AtuartigukUmiatsiaaqqanut 11-nut atortuinullu 2025-mi tapiisoqarpoq
Nassiussisuuvoq: Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik
Aalisarnermut, Piniarnermut, Nunalerinermut Imminullu Pilersornermut Naalakkersuisoqarfiup umiatsiaarartaarniarlutik 2025-mi qinnuteqartut sullippai.
Umiatsiaaqqanut 11-nut atortuinullu (umiatsiaaqqat 6 meterinik takinerunngitsut) tapiisoqarpoq, matumani isumannaallisaanermut atortut piumasarineqartut ilanngunneqarput. Umiatsiaaqqanik tapiiffigineqartut ilaatigut tassaapput ukunani najugaqartut: Savissivik, Qaanaaq, Tasiilaq, Sermiligaaq aamma Tiniteqilaaq.
Umiatsiaaqqanut atortuinullu tapiisarnerup siunertaa tassaavoq piniarnissamut periarfissaqartitsisoqassammat sumiiffinnilu aalisarnermik inuussutissarsiuteqarpallaanngiffiusuni, allanik suliffiusinnaasunik periarfissaqarpallaanngitsunut tapiissuteqarneq. Umiatsiaaqqanut inuussutissarsiutitut atorneqartussanik salliutitsilluni tapiissuteqarnermi pingaaruteqarpoq sumiiffinnut aalisariuteqarpallaanngiffiusuni tapiissuteqassalluni.
Inatsisartut inatsisiliaatigut siunertarineqartoq tassaavoq aalisarnermik piniarnermillu inuussutissarsiutit sunniuteqarluartut unammillersinnaasullu siunissaq ungasinnerusoq isigalugu suliffissaqartitsisinnaasut siuarsarnissaat suliniutitigut ungasinnerusoq isigalugu inooqatigiit aningaasarsiornerannut iluaqutaasinnaasutigut.
Ataatsimut nalilersuisoqareertillugu umiatsiaaqqanik inuussutissarsiutigineqartussanik tapiissuteqartoqartarpoq, inatsit tunngavigalugu salliutitsiniartoqartarpoq aningaasanut inatsimmi aningaasaliissutigineqartut aamma tunngavigineqartarlutik.
Qaanaami, Tunumi aamma Kujataani, Paamiunit kujasinnerusumik najugallit immikkut isiginiarneqartarput, tamaani najugaqartut, inuussutissarsiutinit isertitaat ikinnerusartut takuneqarsinnaavoq, umiatsiaarartaarniarlutik qinnuteqartut 84 procentinik tapiiffigineqarsinnaapput. Nunatta sinnerani qinnuteqartut 75 procentinnik tapiiffigineqarsinnaasut. Tamakkiisumik tapiiffigineqarnissamut periarfissaqartitsisoqanngilaq, taamaattumik qinnuteqartup umiatsiaaqqap, taassumalu atortui nammineerluni sinnera akilertussaavai.
Inuussutissarsiutinut siuarsaanermut 2025-mi aningaasaliissutigineqartut 2.884.000 koruuniupput. Umiatsiaarartaarniarlutik 2025-mi qinnuteqartut 20-upput, taakkunanit 11-t tapiiffigineqarlutik. Aningaasanut inatsimmi aningaasaliissutigineqartut tunngavigalugit tapiiffigineqarlutik. Ukunani najugaqartut tapiiffigineqarput:
| Sumiiffik | Amerlassusaat |
| Qaanaaq | 1 |
| Savissivik | 1 |
| Aappilattoq Avannaa | 1 |
| Upernavik | 1 |
| Maniitsoq | 1 |
| Arsuk | 1 |
| Sermiligaaq | 3 |
| Tasiilaq | 1 |
| Tiniteqilaaq | 1 |
| Katillugit | 11 |
Taamaalilluni umiatsiaarartaartut 8-t 84 procentinik tapiiffigineqarput, pingasut 75 procentinik tapiiffigineqarlutik. Umiatsiaaqqat atortussaat ilanngunneqartarput.
Paasissutissanik amerlanerusunik perusukkuit, uunga allassaatit: apn@nanoq.gl.