Kalaallit Nunaata kitaani umiarsualivinni itissutsinik Asiaq uuttortaassaaq

Asiaq Kalaallit Nunaanni umiarsualivinni 10-ni itissutsinut tunngasunik uuttortaanernik 2025-mi oktobarimi suliaqassamaarpoq.

Umiarsualivinni itissutsinut tunngasunik nunap assiliornermik suliniut Ineqarnermut, Attaveqaasersuutinut Isorliunerusunullu Naalakkersuisoqarfik qanimut suleqatigalugu aningaasalersuisoralugulu ingerlanneqassaaq.

Aqqaluaq B. Egede oqarpoq:
”Pisortat sullissinerisa nukittorsarnissaat aammalu isorliunerusortatsinni uuttortaanissamut paasissutissatigut tunngavissat pitsaanerulersinnissaat, Ineqarnermut, Attaveqaasersuutinut Isorliunerusunullu Naalakkersuisutut ilungersuullugit sulissutigaakka. Sumiiffinni taakkunani nunami sumiiffinnut teknikkinullu paasissutissat nalunaarsukkat pitsaanerulersinnissaannut periarfissaqarneq suliarineqartussanik pitsanngorsaanerinnaanngilaq — nunarput tamakkerlugu naligiimmik atugassaqartitsinissap ineriartortitsinissamullu periarfissaqarnissaata qulakkeernissaata tungaanut alloriarneruvoq pingaaruteqartoq.
Tamanna sullissinerup taassuma isorliunerusuni innuttaasunut, uuttortaanermut teknologiimik nutaaliaasumik qarasaasiatigoortumillu pilersaarusiornermik atuisinnaanatik akulikippallaamik inissisimasartunut, atoruminarnerulersinnissaanut tutsuiginarnerulersinnissaanullu suliassatut pingaarnertut isigaara. Taamatut suliniuteqarnermi aalajangiinissamut tunngavissat pitsaanerulersinnissaat, najukkani suliniuteqarnerulersitsisinnaanissaq aammalu pinngortitaq kulturerpullu ataqqillugit piujuartussamik ineriartortitsinissap tunngavissinnissaa kissaatigaarput”.

Asiap angallataa multibeam ekkolod-imik allanillu atortunik nutaaliaasunik atortulersugaavoq, paasissutissat nalunaarsukkat katersorneqartut qaffasissumik pitsaassuseqarnissaannik eqqoqqissaartuunissaannillu qulakkeerisunik. Asiaq paasissutissanik nalunaarsukkanik katersorneqartunik suliareqqeereerpat pitsaassusaannillu qulakkeerereerpat, taakkua oqartussanut, inuussutissarsiortunut allanullu soqutiginnittunut pissarsiarineqarsinnaalersinneqassapput aammalu paasissutissat nalunaarsukkat umiarsualivinni ilisimasortaqarnermi ilanngunneqassallutik.

”Ukioq manna Kangaatsiami, Niaqornaarsunni, Attumi, Ilimanami, Oqaatsuni, Ikamiuni, Kitsissuarsunni, Kangerlummi, Ikerasaarsummi Iginniarfimmilu umiarsualivinni itissutsinut tunngasunik eqqortunik uuttortaasoqartussaavoq. Tassami pinngortitami atugassarititaasut malillugit tamatigut suliaqartarpugut, kisianni 2025-mi oktobarip ingerlanerani inoqarfinni 10-ni tamaginni uuttortaanerit ingerlannissaat iluatsissallutigu neriuutigaarput”, oqarpoq Oscar Mäkinen, Asiaq-mi AI-nut aammalu imeqartunut immikkut ilisimasalittut atorfeqartoq.

Uuttortaanernut siunertaavoq immap itissusai sinerissallu killigi pillugit paasissutissanik sukumiisunik, pilersaarusiornerup imarsiornerullu isumannaassusaata pitsaanerulersinnissaannut atorneqarsinnaasunik, katersinissaq.

”Pitsaasorujussuarnik nutaaliaasunillu atortoqarpugut aammalu tamatuma kingorna paasissutissat misissornissaannut suliareqqinnissaannullu annertuumik misilittagaqarluta, taamaattumik naammassillugit suliarineqartut eqqoqqissaartorujussuusussaapput”, nangippoq Oscar Mäkinen.

Paasissutissanik annertunerusunik piniarnermi Ineqarnermut, Attaveqaasersuutinut Isorliunerusunullu Naalakkersuisoqarfik attaveqarfigineqassaaq uunga box909@nanoq.gl