AtuartigukNunanut Allanut Ilisimatusarnermullu Naalakkersuisoq Vivian Motzfeldt Reykjavikimi Arctic Circle Assemblymi peqataavoq
Nassiussisuuvoq: Nunanut Allanut Ilisimatusarnermullu Naalakkersuisoqarfik
Nunanut Allanut Ilisimatusarnermullu Naalakkersuisoq Vivian Motzfeldt sapaatip akunnerani siuliani Reykjavikimi Arctic Circle Assemblymi - Issittoq pillugu nunarsuarmi oqallittarfik siuttuusut ilaanni - peqataavoq. Issittumi unammilligassat periarfissallu qitiusut eqqartorniarlugit nunat naalakkersuinikkut sinniisui, ilisimatusartut nunanilu tamalaani kattuffiit katersuuttarput.
Kalaallit Nunaata nunat tamalaat akornanni suleqatigiinnerni peqataasarnera Vivian Motzfeldtip ersersippaa, aammalu nunarsuup immikkoortuata siunissaa pillugu Issittumi inuit naalakkersuisullu aalajangeeqataasarnissaasa pingaassusaa erseqqissarlugu. Silap pissusia, imaani avatangiisit, piujuartitsinermik tunngavilimmik ineriartortitsineq ilisimatusarnerlu - sammisat taakku tamarmik Kalaallit Nunaata nunanut allanut tunngatillugu anguniagaannut tulleriiaarinermi qaffasissumik inissisimapput.
Arctic Circle Assemblymi peqataaneq aamma Issittumi Siunnersuisoqatigiinni siulittaasuunermut atatillugu Kalaallit Nunaata pisassaqarnerannut ersarissaanermut periarfissiivoq, kiisalu nunat sanilerisavut nunarsuarmilu suleqatigisartakkavut oqaloqatiginissaannut periarfissiilluni.
“Issittoq oqallisigineqartillugu Kalaallit Nunaata naligiittutut immaqalu aamma siuttuusutut inissisimatinneqarnissaa pingaaruteqarluinnarpoq. Isummavut tusaaneqaannaratik nunarsuup immikkoortuani maannakkut siunissamilu aalajangiinissanut ilusilersueqataassapput. Reykjavikimi Arctic Circle Assemblymi oqaloqatigiinnerit ataatsimeeqataanerillu nunani tamalaani attaveqarnitsinnut nukittorsaapput nutaanillu suleqateqalernissamut periarfissiillutik. Issittumi Siunnersuisoqatigiinni siulittaasuunitsinni Issittumi inuit, imartat, silap pissusia, piujuartitsineq tunngavigalugu ineriartortitsineq aammalu pinngortitap nammineq oqimaaqatigiissitsinerata pingaartinneqarnissaat sulissutigissavarput.
Annerusumik paasisaqarusukkuit uunga attaveqarsinnaavutit:
Toqq/direkte +299 34 50 00
nap@nanoq.gl