Naalakkersuisut Siulittaasuat Strasbourg-imi Europa-Parlamentimi oqalugiarpoq.

Assiliisoq / Fotograf: Fred MARVAUX
Copyright: © European Union 2025 - Source : EP

Naalakkersuisut Siulittaasuat Jens-Frederik Nielsen ullumikkut Europa-Parlamentimi Strasbourg-imi oqalugiarpoq. Oqalugiarneq tunngaveqarpoq Europa-Parlamentimi siulittaasup Roberta Metsola-p qaaqqusissutaanik, taanna Naalakkersuisut siulittaasuannik qaaqqusimmat oqalugiaatigeqqullugu Kalaallit Nunaata peqatigiinnermi inissisimanera, -peqatigiinnermi EU-p aamma Kalaallit Nunaata akornanni suli ineriartortumi.

Naalakkersuisut Siulittaasuata oqalugiarnermini erseqqissaatigaa Kalaallit Nunaata aamma EU-p peqatigiinnerat pitsaasoq, ukiuni kingullerni 40-ni ineriartortuarsimasoq, Kalaallit Nunaata EU-llu pisariaqartitaat tunngavigalugit. Kalaallit Nunaata suli ingerlaqqittumik kissaatigaa peqatigiinnerup ineriartortinnissaa, Kalaallit Nunaannut aammalu EU-mut iluaqutaasumik. Tamatumani ilaapput suliassaqarfiit, soorlu aatsitassarsiorneq, nukissiuutit piujuaannartitsisut, ilinniartitaaneq, digitaaliusumik ineriartortitsineq, oqarasuaatikkut attaveqaatit aamma takornariartitsineq. Naalakkersuisut Siulittaasuata immikkut erseqqissaatigai EU-lu isumaqatigiinniarnissat aggersut, ukiunut arlaqartunut aningaasartuutissanut missingersuusiatigut suleqatigiinneq, suli annerusumik suleqatigiinnermut aqqutaasinnaasut.

”- Nuannaarutigaara tulluusimaarutigalugulu Præsident Metsola-p qaaqqusissutaa ullumikkut naammassisarput. Tamatumani alloriarneq nutaaq tiguarput suleqatigiinnitsinni EU-lu pitsaasumi, tassanilu erseqqissassavara akunnitsinni suleqatigiinnitta annertusarsinnaaneranut periarfissat. Ullumikkut EU-p aamma nunatta unammilligassai eqqarsaatigalugit upperaara peqatigiinnitta annertusarneqarnissaa, nukittorsarneqarnissaalu, aaqqiissutissat akunnitsinni nassaariumallutigit, illuatungeriinnut iluaqusiisussat. Kalaallit Nunaanni EU atorfissaqartipparput, aammalu EU-p Kalaallit Nunaat atorfissaqartippaa. Qilanaaraara oqaloqatigiittarnitta ingerlateqqinnissaa, EU-lu suleqatigiinnerput pillugu.”

Naalakkersuisut Siulittaasuata aamma periarfissaqarfigaa Europa-Parlamentimi siulittaasumik Roberta Metsola-mik naapitsinissi, - tassanilu oqaloqatigiissutigineqarput Kalaallit Nunaata EU-llu akornanni pissutsit, tassanissaaq aamma uppernarsarneqaqqippoq illugiilluni kissaatigineqartoq nukittorsaanissaq suleqatigiinnermillu ineriartortitseqqinnissaq.

Sukumiinerusumik paasissutissat pillugit attaveqarfissaq:
Naalakkersuisut Siulittaasuata allattaa Andreas Poulsen, +299 34 52 80, andp@nanoq.gl