AtuartigukKalaallit innuttaasuinut innarluutilinnut unammillernartut pillugit nunarput Danmarkilu pitsaasumik oqaloqatigiipput
Nassiussisuuvoq: Peqqissutsimut inunnullu Innarluutilinnut Naalakkersuisoqarfik
Peqqissutsimut inunnullu Innarluutilinnut Naalakkersuisup Danmarkimi isumaginninnermut ineqarnermullu ministeri, Sophie Hæstorp Andersen, marlunngornermi ulloq 30.09.2025 oqaloqatigalugu naapippaa, tassanilu kalaallit innuttaasut timikkut isumaliortaatsikkut innarluutillit unammilligassai pillugit suliaqarneq aallartilluni; pingaartumik ullumikkut nunatsinni naammaginanngitsumik sullissineq pissutigalugu Danmarkimi inissinneqartariaqartut imaluunniit pineqaatissinneqartarlutik passussisarfimmiittariaqarlutik.
Naapinneq oqaloqatigiinnermik pitsaasumik ingerlanneqarpoq, tassani suleqatigiit marluullutik aaqqiissutissanik ataatsimut suleqatigiillutik pitsaanerusunik attanneqarsinnaasunik pilersitsinissaq pisariaqartinneqartoq maluginiarpaat.
“Ullumikkut pingaarutilimmik unneqqarissumik oqaloqatigiippugut kalaallit innuttaasut peqqinnissamut innarluutilinnullu naligiinnginnermik atugaqarnerannut atatillugu,” taama Peqqissutsimut inunnullu Innarluutilinnut Naalakkersuisoq oqarpoq, “ Aappassaannik Naalakkersuisutut - Naalagaaffiit Peqatigiit inunnut innarluutilinnut isumaqatigiissutaanut aamma inuit pisinnaatitaaffii malillugit naalagaaffik ingerlaavartumik akissussaaffeqartoq erseqqissarpara. Pisuutitsineq pineqanngilaq kisianni akisussaaffik naligiissitaanerlu pineqarput.”
Naapinnermi aallarnisaataasumik kalaallit danskillu akornanni suleqatigiissitamik pilersitsisoqarnissaa pillugu eqqartuisoqarpoq, tassanilu aaqqiissutissanik piviusunik misissuisoqassallunilu saqqummiussisoqassaaq. Nunatsinni piginnaanngorsaanissamik immikkut pisariaqartitsisoqarpoq nunatsinnilu periarfissat naammaginanngitsut pissutigalugu kalaallit innuttaasuisa Danmarkimut inissinneqartariaqarnerannut atatillugu nunatsinnut aningaasaqarnikkut unammilligassaqarpoq.
“Kalaallit innuttaasut innarluutillit angerlarsimaffitsik, ilaquttatik kulturertillu qimallugit ikiortinnissaat pinaveersaartinnissaa anguniassallugu kissaatigaarput. Ukulu pineqarput pinaveersaartitsineq, inuit pisinnaatitaaffii aammalu angerlarsimaffik qanillugu inuunermik atugarissaarnissaq qulakkeerniarlugu ”, Naalakkersuisoq oqarpoq.
Innuttaasut pineqaatissinneqarsimasut nunatsinneersut maanna Danmarkimi pineqaatissinneqarsimasut inissiisarfianniittut pillugit naapinnermi ataatsimoorussamik paaseqatigiiffiuvoq unammillernartuusoq. Suliani taamaattuni inuit pisinnaatitaaffii aammalu innuttaasut ikiorneqarneranni kulturi eqqarsaatigalugu ataqqineqarnissaat sullinnissaallu qularnaarneqarnissaa pisariaqarpoq.
Naapinnermi isumaginninnermi ineqarnermullu ministeri Sophie Hæstorp Andersenip kalaallit isiginnittaasiannik paasinnilluni aammalu siumut isigisumik suleqatigiinnissamut piumassuseqarnini ersersippaa. Ataatsimoorussamik suleqatigiissitami aallaavittut ataatsimoorlutik aaqqiissutissanik ineriartortitsinissamut periarfissaqarpoq.
“Naapinneq una neriuuteqalersitsivoq,” taama Naalakkersuisoq naggasiivoq, nangillunilu:
“Suleqatigiinnermik nukittunerusumik aallartitsivugut, tassani apeqqutit ilungersunartut aamma kalaallit innuttaasut innarluutillit ulluinnai pitsaanerulersinniarlugit suliniuteqarpugut. Tamannalu suliassaavoq ataatsimut suleqatigiinnikkut anguneqarsinnaasoq”
Erseqqinnerusumik paasitinneqarnissamik pisariaqartitsisut naalakkersuisut allattaanut Nivé Lynge Biilmannimut, e-mail: nilb@nanoq.gl Peqqissutsimut inunnullu Innarluutilinnut Naalakkersuisoqarfimmut attaveqarsinnaapput. E-mail: pn@nanoq.gl, oqarasuaat +299 34 50 00 saaffiginnissinnaapput.