AtuartigukUmiatsiaaqqat nalunaarsornissaannut kalaallisut ilitsersuut
Nassiussisuuvoq: Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik
Søfartsstyrelsen-p, ulloq 22. oktober 2025, umiatsiaaqqat nalunaarsornissaannut ilitsersuut kalaallisut qallunaatullu oqaasertalik nassiuppaa. Ilitsersuummi MitID atorlugu nalunaarsuinermik imaqarpoq. Ilitsersuut una toorlugu PDF-inngorlugu aaneqarsinnaavoq. Ilitsersuullu aalisarnermut peqatigiiffinnut kommune-nullu nassiunneqarnikuuvoq.
Nalunaarsuineq MitID atunngikkaluarlugu aamma ingerlanneqarsinnaavoq. Tassunga tunngatillugu Søfartsstyrelse Aalisarnernermut, Piniarnermut, Nunalerinermut Imminullu Pilersornermut Naalakkersuisoqarfimmut ilisimatitsivoq MitID atunngikkaluarlugu umiatsiaaqqanik nalunaarsuinermut ilitsersuut suliarineqarluni naammassingajalersoq. Tassungalu atatillugu Naalakkersuisoqarfik ilisimatinneqarpoq nalunaarsuinermut immersuiffissat kalaallisut nutserneqarnerat ingerlanneqaleruttortut.
Taakkulu Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmut tunniunneqariarpata piaartumik siammarterneqarumaarput.
Naalakkersuisoqarfiup aalisartunut eqqaasitsissutigissavaa, ulloq 1. januar 2026 nallertinnagu, umiatsiaaqqap nalunaarsornissaanut qinnuteqaat immersoriarlugu nassiunneqarsimanissaa naammammat. Immersuisimanerullu takussutissartaa aalisarnissarmut akuersissummik qinnuteqaammut ilanngunneqassaaq. Søfartsstyrelsen-imit GR-nr.-mik tigusaqarsimaguit tamanna aalisarsinnaanermut akuersissummik qinnuteqaammut ilanngullugu nassiutissavat.
Aalisartut sapinngisamik pitsaasumik sullinneqarnissaat qulakkeerumallugu Aalisarnermut, Piniarnermut, Nunalerinermut Imminullu Pilersornermut Naalakkersuisoqarfiup Søfartsstyrelsen-i ataavartumik attavigisarpaa. Suliamut attuumassuteqarsinnaasunik nutarterinerit pillugit Naalakkersuisoqarfik aalisartunut aalisarnermullu kattuffinnut, kommune-nullu ilisimatitsissutissiisarpoq.
Sukumiinerusumik paasisaqarusukkaanni Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmut saaffiginnittoqarsinnaavoq, e-mail: apn@nanoq.gl