Vivian Motzfeldt Naalagaaffiit Peqatigiit Ataatsimeersuarnerata ammarneqarnerani peqataassaaq

Nunanut allanut Ilisimatusarnermullu Naalakkersuisoq Vivian Motzfeldt Naalagaaffiit Peqatigiit ukiumoortumik Ataatsimeersuarnerata New Yorkimi ulloq 23. september ammarneqarnerani peqataassaaq. 

”Naalakkersuisunut Kalaallillu Nunaannullu piffissaq manna naleqqulluinnarpoq peqataanitsigut Naalagaaffiit Peqatigiinni nunat tamat akornanni suleqatigiinnermik tapersersuinerput takutissallugu, suleqatigullu qaninnerpaat peqatigalugit akisussaaqatigiinnermik takutitsillutalu naalagaaffiit innuttanut pisussaaffii namminerlu aalajangiisinnaatitaanerup nunat tamat akornanni aalajaatsumik tunngaviusuusut aalajangiusimallugit ersarissassavarput. Piffissami nalorninartumi inuuvugut, taamaammallu peqataanissaq isumalu tamanna pillugu nunanik allanik ingerlaavartumik oqaloqateqarnissarput pingaaruteqarpoq”, ilaatigut taama Vivian Motzfeldt oqariartuuteqarpoq.

Naalakkersuisup angalanermini pilersaarutissai tamakkiisut maanna suliarineqaleruttorput. Naalakkersuisup Naalagaaffiit Peqatigiit Ataatsimeersuarnerat malinnaaffigissavaa, tamatumalu saniatigut nunanik allanik ataatsimeeqateqarnissat sulissutigineqarput.

”Nunat sanilerisavut, suleqatitsinnik kiisalu allanik ataatsimeeqatiginninnissarput naapertuuppoq. Nunat akornanni isumaqatigiissutit nutartertuarnissaat ineriartortinneqartuarnissaallu isumagisariaqarpoq, tamatumanilu Naalagaaffiit Peqatigiit Ataatsimeersuarnerat naapeqateqarfigissallugu naleqquttuuvoq, nunammi allat sinniisui ataatsimeersuarnermi najuutissammata”, Vivian Motzfeldt oqarpoq.

”Peqatigisaanillu oqaluttuarisaanerput ineriartornerpullu, siunissamilu politikikkut anguniakkatta uatsinnit isigalugu oqaluttarinissaat pingaaruteqarpoq. Pisarnertullu Naalagaaffiit Peqatigiinni ataatsimiinnerni  nunat inoqqaavisa pisinnaatitaaffiinut inuillumi pisinnaatitaaffiinut nalinginnarnut tapersiinitsinnik oqariartuuteqarnissarput pingaaruteqarpoq.

Naalagaaffiit Peqatigiit ilungersunartorsiorpoq, tunngaviusumilli nunat tamat akornanni inatsisinik toqqammaveqartumik ingerlatsinermi qulakkeerinnittuupput. Naalagaaffiit peqatigiit aatsaat taama ullumikkut pingaaruteqartigilerput”, Vivian Motzfeldt oqarpoq. 

Paasissutissat erseqqinnerusut pillugit attavigiuk: Naalakkersuisup allattaa Rosa Thorsen, rsth@nanoq.gl, mobiltlf.nr.: +299 553303