Atuartiguk
Ilulissat avannaanni Kangerluarsummi immap itissusaannik Asiaq 2025-mi septembarip naalernerani uuttortaaniarpoq. Suliniummut siunertaavoq, najukkami pilersaarusiornermut, isumannaatsumik imaatigut angalaarnissamut aammalu sumiiffimmi siunissami attaveqaasersuutinut suliassaasinnaasunut tunngavissiiniarluni, immap itissusaasa aammalu sinerissap qanittuani pissutsit nunap assiliornissaat.
”Imaani isumannaatsuutitsinissamut aammalu sinerissami sumiiffinni atortorissaarutinik nutaanik pilersaarusiornissamut immap itissusaannut paasissutissat nalunaarsukkat eqqoqqissaarnissaat aalajangiisuulluinnarpoq, taamaalilluni maannakkut Kangerluarsummi immap itissusaannik eqqortunik uuttortaasoqartussanngornera neriulluarnarluinnarpoq”, oqarpoq Ineqarnermut, Attaveqaasersuutinut Isorliunerusunullu Naalakkersuisoq Aqqaluaq B. Egede.
Uuttortaanerit Asiap angallataannit, imeqartunik uuttortaanissamut nutaaliaalluinnartunik atortulersugaasunit, ingerlanneqassapput. Paasissutissat katersorneqartut immap assingisa nutarternissaannut aammalu sumiiffimmi oqartussanut, inuussutissarsiortunut innuttaasunullu aalajangiinissamut pitsaanerusunik tunngavissaqalersitsinissamut atorneqassapput. Suliniut Ineqarnermut, Attaveqaasersuutinut Isorliunerusunullu Naalakkersuisoqarfik qanimut suleqatigalugu aningaasalersuisoralugulu ingerlanneqassaaq.
Suliniut taamaalilluni Ineqarnermut, Attaveqaasersuutinut Isorliunerusunullu Naalakkersuisoqarfiup umiarsualivimmi sumiiffinnilu sinerissap qanittuaniittuni paasissutissanut nalunaarsukkanut tunngavissat pitsanngorsarniarlugit ingerlaavartumik suliaqarneranut ilaavoq. Siunnerfigineqarpoq piujuartitsiviusumik ineriartortitsinissap, isumannaatsumik imaani angalanissap, minnerunngitsumillu siunissami umiarsualivinnik pitsanngorsaanissamut periarfissanik misissuinissap, tunngavissinnissaat.
Ilulissat siusinnerusukkut umiarsuarnit takornariartaatinit nunatsinni umiarsualiviit tikeraarneqarnerpaasartut ilagisimavaat. Taamaattumik takornariartaatinut suliffissuit ullut ilaanni siusinnerusukkut takuneqartutut Ilulissat umiarsualivittut tulattarfissatut soqutigeqqilissagaluarpassuk, takornariartaatinut umiarsualivimmik nutaamik sumi inissiisoqassanersoq pillugu qularnaatsunik ilisimasaqarnissaq naleqquppoq.
Annertunerusumik paasisaqarusunnermi Ineqarnermut, Attaveqaasersuutinut Isorliunerusunullu Naalakkersuisoqarfik attaveqarfigineqassaaq, uunga box909@nanoq.gl