Vivianip naalagaaffinnik mikisunik naapitsinera

Vivian Motzfeldt ulluni 22. – 25. september 2025 New Yorkimi Naalagaaffiit Peqatigiit qullersaqarfianni, Naalagaaffiit Peqatigiit 80-ssaannik ukiumoortumik Ataatsimeersuarnerisa ammarneqarneranni peqataavoq.

Nunanut Allanut Ilisimatusarnermullu Naalakkersuisoq Vivian Motzfeldt ataatsimeersuarnermi peqataanerup, Naalagaaffiillu Peqatigiit generalsekretæriannik Antonio Guterresimik kiisalu Nunanik tamalaanik suleqateqarneq pillugu EU-p kommissæria Jozef Síkelamik ataatsimeeqateqarnerit saniatigut, Islandip, Palauip, Marshallit Qeqertaasa, San Marinop Andorrallu nunanut allanut ministeriinik ataatsimeeqateqarpoq.

- Naalakkersuisunut pingaaruteqarpoq inuiaat allat naalagaaffimmik sanarfinermik misilittagaannik tusarniaaffigalugillu ilinniarfiginissai. Naalagaaffiit qeqertaasut nunallu mikisut innuttakitsut assigiinngitsunik aaqqissuunneqarnerat, ilaatigullu suliffissuarnik ataatsimik marlunnilluunniit aningaasarsiornerminni toqqammavillit sunik unammilligassaqartarneranik, qanorlu nunat tamat suliniaqatigiiffiini ataqatigiiffiinilu sulisuminnik nukissaminnillu atuisarnerannik naalaarluarnissaq pingaaruteqarpoq, Vivian Motzfeldt oqarpoq.

Nunat ilaasortat 193-iusut ammaanersiornermi najuupput. Ataatsimeersuarnermi naalagaaffik ataaseq ataatsimik taasisinnaassuteqartarpoq, naalagaaffillu tamarmk arfinillit tikillugit Naalagaaffiit Peqatigiit ataatsimiittarfissuanni aallartitaqarsinnaasarput.

Naalakkersuisoq Vivian Motzfeldt danskit Naalagaaffinnut Peqatigiinnut aallartitaasa ilaattut peqataavoq, tassanilu nunanut allanut ministeri Lars Løkke Rasmussen aallartitat siuttoraat, Savalimmiuni nunanut allanut ministeri Sigrid Stenberg aamma ilaavoq.

- Soqutiginninnerujussuaq malugisinnaavarput, aammalu Kunngeqarfiup iluani qanoq ingerlanersugut, qanorlu nammineernerulernissatta annertusarnissaanik eqqummaariffeqarnersugut tusarusuppaat, Vivian Motzfeldt oqarpoq.

Nunanut allanut Ilisimatusarnermullu Naalakkersuisoqarfik kiisalu Kalaallit Nunaata Washington D.C.-mi sinniisoqarfiat Naalakkersuisumut ataatsimiinnerni ingiallortaapput, taakkununngalu tunngatillugu

New Yorkimi danskit aallartitaqarfiat peqatigalugit annertuumik ataqatigiissaarinernik ingerlatsisoqarpoq.

Paasissutissat erseqqinnerusut pillugit naalakkersuisup allattaa Rosa Thorsen, rsth@nanoq.gl imaluunniit mobiili: +299553303 atorlugit attavigiuk