Qaqortumi politikerit qullersaasa ataatsimiinnerat

Inatsisartunut kommunalbestyrelsinullu qinersinerit kingornisigut Naalakkersuinikkut Ataqatigiissaarisoqatigiit ulluni 26.-27. august 2025-mi siullertut ataatsimiinnertik ingerlappaat. Ataqatigiissaarisoqatigiit Naalakkersuisunit nunamilu borgmesterinit inuttaqartut oqallittarfittut qitiusutut atuupput, tassanilu killeqarfiit qaangerlugit inuiaqatigiinni ajugaaffigisassat, ataqatigiinnerup qularnaarnissaa, aammalu pisortat immikkoortoqarfianni ataatsimoorussatut iluarsiissutit pilersinnissaat sammisaralugit oqaluuserineqartarput.

Naalakkersuinikkut Ataqatigiissaarisoqatigiinnut siulittaasoq, Isumaginninnermut, Suliffeqarnermut, Nunamullu Namminermut Avatangiisinullu Naalakkersuisoq, Bentiaraq Ottosen, siulittaasutut siullertut ataatsimiisitsinini aquppaa, tikilluaqqusinerminilu Naalakkersuisut kommunillu akornanni qanimut kinguneqartussatullu suleqatigiinnerup pingaaruteqarnera erseqqissarpaa:

”Sammisat pingaarutillit amerlasuut oqaluuseraagut, oqariartuullu ataaseq paatsuugassaanngilaq – ajugaaffiginiagassat angisuut tamakku taamaallaat ataatsimoornikkut iluarsiivigineqarsinnaapput. Naalakkersuisut kommunillu ikioqatigiissapput, ingammik isumaginninnermik suliassaqarfimmi, tassanimi meeqqat ilaqutariillu ataqatigiinnerusumik iliuuseqarnermik pisariaqartitsipput. Innuttaasut allannguuteqartoqassasoq naatsorsuutigaat, ullunilu atukkani assigiinngissummik piliaqartunik inernerisanik pilersuinissaq uagut akisussaaffigaarput,” Bentiaraq Ottosen oqarpoq.

Oqaluuserisassat ilaatigut ilagisimavaat kommunit ilusissaat nutaaq pillugu aaqqissuusseqqinnermut ataatsimiititaliap suliaqarnera, pisortani immikkoortoqarfimmik digitaalinngorsaaneq, isumaginninnermik peqqinnissamillu suliassaqarfiit, kiisalu nunatta karsiata aningaasaqarnera.

Sammisaqarfigisatut ulloq 27. aggustimi pisoq aanngajaarniutinut sakkortuunut iliuuseqarnermik sammisaqarfiuvoq. Ullormut ataqatigiissaarisuuvoq Naalakkersuisoq Naaja H. Nathanielsen, inuiaqatigiinnilu killeqarfiit qaangerlugit kattussatut iliuuserisap pisariaqartinnera erseqqissaavigaa:

”Aanngajaarniutinik isertortumik eqqussuinerit, nioqquteqarnerit atornerluinerillu tassaapput ajornartorsiutini angisoorsuit, atornerluisumut ilaqutattanullu ajoqusiiginnaratik inuiaqatigiinnut tamarmiusunut ajoqusiisut. Tamakku inuiaqatigiittut attassisinnaassusitsinnik sanngiillisaapput. Inuttut atornerliusunngornermut patsisaasut amerlasinnaapput, tamakkulu pinaveersaartinnissaannut katsorsaaviginissaannullu akisussaaffeqarpugut. Inuilli isertortumik nunamut eqqussuinermi nioqquteqarnermilu ilaasut, allallu atugarliuutaannik iluanaarniartut suut tamaasa iluaqusiullugit akiorneqartussaapput. Ullormi sammisaqarfiusumi Naalakkersuisut borgmesterillu ullumikkut ajugaaffiginiakkanut takussutissamik tamakkiisumik pissarsipput, ilaallutik aangajaarniutinik isertortumik nunamut eqqussuinermut iliuuserisap annertusarnissaanut periutsit atorneqartussat tamakku,” Naaja H. Nathanielsen oqarpoq.

Ulloq sammisaqarfiusoq ilaatigut Kalaallit Nunaanni Politiinit, Eqqussanut akileraarutinut Akileraaruteqartitsiffimmiillu, Akileraartarnermut Aqutsisoqarfimmit, Allorfimmit, aamma Kommune Kujallermit tunngavissianik saqqummiussaqarfiuvoq, taakkulu tamarmik ilisimasanik misilittakkanillu ilalersuuteqarput. Tunngavissiat aanngajaarniutinut akiuissutitut iliuuserisap politikkikkut oqallissutiginissaannut tunngavissiipput.

Ataqatigiissaarisoqatigiit ukiumut marluk-pingasoriarlutik ataatsimiittarput, tullissaatullu ataatsimiinneq 2026-p aallartinnerani Kangerlussuarmi pissaaq.

Erseqqinnerusumik paasissutissarsiornermi attavigineqassaaq naalakkersuisup allattaa Anders Samuelsen, e-mailikkut: ansa@nanoq.gl imaluunniit oq.: + 299 34 56 11.