Qeqertarsuarmi peqqinnissakkut sullissineq pillugu paasissutissat aamma oqaloqatigiilluni ataatsimiinneq

Peqqissutsimut inunnullu Innarluutilinnut Naalakkersuisoq, Anna Wangenheim ullumikkut Qeqertalimmi Borgmesteri Qeqertarsuarmilu peqqinnissaqarfimmi sulisut oqaloqatigalugit ataatsimeeqatigai. Illoqarfimmi peqqinnissakkut sullissinermut tunngatillugu innuttaasunit peqqinnissamullu tunngasutigut sullissisunit ernumasunit saaffiginnissutit arlallit inoqatinullu attaveqatigiittarfinni ikkussat qisuariarfiginiarlugit ataatsimiinneq ingerlanneqarpoq.

Qeqertarsuarmi peqqissaaviup ammasarfia ambulancellu sullissinerannut tunngatillugu ikkussaq pissutigalugu ernumasoqarpoq. Tamanna peqqissutsikkut sullissineq pillugu innuttaasut peqqinnissaqarfimmilu sulisut akornanni ernumassuteqartoqarneranik kinguneqarpoq.

Paasissutissat tamanut saqqummiunneqartut eqqortuunerat qulakkeerniarlugit Qeqertarsuarmi peqqissaavimmut tunngatillugu ikkussaq pillugu sapaatip akunnerani matumani siusinnerusukkut Kalaallit Nunaanni Peqqinnissaqarfimmit naqqiisoqarpoq, taannalu uani atuarneqarsinnaavoq.

Peqqinnissaqarfiup qullersaqarfia peqqinnissaqarfimmilu sulisut Qeqertarsuarmi pisoq pillugu misigisaat Anna Wangenheimip ataatsimeeqatigineritigut paasiniaavigai.

Napparsimasut isumannaatsuunerannik pitsanngorsaanissamut atatillugu
najukkami aaqqissuussisoqarnerani annikinnerusumik allannguuteqartoqarsimanera Peqqinnissaqarfiup qullersaqarfianit ilisimatitsissutigineqarpoq. Pinasuartumik napparsimasut napparsimmavinnut annerusunut katsorsaanissaq eqqarsaatigalugu amerlanerusunik periarfissalimmut sukkanerusumik nuunneqartarnissaat allannguinermi anguniarneqarpoq, tamatumalu kingunerisaanik peqqissaavimmi ulloq unnuarlu sulisoqarnissaanut pisariaqartitsineq annikinnerulersimavoq. Taamaammat nakorsiartunik unitsitsisoqarsimanngikkaangat unnuami sulisoqarneq ajorpoq. Pinasuartumik napparsimasunik unitsitsisoqarsimatillugu nuutsitsinissamullu utaqqisoqartillugu soorunami ulloq unnuarlu sulisoqarnissaa qulakkeerneqartarpoq. Nakorsiartunut tamanut peqqinnissakkut pisariaqartitsisunut tamanut suli ambulancenik angallassisoqartarpoq. Ornigulluni ammasarfiata avataatigut pinasuartunik saaffiginnittoqartillugu, tassa imaappoq nal. 16.00-miit nal. 08.00 tungaanut Qeqertarsuarmi innuttaasut 892211-imut pinasuartumik attaveqassapput.

Anna Wangenheim ilisimatitsivoq:
"Qeqertarsuarmi innuttaasut peqqinnissaqarfimmilu sulisut eqqissisimannginnerat ernumanerallu paasisinnaalluarpara. Peqqinnissakkut sullissinermut Peqqinnissaqarfiullu sullissineranut tunngatillugu oqaloqatigalugit ataatsimeeqatigineranni peqqinnissaqarfimmi sulisut misigisaasa isiginnittaasiisalu tusarnaarnissaannut periarfissaqarsimavunga.

Ataatsimut isigalugu inuiaqatigiit katsorsarneqarnissamullu pisariaqartitat allanngoriartorneranni peqqinnissaqarfimmi naleqqussaasarnissaq pisariaqartinneqartussaagaluartoq allannguutit taakku innuttaasunut sulisunullu paasissutissiissutigineqartarnissaat erseqqissassallugu pingaartippara. Peqqinnissaqarfiup ingerlanneqarnera pitsanngorsarniarlugu peqqinnissaqarfiup qullersaqarfia attuumassuteqartumik pisariaqartumillu aqutsinikkut aalajangiissaaq, soorunami sulisut innuttaasullu qitiutinneqassapput, matumani erseqqissumik attaveqatigiittoqassalluni.

Peqqinnissaq pillugu politikkip ineriartorneranut atatillugu peqqinnissaq pillugu isumaqatigiissutip annertusarnissaa pillugu isumaqatiginninniarnermik aallartitsivunga, tassani innuttaasut tamarmik nunatsinni sumiluunniit najugaqaraluarpata sapinngisamik pitsaanerpaamik katsorsarneqarnissaminnut periarfissaqarnissaat anguniarlugu peqqissutsikkut pingaarnersiuinissamik qulakkeerinninnissaq qitiulluinnarpoq.

Sullissinermik quppersagaq aamma 2023-mi peqqinnissaq pillugu isumaqatigiissut naapertorlugit pinasuartumik ilungersunartumillu napparsimasunik ullumikkut nuussisoqartarpoq, tassani innuttaasut assersuutigalugu taqqamik milittoorsimasut, inuuserlertut annertuumilluunniit ajoqusersimasut sukkasuumik piginnaasalinnillu ikiorneqarnissaat aalajangersarneqarsimavoq. Taamatut pisoqartillugu immikkut ittumik katsorsaanissaq pisariaqakkajuttarpoq, taakkulu nunatsinni taamaallaat sumiiffinni ataasiakkaani neqeroorutigineqarsinnaapput. Peqqinnissaq pillugu politikkikkut aqutsinermi qitiusumik immikkoortut assigiinngitsut isumaqatigiissummi isummerfigissavavut, aamma naleqqussaanerit aalajangerneqartut pillugit erseqqissumik attaveqatigiittoqarnissaa qulakkeerusuppara.

Naggasiutigalugu sulisut qujaffigerusuppakka nersorusullugillu sapiissuseqarlutik innuttaasut soqutigisaat illersorniarlugit pissutsit peqqinnissaqarfimmi pingaaruteqartut pillugit oqaaseqarsimammata. Kajumissaarutigerusuppara neriuutigalugulu innuttaasut peqqinnissaqarfimmi sulisut atugassarititaasut ajornakuusooraluarlutik pingaarutilinnik suliaqarnerat ataqqissagaat tatigalugulu. Innuttaasut illersorumallugit sullinneqarnerallu nukittorsarusullugu sulisullu toqqisisimanartumik innuttaasunik sullissisinnaanerat angorusullugu qilanaarutigivara Qeqertalimmi Borgmesteri politikkikkut ineriartortitassat pitsanngorsarusullugit suleqatiginissaa. ”

Sukumiinerusumik paasisaqarnerorusuttut naalakkersuisup allattaanut Nivé Lynge Biilmann, e-mail: nilb@nanoq.gl-imut attaveqarsinnaapput. Peqqissutsimut inunnullu Innarluutilinnut Naalakkersuisoqarfik. E-mail: pn@nanoq.gl, telefon +299 34 50 00.