Upernavimmi, Uummannamilu inissianik attartortittagassanik Naalakkersuisut sanaartortitsilerput

Inatsisartut Aningaasaqarnermut Akileraartarnermullu Ataatsimiititaliaata Upernavimmi inissiat attartortittagassat sisamat aamma Uummannami inissiat attartortittagassat sisamat sananeqarnissaannut aningaasanik atugassanngortitsinissamut Naalakkersuisut qinnuteqaataat akueraat. Akuersissuteqartoqarneratigut suliarinnittussanut isumaqatigiissutit inaarutaasut atsiorneqarsinnaalissapput, atortussat pisariaqartut inniminnerneqarsinnaalissapput, suliassallu aallartinneqarsinnaalissallutik. Inissiat najukkami sanaartugassalerisunit saneqassapput, 2027-ip atulersinnaanissaat naatsorsuutigineqarluni.

Ineqarnermut, Attaveqaasersuutinut Isorliunerusunullu Naalakkersuisoq Aqqaluaq B. Egede oqarpoq:

”Naalakkersuisut qinigaaffimmi matumani sulinerini, isorliunerusuni ineqarnermut tunngasut pingaarutilimmik ukkatarineqarput. Tamanna pillugu Upernavimmi, Uummannamilu inissianik attartortittagassanik sanaartornissaq maanna aallartissinnaaleratsigu nuannaarutigeqaraa. Isorliunerusuni inuuneq, atugarissaarneq, ineriartornerlu naapertuutissappata, isorliunerusuni ineqarnermut tunngasut pitsanngorsassallugit pingaaruteqarpoq. Tassunga tunngatillugu Inatsisartut Aningaasaqarnermut Akileraartarnermullu Ataatsimiititaliaat suliamik kajumittumillu suliaqarneranut qutsavigaara. Neriuppunga inissiat attartortittagassat nutaat Upernavimmi, Uummannamilu innuttaasut najukkaminni najugaqaannarnissaannut ajornannginnerulersitsissasut.”

Upernavimmi, Uummannamilu inissiat attartortittagassat inuusuttunut inissiat sanaartorneqarnerinut malitsigisaattut sananeqassapput. Inuusuttunit inuusuttunut inissianut innersuunneqartunit arlallit piffissap ingerlanerani najukkamini imaluunniit sumiiffimmi allami namminneerlutik inissaminnik qulakkeerinnissinnaanissaat naatsorsuutigineqarpoq. Tamanna inissiamik nammineerluni pigisassamik pisinikkut, illumik sanaqataaffiusumik sananikkut imaluunniit namminersortunit attartornikkut pisinnaavoq. Taamatuttaaq inuusuttunit arlalinnik, najukkaminni najugaqaannarnissamik kissaateqartunik, kisiannili namminneerlutik inissiamik qulakkeerinissamut periarfissaqanngitsunik peqassasoq naatsorsuutigineqarpoq. Inissianik attartortittagassanik sanaartornermi immikkoortut taakku siunnerfigineqarput.

Inoqarfinni mikinerni inissianut attartortittagassanut najoqqutassiaq
Inoqarfinni mikinerni inissianik nalinginnaasumik attartortittagassanik sanaartornissami najugaqartut kiisalu atortussat nassiunnissaat, tikisinnissaat, atortussalerinissaq, piffissarlu sanaartorfiusussaq aallaavigineqarput. Tamanna pillugu typehusinut najoqqutassiaq Illorput 2023 aallaavigineqarpoq. Typehusinut najoqqutassiaq inoqarfinni mikinerni pissutsinut, eqqumaffigineqartariaqartunullu naleqqussarneqareerpoq.

Upernavik
Inissiat ataatsimik sinittarfittaqarlutik angissutsimikkut kisimiittunut aappariinnullu kiisalu aappariinnut sinittarfeqateqarsinnaasaminnik ataatsimik imaluunniit arlalinnik meerartalinnut naleqqupput. Inissiat taakkua sisamat paarsuaasaq ilanngullugu 65,5 m2-iussapput, teknikkeqarfiillu marluusut tamarmik immikkut 8,3 m2-iussallutik, taamaalillunilu sanaartugassat tamakkerlugit 278,6 m2-iussallutik. Inissiamut isaarissami salliarnartaqassaaq, tassanngaanniillu ataatsimoorussamik teknikkeqarfimmukartoqarsinnaassalluni. Illut qisummik saqqaqassapput, aappaluttumillu taartumik qalipaateqassallutik.

Uummannaq
Inissiat ataatsimik imaluunniit marlunnik sinittarfittaqarlutik angissutsimikkut kisimiittunut aappariinnullu kiisalu aappariinnut sinittarfeqateqarsinnaasaminnik ataatsimik imaluunniit arlalinnik meerartalinnut naleqqupput. Paarsuaasaq ilanngullugu inissiat 71,19 m² aamma 84,67 m²-iussapput, ataatsimoorussamillu teknikkeqarfeqassallutik 8,32 m2-iusumik, taamaalillunilu sanaartugassat tamakkerlugit 320 m2-iussallutik. Inissiamut isaarissami salliarnartaqassaaq, tassanngaanniillu illup teknikkeqarfianukartoqarsinnaassalluni. Illut aserfallatsaaliuminartunik saqqaqassapput.

Annertunerusumik paasisaqarusunnermi Ineqarnermut, Attaveqaasersuutinut Isorliunerusunullu Naalakkersuisoqarfik attaveqarfigineqassaaq, uunga box909@nanoq.gl