Naalakkersuisut siunissami suliffeqarneq pillugu nuna tamakkerlugu isumasioqatigiinneq aallarnisalerpaat

Ulluni 27. aamma 28. oktober 2025-mi Isumaginninnermut, Suliffeqarnermut Nunamullu Namminermut Naalakkersuisoqarfik nuna tamakkerlugu suliffeqarnermik naalakkersuinikkut ingerlatsineq pillugu Nuummi isumasioqatigiitsissaaq, Naalakkersuisoq Bentiaraq Ottosen ammaanersiornermi oqalugiassalluni, nunami suliffeqarnerup ineriartorneranut naalakkersuinikkut ersarissumik sammiviliilluni.

Isumasioqatigiinnermi inuussutissarsiornermiit, qitiusumik ilinniarfinniit, kommuniniit inuiaqatigiinniillu aallartitat katersorneqassapput suliffeqarnermi unammilligassat qitiusut pillugit oqallinnissaq siunissarlu ungasinnerusoq eqqarsaatigalugu aaqqiissutissanik oqaasertalersuinissaq siunertaralugu. Naalakkersuisup ammaanersiornermi oqalugiaammini ersersissavaa, Naalakkersuisut suliffeqarnerup patajaatsuunissaanik peqataatitsinissaanillu nukittorsaanissaq pillugu ersarissumik anguniagaqartut:

“Aaqqissuussaanikkut naalakkersuinikkut iliuuseqarnissamik pisariaqartitsisunik unammilligassaqarpugut. Pisariaqarpoq ilinniarnissamut inissanik amerlanerusunik, pikkorissaaneq pitsaanerusumik pissarsiarineqarsinnaaneranik aamma suliffeqarnermi innuttaasut – tunuliaqutaat apeqqutaatinnagit – tapersiinissaannut ineriartornissaannullu periarfissinneqarnissaannik qulakkeerinninnissaq,” Bentiaraq Ottosen oqaaseqarpoq.

Isumasioqatigiinnermik pilersaarummut sulisut inuusuttut ilinniartullu, nunani allamiunut suliassaqarfik, inuuneq naallugu ilikkagaqarneq, assigiinngiiaassuseq sullivinnilu avatangiisit ilaatigut ilaatinneqarput. Oqallinnerit siunissami naalakkersuinikkut iliuusissanut tunngaviliissapput immikkoortullu akimorlugit suleqatigiinneq nukittorsassallugu.

“Naalakkersuisut inuussutissarsiornerup aamma qitiusumik ilinniarfiit akornanni suleqatigiinneq annertusarniarpaat, piginnaasanik ineriartortitsinermik aningaasaliillutik aamma inuk kinaluunniit suliffeqarnerup avataanut katataannginnissaa qulakkeerlugu. Tamanna naalakkersuinikkut salliutinneqassaaq,” Ottosen erseqqissaavoq.

Isumasioqatigiinneq naggaserneqassaaq marlunngorneq ulloq 28. oktober paasisimasallit oqallitsinneqarnerannik aamma katersuinermik, ataatsimoorluni unammilligassat aaqqiissutissatullu siunnersuutit suussusersineqassallutik.

Attaveqarfissaq
Paasissutissat erseqqinnerusut pillugit Naalakersuisoqarfik attavigiuk email isn@nanoq.gl.