Inunnut innarluutilinnut sapaatip akunneritinneqartumut 41-mut qulequtaq – 2025: Ersinngitsumik innarluutillit

Innarluutit ersinngitsut ilaqutariinni tamanut sunniuteqartarpoq – meeraq ersinngitsumik innarluutilik, qatanngutaasut aamma angajoqqaat.

”Inunnut innarluutilinnut sapaatip akunneritinneqartumi 41 ukioq manna meeraq ersinngitsumik innarluutilik, qatanngutai aamma angajoqqaavi qitiutippavut – tassa imaappoq, ilaqutai tamarmiusut, ilaqutariinni ataaseq imaluunniit arlallit ersinngitsumik innarluuteqartut. Ersinngitsumik innarluutit pillugit annertunerusumik ukkatarinninnissamik aamma paasititsinissamik kikkut tamarmik suliniuteqaqqullugit kaammattuivunga, kiisalu ilaqutariinnut ataatsimik imaluunniit arlalinnik ersinngitsumik innarluutilittaqartunut ataatsimoorfinnik pilersitsinissamut.” Peqqissutsimut inunnullu Innarluutilinnut Naalakkersuisoq, Anna Wangenheim oqarpoq.

Pisut ilaanni inunnut ersinngitsumik innarluutilimmut qatanngutaasut ”meeraq soqutigineqanngitsutut” misigisinnaasarput, angajoqqaat meeqqamut innarluutilimmut qatanngutaasunit soqutiginninnerusarmata. Taaguut ”meeraq soqutigineqanngitsoq” meeqqanut inuusuttunullu tunngasinnaavoq – qatanngummut ataatsimut arlalinnulluunniit ersinngitsumik innarluutilimmit qanigisaasut aamma inooqataasut ”maluginiarneqannginnerusut”.
”Meeqqat soqutigineqannginnerusut” nammineq pisariaqartitaminnik tunulliutsitsikkajuttarput, angajoqqaat ataatsimut isigalugu meeraq ersinngitsumik innarluutilik tapersersorniarlugu piffissamik nukissanillu atuinerusarmata. Peqatigisaanik angajoqqaat ilerasuuteqarsinnaasarput aamma naammanngitsutut misigisimasinnaasarput, meeqqat akornanni soqutiginninneq naligiinngikkajuttartoq nalunnginnamikku, peqatigisaanilli pisumi allatut iliuuseqarnissaq ajornakusoorsinnaasarluni.

Meeqqat qatanngutiminnit ersinngitsumik innarluutilimmut qatanngutaasut ”maluginiarneqannginnerullutik” inuusut assigiinngitsunik misigissuseqarsinnaasarput. Maluginiarneqannginneq, kamanneq imaluunniit aliasunneq misigisinnaasarpaa, kisianni aamma qatanngutertik tapersersorneqarnerunissamik piffissaqarfigineqarnerunissamillu pisariaqartitsisoq paasisinnaakkajuttarpaat, tamatumalu nuanninngitsunik misigissutsinik eqqarsaatinillu misigisaqarnertik pillugit ilerasutsissinnaasarpaat.

Illuanik meeqqamut ersinngitsumik innarluutilimmut qatanngutaasut immikkuullarissunik pitsaasunik peqataatitsisunik piginnaasanik ineriartortitsisinnaapput, ilaqutariinnermi aamma inuiaqatigiinni atukkaminnik. Inunnik immikkut pisariaqartitsisunik peqateqarnermut aamma isumaginninnermut pikkorissunngortarput.

Ilaqutariittut ersinngitsumik innarluut pillugu ataatsimut aamma ammasumik oqaloqatigiinnissaq pingaaruteqarpoq, tamannalu aamma ilaqutariinnut qanoq sunniuteqarnersoq, kiisalu misigissutsit tamarmik tassunga attuumassuteqartut qanoq akuerineqarsinnaanersut – meeqqamut ersinngitsumik innarluutilimmut, meeqqap qatanngutaanut aamma angajoqqaanut.
Angajoqqaat aamma ulluinnarni meeqqamik/meeqqanik ersinngitsumik innarluuteqanngitsunik kisimeeqatiginninnissamut piffissalersuisarnissaat innersuutigineqarpoq, inissaqartinniarlugit aamma maluginiarniarlugit. Meeqqanut inuusuttunullu amerlasuunut aamma allanik assingusumik inissisimasunik tarrarsorfigisinnaasaminnik naapitaqarnissaq pitsaasumik sunniuteqarsinnaasarpoq.

Ukkatarineqartut

• Inunnut innarluutilinnut sapaatip akunneritinneqartoq 41 2025 ilaqutariinnut tamanut, ataatsimik imaluunniit arlalinnik ersinngitsumik innarluutilinnik meerartalinnut sammitinneqarpoq, ersarinnerulersitsinissaq, oqaloqatigiinnissaq, paasinninnissaq aamma paquminarunnaarsitsinissaq pilersinniarlugit.
• Inunnut innarluutilinnut sapaatip akunneritinneqartoq 41 2025 qatanngutaasunik peqataanerulersitsinissamik ukkataqarpoq, ataatsimut isiginnittumik suliniutit anguniarlugit, ilaqutariit ‘attaveqatigiittut’ isiginiarneqarlutik.
  
  

Aningaasat maanna qinnutigineqarsinnaalerput
Innuttaasut aamma susassaqartut aaqqissuussinissamut tapiissutinik qinnuteqarsinnaapput, tassani ukkatarineqassapput Ersinngitsumik innarluutit – Ersinngitsumik innarluutit ilaqutariinni tamanut sunniuteqartarput.

Kikkulluunniit aaqqissuussanut qulaani taakkartorneqartunut tapiissutinik qinnuteqarsinnaapput uunga qinnuteqaammik nassiussinikkut pn@nanoq.gl ilisarnaaserlugu ”sapaatip akunnera 41-2025”.

Qinnuteqarnissamut piffissaliussaq tassaavoq 5. oktober 2025.

Inunnut innarluutilinnut sapaatip akunneritinneqartumut 41-mut sammisassanut tapiissutit pillugit apeqqutit uunga nassiunneqarsinnaapput pn@nanoq.gl.



Paasisaqarnerorusukkuit naalakkersuisup allattaa Nivé Lynge Biilmann attaveqarfigiuk, e-mail: nilb@nanoq.gl
Peqqissutsimut Inunnullu Innarluutilinnut Naalakkersuisoqarfik.
E-mail: pn@nanoq.gl, telefon +299 34 50 00.