Kalaallit Nunaanni atugarissaarnerunissaq aningaasaqarnikkullu ineriartortitsinissaq pillugit isumaqatigiissuteqarnikkut Kalaallit Nunaata Danmarkillu suleqatigiinnertik annertusaqqippaat

Ministeriunerup Mette Frederiksenip Naalakkersuisullu Siulittaasuata Jens-Frederik Nielsenip Kalaallit Nunaanni atugarissaarnerulernermik inuiaqatigiillu aningaasaqarnikkut imminnut napatittut pilersinniarnerani kivitseqataasussanik sinaakkutitut isumaqatigiissutissaq ullumi atsioqatigiissutigaat. Ataqqeqatigiinneq naligiinnerlu suleqatigiinnissami tunngaviussapput.

Ministeriuneq Mette Frederiksen imatut oqaaseqarpoq:

”Kalaallit Nunaanni atugarissaarnerunissamik aningaasaqarnikkullu ineriartuutaasussanik isumaqatigiissummik Naalakkersuisut siulittaasuat atsioqatigisinnaagakku nuannaaqaanga. Isumaqatigiissutip Kalaallit Nunaani tamanit iluaqutigineqarnissaa marluulluta kissaatigaarput. Ataatsimoorluta peqqinnissaqarfik pitsanngorsaaffigissavarput attaveqaasersuutinillu nunatta ataqatigiilluarneruneranik kinguneqartussamik ineriartortitseqatigiissalluta. Ilaatigut Ittoqqortoormiini nutaamik mittarfiliornikkut Qaqortumilu itisuumik talittarfiliornikkut. Kalaallit Nunaata nukittunerusup pilersinnissaanut Naalakkersuisunik qanimut suleqateqarnissara qilanaaraara,” oqarpoq Mette Frederiksen.

Naalakkersuisut Siulittaasuat Jens-Frederik Nielsen ima oqarpoq:

” Qaammatit arlaqalersut oqaloqatigiittareerluta namminersorneq pillugu inatsimmi siunertarineqartunut atugassat pillugit sinaakkutitut isumaqatigiissuteqarsinnaagatta nuannaaqaanga. Isumaqatigiissut aqqutigalugu ilaatigut siunissaq ungasissoq isigalugu aningaasaliissuteqarnitsigut Kalaallit Nunaata aningaasaqarnikkut imminnut napatittup pilersinnissaa ilaatigut siunertaavoq. Pingaarnerpaavorli isumaqatigiissut una nunatsinni innuttaasunut tamanut iluaqutaasussaassammat. Peqqinnissaq inissaqarniarnerlu eqqarsaatigalugit unammilligassavut annertoqaat sinaakkutitullu isumaqatigiissut una aqqutigalugu ineriartortitsineq kissaatigisatsitut ilaatigut ingerlassinnaalissavarput.”

Danskit naalakkersuisui aningaasanut inatsisissatut siunnersuutertik aqqutigalugu Kalaallit Nunaanni ukiuni 2026-mit 2029-mut suliniutissanut aningaasaliissutissanullu 2026-imi katillugit 1,6 mia. kr.-nik atugassanngortitsisimapput.

Siunissaq qanittoq isigalugu isumaqatigiissut aqqutigalugu Tunumi Ittoqqortoormiini mittarfissaq Kujataanilu Qaqortumi itisuumik talittarfiliornissap sanaartornissaat Danmarkimit akilerneqassapput. Kalaallit napparsimasut Danmarkimi napparsimavinni katsorsartittarnerinut aningaasartuutit siunissami Danmarkimit akilerneqartalernissaat isumaqatigiissutigineqarportaaq.

Siunissaq ungasinnerulaartoq isigalugu attaveqaasersuutinut, inuussutissarsiutinik ineriartortitsinissanut isumannaatsumillu innaallagissamik pilersorneqarsinnaanissamut aningaasaliisinnaanissat periarfissarsiuuttarnissaat isumaqatigiissuut aqqutigalugu qulakkeerneqarportaaq.

Isumaqatigiissut uani atuarneqarsinnaavoq.

Annerunerusumik paasisaqarusukkuit: Statsministeriaqarfiup tusagassiisarnernut oqarasuaataa: +45 29 10 88 25.
aammalu Naalakkersuisut Siulittaasuata allattaa +299 34 52 80.