AtuartigukDanskit naalakkersuisui nunatsinni politiinut eqqartuussiveqarnermullu 850 million koruunit sinnerlugit tapiissuteqarniarpoq.
Nassiussisuuvoq: Inuutissarsiornermut, Nukissiutinut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik
Qallunaat inatsiseqarnermut ministeriat, Peter Hummelgaard, Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoq Naaja H. Nathanielsen peqatigalugu qallunaat naalakkersuisuisa Kalaallit Nunaanni inatsisit atuutsinneqarnerannut suliassaqarfimmut piffissamut 2026-imiit 2030 ilanngullugu 850 mio. koruuninik patajaallisaanissamik pilersaaruteqarnerat pillugu tusagassiortunut katersortitseqqammerpoq.
Naalakkersuisoq Naaja H. Nathanielsen ima oqaaseqarpoq:
”Inatsiseqarnermut tunngasunut sammivissat politikkikkut aalajangersarneqarnissaannut Inatsisartut Naalakkersuisullu akisussaasuupput aamma akisussaaffik taanna pimoorunneqartupilussuuvoq. Kisianni akisussaaffimmut sinaakkusiussat suli qallunaat naalakkersuisuisa pisussaaffigaat aamma taamaammat qallunaat qanoq pingaarnersiuinerat tassunga apeqqutaasarpoq. Taamaammat killiliussat nutarterneqarnissaat pillugit kalaallit ilanngussaannut kissaataannullu ukiuni kingullerni tusarnaartoqarnera uanga nuannaarutigisorujussuuara. Timitalersuinernut inatsisiliornermullu tunngasortai. Tassami tamakku pisariaqartinneqarput aamma pisariaqartitsineq sivisoorujussuarmik atuussimavoq”.
Immikkut suliniutip ilaatigut politiini inuup ataatsip ukiumut suliarisinnaasaasa naatsorsorneqarneri amerlisissavai aamma politiit atortussanik nutaanik pilersussavai aamma eqqartuussiviit qarasaasiarsornikkut ikorfartorneqarnerisigut, Danmarkimi eqqartuussiviit killiffiinut kivissallugit.
”Politiini atorfiit akuerisaasut amerlineqarnerat nuannersorujussuuvoq. Inuiaat inatsisitigut illersugaanerannut tatiginninneq attatiinnarneqassappat, suliassaminnik suliarinninnissaminnut isumalluutinik pisariaqartinneqartunik peqarnissaat atorluaasinnaanissaallu pingaaruteqarpoq. Politiini nutaanik inuup ataatsip ukiumut suliarisinnaasaasa naatsorsorneqarnerisa amerlineqarnerisa ukiuni tulliuttuni piviusunngortinneqarnissaat, aamma nunami tamarmi sulilernissaat qilanaaraarput. Eqqartuussiviit nutarteriffigineqarnerat pisariaqarluinnarpoq. Tamatsinnut tamanna iluaqutaassaaq, massakkullu qarasaasiarsornikkut ikorfartuinerit pitsaanerusut pisussanngormata, pingaartumik suliassaqarfimmi ulluinnarni sulisunut tamanna iluaqutaassalluni”.
Inatsiseqarnermut ministereqarfimmit tusagassiorfinnut nalunaarummut linki
Paasissutissat sukumiinerusut pissarsiariniaraanni Bibi Nathansen attaveqarfigineqarsinnaavoq, e-mail: bina@nanoq.gl
Inuussutissarsiornermut, Aatsitassanut, Nukissiutinut, Inatsisit atuutinneqarnerannut aamma Naligiissitaanermut Naalakkersuisoqarfik. Email: isiin@nanoq.gl, oqarasuaat +299 34 50 00.