AtuartigukIlinniarfik nunatta ilaani pisariaqartitsinermik isumaginnittoq
Nassiussisuuvoq: Ilinniartitaanermut, Kulturemut, Timersornermut Ilageeqarnermullu Naalakkersuisoqarfik
Maannakkut ukiaanerani ataatsimiinnermi 2025-mi oqaluuserineqaqqippoq Ilulissani GUX-imik pisariaqartitsisoqarnersoq pisariaqartitsisoqannginnersorluunniit.
GUX-ili nutaaq Ilinniartitaanermut, Kultureqarnermut, Timersornermut Ilageeqarnermullu Naalakkersuisup Nivi Olsenip pilersaarutigineqanngilaa.
“Allannguutissatut siunnersuuteqarnikuuvunga ilinniarfimmik inuussutissarsiornermik ilinniarfimmik ilinniarnertuunngornissamik periarfississiisumik naammassigaannilu ilinniarsimasunngortoqarsinnaasoq, ilinniarnertuunngortoqarsinnaasoq akulerullugilluunniit pilersitsinissamik misissuisoqassasoq. Siornatigummi misissuinerit takutippaat Ilulissani GUX-iinnarmik pisariaqartitsisoqanngitsoq.
Tamanna pillugu pingaarutilimmik erseqqissaassutigissavarput, Aasianni GUX atorunnaarsikkusunngilarput suliamulli peqataatikkusullugit qaaqquagut, taakkuuppummi ilinniarnertuunngorniarfimmi ikaarsaarnermi piginnaasaqartut” Nivi Olsen oqarpoq nangillunilu:
”Naalakkersuisunit taamaallaat ilinniarnertuunngorniarfinnik pisariaqartitsineq
kisiat isiginianngilarput, kisiannili aamma inuussutissarsiutitigut ilinniartitaanertigut
pisariaqartitsineq Avannaata Kommuniani inuiaqatigiinnut naleqqussagaasoq ilanngullugu isiginiarparput, aammalu sulisut ilinniarsimasut ilinniarsimanngitsullu pikkorissartinneqarnissaat ilinniaqqinnissamullu periarfissiilluta”.
Taamaattumik pingaarluinnarpoq Naalakkersuisoqatigiinni nutaani nunatsinni
inuussutissarsiortut aamma kommunit qanimut suleqatiginissaat inuiaqatigiinni
pisariaqartitsineq piusoq aallaavigalugu. Taamaattumik Ilulissani inuussutissarsiornermik ilinniarfimmik ilinniarnertuunngornissamik periarfississiisumik ilinniarfeqalernissaanut pineqartut soqutiginnittullu suliami ineriartortinneqartumi aallaqqaataaniit peqataatinneqarnissaat pingaartipparput.
Naalakkersuisut Inatsisartut ataatsimiinnermi qanoq aalajangernissaat utaqqimaarpaat.”
Annertunerusumik paassisaqarusunnernermi saaffigineqarsinnaavoq Ilinniartitaanermut, Kulturemut, Timersornermut Ilageeqarnermullu Naalakkersuisoqarfimmi immikkoortortami pisortaq Trine Egede, mail treg@nanoq.gl oqa. +299 34 57 21