AtuartigukIllersornissaqarfik septembarimi 2025-mi Kalaallit Nunaanni takussaassaaq
Nassiussisuuvoq: Nunanut Allanut Ilisimatusarnermullu Naalakkersuisoqarfik
Illersornissaqarfik 2025-mi aasaanerani Kalaallit Nunaanni piffinni arlalinni suliaminik annertusaavoq. Illersornissaqarfiup piginnaasaasa issittumilu pissutsinik ilisimasaasa pitsanngorsarnissaat siunertaavoq, taamaalilluni Kalaallit Nunaanni sakkutuut inuinnaallu suliassaat pitsaanerpaamik isumagineqarsinnaaqqullugit.
Illersornissaqarfik suliassanik isumaginninnermut suli pitsaanerulerumalluni septembarip qaammataani Arctic Lightimik sungiusarnernik annertusaassaaq.
Arctic Light upalungaarsimanikkut ajunaarnersuarnillu passussinernik sungiusarneruvoq uteqattaartumik ingerlanneqartartoq, tassanilu Illersornissaqarfiup ajunaarnersuarnik assigisaanillu pisoqartillugu inuinnarnik oqartussanik inuiaqatigiinnillu ikorfartuisinnaanerata takutinnissaa siunertaavoq.
Ukioq manna sungiusarnermi ilaatigut atortuutit tulliuttut ilaatinneqassapput:
- Fregatimik inissiineq
- EH-101-helikopterinik marlunnik inissiineq
- F-16 timmisartutigut ilapittuineq
- Nunamik paarsinermik ilapittuineq
- Immikkut sungiusarsimasunik ilapittuineq
Atortuutit illoqarfinnut arlalinnut inissinneqassapput, tassani Nuuk Kangerlussuarlu ilanngullugit. Iligisat akornanni Issittumi sakkutooqarnikkut pissutsinik ilisimasat nukittorsarniarlugit, nunat suleqatigisat arlallit sungiusarnermut ilapittuissapput.
Piffinni najugaqartut akuutinnissaat piffinnilu pissutsit eqqumaffiginissaat qulakkeerniarlugu Naalakkersuisut Illersornissaqarfillu suliniutinut qanimut suleqatigiipput.
Nunanut allanut Ilisimatusarnermullu Naalakkersuisoq Vivian Motzfeldt ima oqarpoq:
”Illersornissaqarfiup sungiusarnerisa amerlasuut ingerlanneqartarnerisa Illersornissaqarfiup Kalaallit Nunaanni takussaanerulersippaa. Piviusoq nutaaq tamanna sungiutissavarput. Taamaammat innuttaasut akuutinnissaat pingaaruteqarpoq, taamaaliornikkut Illersornissaqarfiup sungiusarniarluni piginnaasanillu sanarfiniarluni maaniinneranik, Naalakkersuisullu suliniutinut akuutinneqarnerannik kikkut tamarmik ilisimatinneqaqqullugit. Sungiusarnerit Illersornissaqarfiup isumagisassaminik naammassinnissinnaaneranut pingaaruteqarpoq”.
Piffinni innuttaasut akuutinneqarnerannut atatillugu Issittumi Sakkutooqarfik piffinni suleqatinik paasissutissiilluni ataatsimeeqateqassaaq Nuummilu Kangerlussuarmi Sisimiunilu innuttaasunik ataatsimiititsisoqassaaq. Innuttaasunik ataatsimiititsineq siulleq Nuummi ataasinngornermi ulloq 8. september Katersortarfimmi ingerlanneqassaaq.
Illersornissaqarfiup qullersaqarfia Arctic Light 2025 pillugu siunissami ilisimatitsissutinik pingaarnertut nassitsisartuussaaq. Suliniutit sukumiisut ingerlanneqarnerat pillugu erseqqinnerusumik paasissutissiinermi iserfissat tulliuttut Naalakkersuisut innersuussutigaat.
ARKTISK KOMMANDO - Joint Arctic Command | Facebook
Kiisalu illersornissaqarfiup Facebookimi, Blueskyimi, X-imi Istagramimilu qupperneri.
Annertunerusumik paasisaqarusunnermi saaffigineqarsinnaapput Nunanut Allanut Ilisimatusarnermullu Naalakkersuisoqarfik nap@nanoq.gl