AtuartigukSpiralilersuinermik suliaq pillugu Ministeriuneq aamma Naalakkersuisut Siulittaasuat utoqqatserput
Nassiussisuuvoq: Naalakkersuisut Siulittaasuata Naalakkersuisoqarfia
Ministeriuneq Mette Frederiksen Danmarkip Kalaallit Nunaanni Peqqinnissaqarfimmik 1992 tikillugu akisussaaffeqarnerata nalaani immikkoortitsilluni aaqqissuussaasumik spiralilersuilluni suliaq tunngavigalugu arnanut kalaallinut spiralilersorneqarsimasunut utoqqatserpoq. Naalakkersuisut Siulittaasuat Jens-Frederik Nielsen Kalaallit Nunaata Peqqinnissaqarfimmut akisussaaffimmik tigusinerata kingorna spiralilersuinermik suliat pillugit utoqqatserpoq.
Ministeriuneq Mette Frederiksen ima oqaaseqarpoq:
”Spiralilersuinermik suliaq Kalaallit Nunaanni kalaalerpassuarnut ilaqutariippassuarnullu kamassaataallunilu aliasulersitsisartoq nalunngilarput. Tamannalu Danmarkip naalagaaffeqatigiinnerullu nalinginnaasumik paasineqartarneranut soorunami sunniuteqarpoq.
Naatsorsuutigaarput arlaannaanulluunniit attuumassuteqanngitsumik spiralilersuineq pillugu suliamik qulaajaaneq qanittumi piariissasoq. Tamanna ima paasineqassaaq, pissutsit danskit naalagaaffiata iliuuserisimasai aamma Naalakkersuisut qulaajartikkusutaat tamakkerlugit suli paasinikuunngikkigut. Suliaq taanna assut pingaaruteqarpoq. Ataatsimoorluta qanga atugarisimasagut paasilluarnissaat tamatta paasisariaqarpavut. Imaanngitsoq allanngortissinnaagatsigu Kisianni nassuerutigerusukkatsigu. Ilinniarfigalugillu.
Suut tamaasa paasinngikkaluarlugit naalakkersuisunut suliaq taanna assut sunniivoq, tassami kalaallit arnat amerlasuut assigiimmik oqaaseqartarput, danskit peqqinnissaqarfiannit kanngutsaattuliorfigineqarsimallutik.
Pereersimasut allanngortissinnaanngilavut. Kisianni akisussaaffik uagut tigorusupparput. Taamaattumik Danmarki sinnerlugu ima oqarusuppunga: Utoqqatserpunga.
Niviarsiaqqanut arnanullu kalaaliunertik pissutigalugu aaqqissuussaasumik assigiinngisitsinermik eqqorneqarsimasunut utoqqatserpunga. Timikkut tarnikkullu ikilerneqarneq misigisimavaat. Sumiginnagaasimapput.
Nalunngilarput aaqqissuussaasumik kalaallinut immikkoortitsilluni pissusilersortarnerit allat nuanniitsut aamma pisartut. Kalaaliunertik piinnavillugu allatut pineqartarput. Danmark sinnerlugu utoqqatserpunga, aammali sumiginnakkat allat Danmarkip akisussaaffigisai utoqqatserfingaakka: kalaallit aaqqissuussaasumik inunnit allanit allaanerusutut aamma kongeqarfimmi innuttaasunut allanut sanilliullutik suunnginnerusutut pineqartartut utoqqatserfigivakka.
Spiralilersuinermik suliaq arlaannaanulluunniit attuumassuteqanngitsoq qulaajarlugu naammassippassuk, danskit naalakkersuisui kalaallit naalakkersuisui peqatigalugit pisut qanoq ilinniarfigisimanerlugit aamma oqaluttuarisaanermi ataatsimoorullugit oqaluttuassatta nuanniitsortaasa kinguneri qanoq ilinniarfigisimanerlugit aamma qanoq aalajangersimasumik iliuuseqarfigisassanerlugit eqqartuinerput nangissavavut. Spirali pillugu suliami allani aalajangersimasuni aningaasatigut taarsiisoqassasoralugu eqqartueqatigiissaagut.
Naalakkersuisut Siulittaasuat Jens-Frederik Nielsen ima oqarpoq:
”Naalakkersuisut sinnerlugit peqqinnissaqarfitta uatsinnit akisussaaffigineqalernerata kingorna arnat arlallit ajoquserneqarsimanerinut kanngutsaattuliorfigineqarsimanerinullu utoqqatserusuppunga. Ilissinnut eqqugaasunut kingunipilutitsisimasunullu utoqqatserpunga - ilissi nammineq piumasarinagu aqussinnaanagulu pineqarsimanersi pillugu utoqqatserpunga.
Naalakkersuisut akisussaaffipput nassuerutigaarput. Taamaattumik arnat eqqugaasut taarsiiffigitinnissaat pillugu aalajangertoqareerpoq. Sulineq januarimiilli aallartippoq aamma arnat eqqorneqartut qanoq taarsiiffigineqarnissaannik qanittukkut nalunaaruteqartoqassaaq .”
Spirali pillugu suliap arlaannaanulluunniit attuumassuteqanngitsunit qulaajaaffigineqarnerata tamanut september 2025-mi saqqummiutissasoq naatsorsuutigineqarpoq. Qulaajaalluni sulinerup saniatigut arnat arlallit spirali pillugu suliaq tunngavilersuutigalugu Danmarkimi nunamut namminermut ministereqarfik aamma peqqissutsimut ministereqarfik taarseeqqullugit marts 2024-mi piumasaqarfigaat. Naalakkersuisut arnanik eqqugaasunik, taarsiiffigeqqullutik piumasaqartunut aamma arlalinnik peqquteqarlutik taarsiiffigineqarnissaminnik piumasaqarnikuunngitsut ilanngullugit, tapersersuillutik nalunaarutiginninnertik suli attappaat.
Danskit kalaallillu naalakkersuisuisa qulaajaaneq naammassippat Kalaallit Nunaanni utoqqatsernertik peqatigiillutik malunnartikkusuppaat.
Annerunerusumik paasisaqarusukkuit:Ministeriunerup tusagassiuutinut oqarasuaataa: +45 29 10 88 25 aamma Naalakkersuisut Siulittaasuata allattaata oqarasuaataa +299 34 52 80.