AtuartigukNaligiissitaaneq sammillugu qupperneq
Nassiussisuuvoq: Inuutissarsiornermut, Nukissiutinut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik
Kalaallit Nunaanni suiaassutsinik naligiissitsineq qanoq ippa? Tamanna maanna Kalaallit Nunaanni Naatsorsueqqissaartarfiup naligiissitaaneq sammillugu quppernerani paasisaqarfiginerusinnaavat.
Sammisaq pillugu quppernermi maanna saqqummiunneqartumi inuiaqatigiinni naligiissitaaneq erseqqissarlugu kisitsisit atorlugit nassuiaatit, kisitsisitigullu paasissutissat qitiusut saqqummiunneqarput. Tassani ilaatigut suiaassutsit agguataarsimanerat aamma isertitatigut, ilinniarsimassutsikkut, suliffeqarnikkullu suiaassutsit assigiinngissutaat pillugit paasissutissat nassaassaapput.
Kalaallit Nunaanni Naatsorsueqqissaartarfiata naligiissitaaneq sammillugu quppernermik saqqummiussineranut atatillugu Naligiissitaanermut Naalakkersuisoq, Naaja H. Nathanielsen imak oqarpoq:
”Naligiissitsinnginneq immini pilerneq ajorpoq, aalajangiinerilli aamma pingaarnersiuinerit kingunerisaannik pisarluni. Naligiissitsinnginneq akiorusukkutsigu, pissutsillu allanngortikkusukkutsigit naligiissitsinnginnermut pissutsit tunuliaqutaasut paasisariaqarpagut. Taamaammat naligiissitaaneq pillugu kisitsisitigut paasissutissat, kisitsisillu atorlugit nassuiaatit takujuminarsarlugit Kalaallit Nunaanni Naatsorsueqqissaartarfiata naligiissitaaneq sammillugu immikkut quppernermik saqqummiussimmat nuannaarutigaara. Sammisaq pillugu ilisimasanik pingaarutilinnik innuttaasut, soqutiginnittullu allat ajornaatsumik takunnissinnaalerlutillu tamat isiginnissuteqalersinnaalerput. Ilisimasaqarnerulernerput ilutigalugu piffissap ingerlanerani qupperneq ineriartortinneqassasoq naatsorsuutigineqarpoq.”
Kalaallit Nunaanni Naatsorsueqqissaartarfiup naligiissitaaneq sammillugu quppernera uani takuneqarsinnaavoq. Kalaallit Nunaanni Naatsorsueqqissaartarfiup Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoqarfimmi Naligiissitaanermut Allaffik isumasioqatigalugu qupperneq suliaraa.
Naalakkersuisup oqaaseqaataa pillugu annertunerusumik paasisaqarusukkuit, naalakkersuisup allatsia Jeanette L. Petersen e-mailimut: jalp@nanoq.gl-imut imaluunniit oqarasuaammut: +299 26 54 76-imut attavigiuk.