Nakkutilliisoqarfik ull. 22. august 2025-mi ataatsimiippoq

Ataatsimiinnermi Kommuneqarfik Sermersuumi inissianut suliarisamut atatillugu Ineqarnermut, Attaveqaasersuutinut Isorliunerusunullu Naalakkersuisoqarfimmit ilisimatitsissut oqaluuserineqarpoq.

Nakkutilliisoqarfiup aalajangiuppai:

• Ineqarnermut Naalakkersuisoqarfimmit ilisimatitsissut Nakkutilliisoqarfiup tusaatissatut tiguaa.
• Inatsisaasuni pisarialittut tunngaveqartitsinani Kommuneqarfik Sermersuup pisuni amerlasuuni inissianik aningaasaliinissamut taarsigassarsianik suliatigut isumagalugillu akuerinnittarsimanera Nakkutilliisoqarfiup isornartorsiorpaa. Taarsigassarsianut qinnuteqaatit arfineq-marluk suliarineranni atortussat kommunip akuersineranut tunngaviusut amigaateqarsimapput, imaluunniit kukkunertaqarsimallutik.
• Naak kommune kisimiilluni 20 %-it tikillugit aningaasaliinissamut toqqammaveqaraluni sanaartornissamut aningaasartuutini katillugit 40 %-inut assingusunik inissianut aningaasaliinissamut taarsigassarsianik pisuni marlunni Kommuneqarfik Sermersuup akuerinnissimanera Nakkutilliisoqarfiup isornartorsiorpaa.
• Inissianik pilersuinermut naleqqiullugu siunertanut allanut inissianut aningaasaliinissamut taarsigassarsianik pissarsiaqarsimasunik inissialiornernik marlunnik Kommuneqarfik Sermersuup atugaqarsimanera Nakkutilliisoqarfiup isornartorsiorpaa.
• Pissutsit inatsisinik unioqqutitsisut taakku iluasiiviginissaannut naleqqiullugu Kommuneqarfik Sermersuup suleqatigiinnikkusunnermik takutitaqarsimanera nakkutilliisoqarfiup nalunaarpaa.
• Sulisartunik piginnaasalinnik amigaateqarnerup nassatarisaanik kommunit sulianik isumaginnittarnerisa ajugaaffigisassartaqarnerat Nakkutilliisoqarfiup oqaatigaa.
• ‘Inissianik suliarisamik’ suliaqarnerup naammassineqarnera Nakkutilliisoqarfiup inerniliissutigaa.
  
  

Nakkutilliisoqarfiup Siulittaasua imatut oqaaseqarpoq:

“Kommuneqarfik Sermersuumi inissianik suliaqarneq tassaasimavoq Nakkutilliisoqarfiup suliarisimasaani qaqugukkulluunniit annertunerpaarpaajusoq. Inatsisaasunik kommunip pisuni arlalinni unioqqutitsisimanera ilungersunartuullunilu isorisassaavoq. Kukkussutit taama ittut pisortaqarfiusunut tatiginninnermik sanngiillisaapput, tamannalu peqqissanngilaq.

Suliarisaq paasiuminaallunilu piffissaajarnartuusimavoq, taamaalisukkulli nakkutilliisoqarfiup inissisimaffigisaata qanoq pingaaruteqartigineranik takutitsivoq, aammalu inatsisinik unioqqutitsisoqarnerani taamatut qisuariartoqartariaqarnermik takutitsilluni. Nakkutilliisarneq nukittooq inatsisilerinerup isumannaatsuutinneranik nukittorsaaqataavoq.

Suliaq tamanna kommunimut, inuiaqatigiinnut tamarmiusunut, minnerunngitsumillu innuttaasunut assut pingaaruteqarsimavoq. Aningaasat amerlaqisut atorneqarsimapput, suliarisallu nassatarisaanik inatsisaasut allanngortinneqarsimapput.

Suliaq maannakkut naammassivoq, taamaalillunilu ingerlatamut sivisuumut paasiuminaatsumullu naggasiisoqarpoq.”

Nakkutilliisoqarfiup ataatsimiinnerani tulliuttut peqataapput:

Sólja Ì Ólavsstovu, Nakkutilliisoqarfimmi siulittaasoq.
Ane Hansen
Evelyn Mølgaard
Carsten Olesen
Niels Kristensen

Annertunerusumik paasisaqarusukkuit saaffiginnissinnaavutit uunga immikkoortortaqarfimmut pisortaq Brandur F. Karlsson brka@nanoq.gl