AtuartigukKapisillit eqqaanni kapisilinniartoqarsinnaasoq aatsaat akuersissuteqarluni
Nassiussisuuvoq: Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik
Kalaallit Nunaanni Aalisarnermut Piniarnermullu Nakkutilliisoqarfiup eqqaasissutigivaa Kapisillit eqqaanni kapisilinniartoqarsinnaammat, sumiiffimmi tassani kapisilinniarnissamut aatsaat akuersissuteqarluni.
Aalisarnermut, Piniarnermut, Nunalerinermut Imminullu Pilersornermut akuersissummik qinnuteqartoqarsinnaavoq. Qinnuteqartoq Kalaallit Nunanni inuit allattorsimaffiannut nalunaarsimassaaq kapisilinniarnissamullu akuersissuteqarluni.
Kapisillit eqqaanni Kalallit Nunaanni najugallit kapisilinniarnissaannut pisinnaatinneqarput, pisarineqartut nammineq pissatut pineqartassallutik.
Kapisilinniarnissamut maleruagassat Namminersorlutik Oqartussat kapisilinniarneq pillugu nalunaarutaanni, kapitali 4 § 12-mi, Nalunaarutit.gl-imi atuarneqarsinnaapput.
Eqqaamaneqassaaq kapisilinniarnerit tamaasa pisaqarsimanngikkaluarluniluunniit KANUAPNA-mut nalunaarutigineqartassammata. Pisaqarsimanani nalunaarutiginninnerup ilanngunneqarnissaa pingaaruteqarpoq, nalunaarsuinermut ilanngunneqartarmat.
Kapisilinnik pisaqarsimatilluni nalunaarsueriaaseq Sullissivimmi atuarneqarsinnaavoq: “Kapisilittatit nalunaarutigikkit”.
Paasissutissanik amerlanerusunik piniaruit Kalaallit Nunaanni Aalisarnermut Piniarnermullu Nakkutilliisoqarfimmut uunga allalluni gflk@nanoq.gl pisoqarsinnaavoq, uungaluunniit sianerluni: 34 50 00