Peqqinnissaqarfik allanngoriartortoq: Naalakkersuisut peqqissutsimut tunngatillugu isumaqatigiissut nutaaq annertusisarlu pillugu oqallinneq aallartippaat

Ukiuni qulikkaani Kalaallit Nunaanni peqqinnissaqarfik tatineqarsimavoq – aamma naak amerlasuunik pitsaasunik aamma suliatigut nukittuumik suliniuteqartoqartarsimagaluartoq, killiffik alloriaqqiffiusussaq tikipparput. Taamaattumik Naalakkersuisut Inatsisartuni partiit peqatigalugit oqaloqatigiinnerit pingaaruteqartut aallartissimavaat, matumani peqqissutsimut isumaqatigiissusioqataasut peqatigalugit, nutaamik aamma annertusisamik peqqissutsimut isumaqatigiissummik, pilersaarusiornikkut, siunissaq ungasissoq eqqarsaatigalugu pisariaqartunik allannguutissanut aqqutissiuisussamik pilersitsinissaq anguniarlugu.

Maanna killiffik periarfissaajunnaarpoq. Innuttaasut ineriartornerat, sulisussarsiornermi unammillikkat, peqqissarnissamut neqeroorutini assigiinngissutsit aamma napparsimasunut tunniunneqarsinnaasut aningaasaqarnikkullu qaffakkiartortumik tatineqarnerup peqqissutsimut politikkikkut nutaamik isiginnissinnaalerneq pisariaqartilerpaa. Taamaattumik Naalakkersuisut aalajangersimapput, siunissaq ungasinnerusoq eqqarsaatigalugu, angusaqarluarniarfiusumik aamma nuna tamaat isigalugu eqqarsartoqartariaqartoq.

Maanna piffissami naalakkersuisooqatigiiffiusumi siusissukkut peqqissutsimut tunngatillugu isumaqatigiissut suliaralugu aallartinneqarpoq suliatigut tunngasunik workshoppertitsisarnikkut ataatsimiisitsisarnikkullu, taamaalillutik peqqissutsimut ilisimasallit aamma suliaqartut attuumassutillit qitiusumik ajornartorsiutinut aamma peqqinnissaqarfimmut periarfissanik naleqartunik isummersoqataatinneqarput, aamma peqqinnissaq pillugu ataatsimiititaliarsuup innersuussutit 2023-meersut ilaannik atulersitsisoqarluni. Taama suliatigut isiginnittariaatsit politikkikkut sulinerup ingerlateqqinneqarnissaanut pisariaqartinneqarput.

Ilutigalugu innuttaasut nipaat suliap ingerlanerani qitiusumik inissisimallutik ilaatinneqarput. Nuna tamakkerlugu angalasarnerni kaffisoqatigiilluni aamma innuttaasut ataatsimiisinneqartarnerini isummersuuterpassuit katersorneqarsimasut, isumaqatigiinniarnerni pingaarutilittut tunngavissatut ilaatinneqassapput. Innuttaasut misigisarsimasatik, ernumassutitik aamma kissaatitik oqariartuutigisimavaat, taakkulu maanna pimoorunneqarlutik siunissami peqqissutsimut politikkissap ilusilersornerani peqataatinneqassapput.

Partiinik eqqartueqateqarneq maanna aallartissimavoq aamma taakku politikkikkut atituumik isumaqatigiissummut tunngavigineqarumaarlutik, taanna pilersaarut malillugu ukioq naatinnagu naammassineqarsimassaaq, sammivissaq imaalu isumaqatigiissutaasinnaappata.

Peqqissutsimut inunnullu Innarluutilinnut Naalakkersuisoq oqaaseqarpoq:

"Peqqinnissaqarfik inuiaqatigiinni pingaarutilittut inissisimasuuvoq. Qanga aaqqissugaaneq kisiat tunngavigalugu siunissaq pilersissinnaannginnatsigu nassuerutigisariaqarparput. Maanna aalajangiinerit ajornakusoortut pisariaqartinneqartulli aalajangiunnissaannut piffissanngorpoq, ataatsimoorlutalu taamaaliussaagut. Partiit innuttaasullu peqatigalugit peqqinnissaqarfik naapertuilluarnerusoq, piujuartitsinerusoq aamma nutaaliaasoq pilersissavarput.”

Naalakkersuisut suliap sulinerullu siumut ingerlanera pillugit ingerlaavartumik ilisimatitsisarumaarput naatsorsuutigalugulu ukiup naanerani politikkikkut ataatsimoorussamik isumaqatigiissutip saqqummiussinnaanissaa.

Paasisaqarusunnerorusukkuit attavigiuk ministerip allattaa Nivé Lynge Biilmann, e-mail: nilb@nanoq.gl

Peqqissutsimut inunnullu Innarluutilinnut Naalakkersuisoqarfik. E-mail: pn@nanoq.gl, telefon +299 34 50 00.