaasut silap pissusiata allannguutai taakkulu najukkani inuiaqatigiinnut kingunerisai pillugit oqaloqatigalugit.

”Aasianni Ilulissanilu innuttaasut takkuttut tunniusimalluarnerminnik, aammalu silap pissusianut suliniutissanut siunnersuuteqarnissamut kajumissuseqarnerminnik takutitsinerat nuannaarutigaara. Aaqqiissutissani, silap pissusiata allannguutai peqqutaallutik uagutsinnut piumasaqaataasuni inuit, kingunerisaasunik malugisaqarsimasut aallaavigineqarnissaat Naalakkersuisunut pingaaruteqarpoq. Taamaattumik innuttaasut isummersuutaat naleqarluarput, aammalu nuna tamakkerlugu silap pissusianut periusissiap suliaqarnerani aalajangiisuulluinnarlutik. Maanna Tasiilami, Sermiligaami, Kuummiuni, Kulusummi, Nuummi, Aasianni Ilulissanilu silap pissusia pillugu sammisaqartitsisoqareerput – aammalu sapaatit akunnerata naanerani sapaatillu akunnerata tulliuttup aallartinnerani Sisimiuni Maniitsumilu silap pissusia pillugu sammisaqartitsisoqassaaq. Aasianni Ilulissanilu takkuttut takutippaat, silap pissusiata allannguutai – taakkununngalu aaqqiissutissat – inupparujussuarnut isumaqartorujussuusut. Sisimiuni Maniitsumilu silap pissusia pillugu sammisaqartitsinerni tulliuttuni innuttaasunit silap pissusia pillugu periusissiamut ilanngussassanik tigusaqarnissannut qilanaarpunga”, Isumaginninnermut, Suliffeqarnermut, Nunamut Namminermut Avatangiisinullu Naalakkersuisoq Bentiaraq Ottosen oqarpoq.

”Suleqatigiinni ilaaffigisanni silap pissusiata allannguutai, meeraanitsinniilli malugisarsimasagut oqaloqatigiissutigaagut. Aatsaat ullumi siullermeerlunga siku ataaniit – immamiit – aakkiartortartoq paasivara. Tamanna suleqatitta ilaasa tusareersimavaat. Ulluinnarni inuunitsinni silap pissusiata allannguutai, aammalu suut pitsaanerusumik isumagisinnaanerlutigit tamatigut eqqarsaatigineq ajorpagut, Ullumikkut saqqummiussineq iluaqutaasorujussuuvoq, tamatumalu kingorna – suleqatigiiaarluta sulinitsinni – eqqarsaaterpassuit takkussuupput”, Dennis Hinrup, Aasianni silap pissusia pillugu sammisaqartitsinermut peqataasoq oqarpoq.

Silap pissusia pillugu sammisaqartitsinerit Sisimiuni aamma Maniitsumi nanginneqassapput
Innuttaasut silap pissusiata allannguutaannit misigisaannik, aammalu silap pissusianut aaqqiissutissatut isumaannik aallussiffiusumik akuutinneqarnissaat Naalakkersuisunut pingaaruteqarpoq. Taamaattumik Naalakkersuisut silap pissusia pillugu sammisaqartitsinerini suleqatigiiaartitsilluni sulititsisoqartarput, taakkunanilu innuttaasut ataatsimoorlutik silap pissusiata allannguutai pillugit misigisimasatik oqallisigisarpaat, silallu pissusianut suliniutissanik siunnersuuteqartarlutik. Silap pissusia pillugu sammisaqartitsinerit tulliit Sisimiuni Maniitsumilu ingerlanneqassapput, ulluni ukunani:

• Sisimiut: arfininngorneq ulloq 1. novembari 2025, nal. 17:00-20:00, Taseralimmi.
• Maniitsoq: ataasinngorneq ulloq 3. novembari 2025, nal. 17:00-20:00, Katersortarfimmi.

Attaveqarfissaq
Annertunerusumik paasisaqarusunnermi Pinngortitamut Avatangiisinullu Naalakkersuisoqarfik mail-imut tamanut ammasumut: pan@nanoq.gl attaveqarfigineqassaaq.

Aasianni Ilulissanilu silap pissusia pillugu sammisaqartitsinermit naammasseqqammersumit assit takukkit, uani.