Isumaqatigiissutip immikkoortuata aappaa Issittoq aamma Atlantikup Avannaa pillugit qularnaarivoq Atlantikup Avannaani immap naqqatigut kabelimik Danmark-ip aamma Kalaallit Nunaata akornanni aamma suliniutinik nutaanik inuiaqatigiinni sillimaniarnerup upalungaarsimanerullu nukittorsarneqarnissaannik

Qanimut suleqatigiinnikkut Naalakkersuisut aamma danskit naalakkersuisuisa akornanni illersornissaqarnermut atatillugu isumaqatigiissuteqaqatigiissut isumaqatigiissutigisimavaat isumaqatigiissummi immikkoortut aappaat, Issittoq aamma Atlantikup Avannaa pillugit. Isumaqatigiissut imaqarpoq suliniutinik arlalissuarnik inuiaqatigiinnik aamma sillimaniarnermik nukittorsaasussanik, matumanissaaq immap naqqatigut kabelikkut Kalaallit Nunaata aamma Danmark-ip akornanni, siumoortumik nalunaarasuartaat silaannarmut radari Tunumi inissitaq, drone immikkut ilusiligaq Issittumi tunngaviusumik ilinniartitaanernut aamma siuartitsineq suliniutinik taaneqartunut Kalaallit sakkutooqatigiivinik - Grønlandske Rangers. Tamatuma saniatigut isumaqatigiissut imaqarpoq aamma issittumi umiarsuarnik marlunnik, timmisartumik imartanik nakkutilliissummik, droninik arlaqarnerusunik aammalu sakkutooqarfiup Arktisk Kommando -p nutaamik qullersaqarfissaanik il.il.

Isumaqatigiissutip immikkoortuata aappaa Issittoq aamma Atlantikup Avannaa pillugit aamma imaqarpoq ataatsimut suliniutissanik 27,4 mia. kr.-inik naleqartunik. Suliniutit nukittorsassavaat Illersornissaqarfiup Issittumi suliassaminik suliaqarnera, attaveqaqatigiinnermut atortulersuutit nalorninaateqartut aamma najukkani namminerni aallaaviusut Kalaallit Nunaannik sillimaniarnikkut suliaqarnermi.

Nunanut Allanut Ilisimatusarnermullu Naalakkersuisoq Vivian Motzfeldt tamatumunnga imatut oqaaseqarpoq:

”Issittumi sillimaniarnikkut pissutsit allanngoriartorput. Tamatumani pissutsit ilungersorluta isiginiartariaqarpagut. Tamanna isumaqarpoq piffissamut naajusumut ikaarsaalersugut, Kalaallit Nunaanni illersornissap suli annerusumik inissisimaneranik imaqartumik uagutsinni inuiaqatigiinni. Qularnaarumallugu ineriartornerup iluaqusiinissaa aammalu innuttaasut peqataatikkumallugit, isumaqatigiissutip immikkoortuata aappaatigut Issittoq aamma Atlantikup Avannaa pillugit suliniutissat isumaqatigiissutigaagut, inuiaqatigiinnut ulluinnarni suliniutit iluaqutaasussat. Uannut aalajangiisuuvoq illersornissaq pillugu isumaqatigiissummi suliniutissat aqqutaassammata Kalaallit Nunaanni sillimaniarnermut isumannaatsumillu inuunermut”.

Danskit Illersornissamut ministeriat Troels Lund Poulsen imatut oqaaseqarpoq:

”Sillimaniarnikkut pissutsit atuuttut ilungersunarput. Taamaattumik pisariaqarpoq Illersornissaqarfiup Issittumiinnerata aamma Atlantikup Avannaaniinnerata nukittorsarneqarnissaa suli aammalu. Alloriarnernik pingaaruteqartunik tigusereersimavugut Isumaqatigiissutip immikkoortuani siullermi, aammalu Issittumut aamma Atlantikup Avannaanut tunngatillugu, aammalu sungiusarnernik arlaqartunik ingerlataqartarsimalluta, nunap immikkoortuani tamaani. Isumaqatigiissutip immikkoortuata aappaatigut Issittoq aamma Atlantikup Avannaa pillugit alloriarnerit angisuut tulliuttut tiguagut. Illersornissaqarfiup suliassaminik suliaqarnera nukittorsarparput, tamaaniinnerpullu malunnaatilissuarmik annertusillutigu, sanaartukkatigut pisiatigut, assersuutigalugu imartanik qulaavaassutit timmisartut aamma issittumi umiarsuit. Assut pingaartippara qanimut suleqatigiinnerput, aamma pitsaasumik oqaloqatigiittarnigut Kalaallit Nunaanni Naalakkersuisullu isumaqatigiissut pillugu”, taamak oqarpoq Illersornissamut ministeri forsvarsminister Troels Lund Poulsen.

Isumaqatigiissutip immikkoortuata aappaat Issittoq aamma Atlantikup Avannaa pillugit, aamma imaqarpoq suliniutinik qanoq isumaqatigiissutip piviusunngortinneqarnissaa pillugu tamatumalu kalaallini inuussutissarsiutinut suliffinnullu iluaqutaasinnaaneranik. Qulaajaaneq periarfissanik najukkani ingerlatsinerit aallaaveqarsinnaanerinik ingerlaavartumik pisarpoq kalaallini oqartussat suleqatigalugit, aamma attaveqaasersornikkut. Attaveqaatit peqataassapput oqaloqatigiinnut illuatungeriit naleqquttut akornanni, qularnaarumallugit kalaallini inuussutissarsiortut annerusumik eqeersimaartumik akulerunneqartarnissaat isumaqatigiissutaasunik piviusunngortitsiortornerni. Tamatuma saniatigut suleqatigiiffiliortoqassaaq periarfissanik oqaloqataasussanik aammalu aporfissanik suleqatigiinniarnermut Illersornissaqarfiup aamma kalaallini inuussutissarsiortut akornanni.

Isumaqatigiissutip immikkoortuani suliniutit ataatsimoortut pissapput ilalersorumallugit NATO -mi illersoqatigiit suliassaminnik suliaqarnerat, isiginiarneqassallutillu Kunngeqarfiup anguniagaatut patajaatsumik eqqissisimasoqarnissaanik, sillimaniartoqaannarnissaanik, aalajaatsumillu ineriartortoqarnissaanik Naalagaaffeqatigiit immikkoortuanni tassani, eqqissisimasoqaannarnissaa anguniagaalluni pingaarneq.

Suli annerusunik paasisaqarumagaanni attavigineqarsinnaavoq ministersekretær Rosa Thorsen aqqutigalugu e-mail rsth@nanoq.gl eller tlf. +299553303.