Europa-Kommissionip missingersuummut siunnersuummi nutaami Kalaallit Nunaannut aningaasaliissutit marloriaatinngortinnissai siunniuppaa

Europa-Kommissionip EU-mut ulloq 3. september ukiunut arlalinnut aggersunut 2028-2034-mut missingersuutissatut siunnersuutini kingulliit saqqummiuppai.

Siunnersuutini ilaatigut Imarpiup akiani nunat OLT-mi Nunallu ilaasunut suleqatigiinnermi aningaasaliissutit agguaanneqarput, tassani Kalaallit Nunaat ilanngullugu. Siunnersuummi Kalaallit Nunaannik suleqateqarnermi 530 mio. EUR immikkoortinneqarnissaat siunniunneqarpoq. Taakku maanna piffissami missingersuusiorfiusumit (2021-2027) marloriaammit annertunerupput, tassani Kalaallit Nunaat 225 mio. EUR-nik pissarsisarpoq.

Immikkoortunut soorlu ilinniartitaanermut, aatsitassanut pingaarutilinnut, nukissiuutinut ataavartunut, digitalinngorsaanermut, piujuartitsisumik takornariartitsinermut Kalaallit Nunaata EU-llu akornani suleqatigiinnerup nukittorsarnissaanut aningaasaliissutit siunnerfeqarput.

Nunanut allanut Ilisimatusarnermullu Naalakkersuisoq Vivian Motzfeldt ima oqaaseqarpoq:

”Europa-Kommissionip ukiunut arlalinnut aggersunut missingersuutissatut siunnersuutaa, Kalaallillu Nunaannut aningaasaliissutit marloriaatinngortinnissaannik Kommissionip siunnerfeqarnera iluarisimaartupilussuvarput. EU ukiut kingulliit 40-t ingerlaneranni Kalaallit Nunaannut pingaarutilimmik aalaakkaasumillu suleqatiginnittuuvoq, piffissamilu Kalaallit Nunaanut ilungersunartumi annertuumik ikorfartuisimalluni.

EU-mik suleqateqarnitta nukittorsarlugulu annertusarnissaa Naalakkersuisut erseqqissumik oqariartuutigaat. Missingersuutissatullu siunnersuutigineqartukkut immikkoortuni EU-mut Kalaallillu Nunaannut immikkoortuni nalituunik iluaqutaasussanullu suleqatigiinnitsinnik nukittorsaanissamut pitsaasunik pingaarutilinnillu periarfissaqarpoq.”

Kommissionip missingersuutissatut siunnersuutaa nunanik EU-mi ilaasortanik Europa- Parlamentimillu, missingersuutinik 2028-mi atuutilernissaat sioqqullugu akuersisussamik, missingersuutinik isumaqatiginninniarnissanut toqqammaviussaaq. Taamaalilluni isumaqatiginninniarnerit ukiuni tullerni marlunni ingerlasussatut ilimagineqarput.

”Ukiut aggersut marlussuit Bruxellesimi annertuunik isumaqatiginninniarnernik ingerlatsiviussapput, taakkulu Naalakkersuisut Kalaallillu Nunaata EU-mi Sinniisoqarfianit qanimut malinnaaffigineqassapput. Taamaammat Kommissionip missingersuutinut siunnersuutaa pitsaasoq isumaqatiginninniarnissani pingaarutilerujussuarmik pitsaasumillu aallarniisuussaaq.” – Vivian Motzfeldt naggasiivoq.

Annertunerusumik paasisaqarusukkuit uunga attaveqarsinaavutit: Kalaallit Nunaata Bruxellesimi Sinniisorqarfia, mail: bxl@nanoq.gl, tlf.: +32 2 233 09 63