Suliniutit nutaat Danmarkip upalungaarsimanermi inuiaqatigiinnullu isumannaallisaanermi suleqatigineqarneranik nukittortitsissapput

Assi: Tim Bergholdt Barsøe

Isumaginninnermut, Suliffeqarnermut, Nunamut Namminermut, Avatangiisinullu Naalakkersuisoq Bentiaraq Ottosen 1. – 2. septembari 2025-mi inuiaqatigiinni isumannaallisaanermut upalungaarsimanermullu Ministeri Torsten Schack Pedersen-imittikeraarneqarpoq. Tikeraartoqarnermi Kalaallit Nunaata Danmarkillu qanoq ilillutik upalungaarsimanermi inuiaqatigiinnullu isumannaallisaanermi nukittunerusumik ataatsimoorsinnaanerat sammineqarpoq.

Suleqatigiinneq nukittortinneqassaaq, aammalu Kalaallit Nunaanni najuunnerup nukittunerulernissaa qulakkeerneqassaaq
Isumaginninnermut, Suliffeqarnermut, Nunamut Namminermut, Avatangiisinullu Naalakkersuisoq Bentiaraq Ottosen aamma inuiaqatigiinni isumannaallisaanermut upalungaarsimanermullu Ministeri Torsten Schack Pedersen sapaatit akunneranni matumani Nuummi ataatsimeeqatigiipput. Tikeraartoqarnermi Issittoq aamma Imarpiup Avannaa pillugu isumaqatigiissutip ilaa eqqartorneqarpoq, tassungalu Kalaallit Nunaanni mobilikkut kalerrisaarutip S!RENEN-ip atuutsinneqalernissaa ilaatinneqarpoq. Tamatuma saniatigut Naalakkersuisup Bentiaraq Ottosenip upalungaarsimanermut suliassaqarfimmi ataqatigiissaarinerit, avitseqatigiinnerit aamma oqaloqatigiinnerit oqallisigineqarnissaannut pitsanngorsarneqarnissaat kissaatigaa. Tamatuma peqatigisaanik Inuiaqatigiinni Isumannaallisaanermut Aqutsisoqarfiup aamma Pinngortitamut Avatangiisinullu Naalakkersuisoqarfiup akornanni suleqatigiinnissamut isumaqatigiissutissaq nutaaq isumaqatiginninniutigineqarpoq.

Nunatsinni upalungaarsimanermik nutaaliaanerusumik ineriartortitsinissamik suliniuteqartoqassaaq

Tikeraartoqarnermi ulluinnarni upalungaarsimaneq pillugu politikkikkut oqaloqatigiissuteqartoqarpoq suliassallu paasissutissiissutigineqarlutik:

• Kalaallit Nunaanni Politiit upalungaarsimanermi immikkut ittumik inissisimanerat pillugu oqalliseqatigineqarput, taakkununngalu search and rescue (SAR) ajornartoornernillu aqutsinerit ilaatinneqarput.

• Kommuneqarfik Sermersuumi illoqarfimmi siunnersuisoqatigiinni ilaasortaq Uju Petersen ataatsimeeqatigineqarpoq, aammalu Nuummi qatserisartoqarfimmut takornariartitsisoqarpoq, tassanilu kommunip upalungaarsimanermut pisortaa aamma teknikkimut pisortaaneq annaassiniarnissanut upalungaarsimanermi suliat attaveqaasersuutillu pisariallit pillugit ilisimatitsissuteqarput.

• Issittumi Sakkutooqarfik pulaarneqarpoq, tassanilu danskit aallartitaat Naalagaaffeqatigiit iluanni sakkutuut inuinnaallu Issittumi upalungaarsimanermi suleqatigiiffii pillugit paasissutissinneqarput.

”Tikeraartoqareerlunga ersarissumik paasivara, maani nunatsinni upalungaarsimanermik nutaaliaasumik isumannaatsumillu ineriartortitseqqinnissamut nukittuunik tunngavissaqarluta. Pingaartumik Issittoq Imarpiullu Avannaa pillugu suliassat ilaannut isumaqatigiissummut siullermut sinaakkusiussat iluanni suliniutissanik aalajangersimasunik arlalinnik, ilaatigut mobilikkut kalerrisaarummut tunngasunik, ajornartoornerni innuttaasunut sukkasuumik eqqortumillu kalerriisinnaasumik aallartitsinerput iluarisimaartorujussuuara. Suliassaq taanna aqqutigalugu aamma suleqatigiinnerput nukittorsarparput. Silap pissusiata allanngoriartorneri Issittumilu suliat amerliartorneri ilutigalugit tamanna pingaaruteqaleriartuinnartoq”, Isumaginninnermut, Suliffeqarnermut, Nunamut Namminermut, Avatangiisinullu Naalakkersuisoq Bentiaraq Ottosen oqarpoq nangillunilu:

”Politiit, Kommuneqarfik Sermersuup Issittumilu Sakkutooqarfiup ataatsimeeqatiginerini takutinneqarpoq, Kalaallit Nunaanni upalungaarsimaneq ataatsimut suliassaasoq, immitsinnut qanilluta suliffigisassarput. Ministerip Torsten Schack Pedersenip ministereqarfiatalu suleqatigineqarneranik nangitsinissatsinnut qilanaarpunga”, Naalakkersuisoq Bentiaraq Ottosen naggasiivoq.

Inuiaqatigiinni isumannaallisaanermut upalungaarsimanermullu Ministeri Torsten Schack Pedersen oqarpoq:

”Upalungaarsimaneq inuiaqatigiinnilu isumannaallisaaneq aatsaat taama pingaaruteqartigilerpoq – Kalaallit Nunaanni Danmarkimilu. Upalungaarsimaneq eqqartorneqartillugu ikioqatigiinnissarput misilittakkanillu avitseqatigiinnissarput uannut pingaaruteqarpoq. Taamaattumik maannangaaq Issittumi aamma Imarpiup avannaani upalungaarsimanermi suliassat ilaannut isumaqatigiissuterput nutaaq atulersinniarlugu aallartilluareernerput iluarisimaarpara. Kalaallit Nunaanni upalungaarsimaneq pillugu annertunerusunik ilikkagaqarnera, aammalu qanoq iliorluta suleqatigiinnitta ineriartorteqqinneqarnissaa pillugu oqallinnerput nuannaarutigaara.”

Annertunerusumik paasisaqarusunnermi Naalakkersuisup allattaa Anders Samuelsen tlf.: 34 56 11/27 02 36-mut imaluunniit e-mail: pan@nanoq.gl aqqutigalugu attaveqarfigineqassaaq.