Ella Ø-p kitaani Dicksonip Kangerluani angallattoqannginnissaanik siunnersuut aammalu Avannaani Kangianilu Nunap allanngutsaaliukkap angallaviginissaata ulorianartuuneranut nalunaarut

Upalungaarsimanermut Ataatsimiititaliarsuup inassuteqaataa malillugu, Naalakkersuisut Ella Ø-p kitaani Dicksonip Kangerluani angallattoqannginnissaa siunnersuutigaat. Avannaani Kangianilu Nunap allanngutsaaliukkap angallavigineqarnissaata ulorianarneranik, angallavigissagaannilu mianersorluartariaqarnermik Naalakkersuisut naliliipput.

Septembarip 16-ani 2023-mi Avannaani Kangianilu Nunami allanngutsaaliukkami Dicksonip Kangerluani qaqqamik sisoortoqarpoq. Qaqqap sisoornera ulluni qulingiluani tassaarsuaqartitsivoq, sumiiffimmi annertuumik mallertitsisumik. Qujanartumik inunnik ajoqusertoqanngilaq atortulli kisimik aseruatiterput. Qaqqap sisoornerata qanittuani mallit 200 meterit tungaannut portussuseqarput sisoornerullu kitaani kilometerinik arlalinnik ungasitsigisumi mallit 80 meterit tungaannut portussuseqarsimallutik. Ella Ø-p nalaani mallit 5 meterinik portussuseqarsimasut Issittumi Sakkutooqarfik naliliivoq.

Dicksonip Kangerluani pisoqarnera Upalungaarsimanermut Ataatsimiititaliarsuup isumannaallisaanermik nalilersuineranik kinguneqarpoq. 2023-mi qaqqap iigaa sisoorsimasup qajannassusaa qularutigineqarpoq, taamaammat Upalungaarsimanermut Ataatsimiititaliarsuaq Naalakkersuisunut inassuteqaateqarpoq, Ella Ø-p kitaani Dicksonip Kangerluani angallattoqannginnissaanik siunnersuuteqaqqullugit.

Upalungaarsimanermut Ataatsimiititaliarsuup inassuteqaataa malillugu, Naalakkersuisut Avannaani Kangianilu Nuna allanngutsaaliugaq angallavigissallugu ulorianartutut nalilerpaat. Taamaammat Avannaani Kangianilu Nunami allanngutsaaliukkami nunakkut immakkullu angallattut tamarmik mianersorluaqqissaassapput. Taamaattoq Avannaani Kangianilu Nunamut suli allanngutsaaliukkamukartitsisoqarsinnaavoq.

Naalakkersuisut naliliinerat mianersoqqussutaallu Upalungaarsimanermut Ataatsimiititaliarsuup upalungaarsimanikkut naliliinerannit pivoq. Upalungaarsimanermut Ataatsimiititaliarsuup naliliinermini, imaannarmi uuttortarneqanngitsumi angallanneq ingammik aarlerinartoqartippaa. Avannaani Kangianilu Nunami allanngutsaaliukkami silap allanngoriasaarsinnaanera ilisarnaataavoq, tamannalu angallannikkut aarlerinartorsiornissamut annerulersitsivoq annaassiniarnernilu ajornakusoortitsinerusinnaalluni. Kiisalu piffik inoqanngitsumiippoq isorartuneratalu annaassiniartartut qisuariarnissaasa kigaappallaarnerannik kinguneqarsinnaavoq.


Sumiiffimmi angallattoqannginnissaanut Naalakkersuisut siunnersuutaat pillugu paasisaqarnerorusukkaanni Pinngortitamut Avatangiisinullu Naalakkersuisoqarfik uunga e-mailimut attavigineqarsinnaavoq: pan@nanoq.gl