Danmarkimi nunap immikkoortuinit aallartitanik pulaartoqarneq - Peqqinnissamut suliassaqarfimmut tunngasut pillugit suleqatigiinnissamik ukkatarinninneq

Peqqissutsimut inunnullu Innarluutilinnut Naalakkersuisoqarfimmit ulluni 11. – 13. aggustimi Danmarkimi nunap immikkoortuini (Danske Regioner) aallartitat aqutsisut sisamaasut tikilluaqquneqarput. Nunatsinni peqqissutsimut tunngatillugu paasisaqarniarlutik taamatullu suleqatigiilluarniarlutik pulaarput. Tamatumani Peqqissutsimut inunnullu Innarluutilinnut Naalakkersuisoqarfik pulaartunut qaaqqusisuuvoq, tassanilu peqqissutsimut neqeroorutit kiisalu Kalaallit Nunaanni Peqqinnissaqarfimmi unammillernartut pillugit sammisassatut ukkatarineqarlutik.

Aallartitallu ukuusut Charlotte Rosenkrantz Josefsen, Region Midtjylland, Søren Pihlkjær Hjortshøj, Region Nordjylland, Martin Magelund Rasmussen, Region Sjælland aamma Erik Jylling, Region Hovedstaden, Peqqissutsimut inunnullu Innarluutilinnut Naalakkersuisoqarfik, Nunatsinni Nakorsaaneqarfik aammalu Kalaallit Nunaanni Peqqinnissaqarfik Atammimmi, Maniitsumi Nuummilu pulaarneqarput.

Nunatsinni peqqinnissaqarfimmi unammillernartut atugassarititallu immikkut illuinnartut – uani nunap isorartunera, peqqinnissaqarfimmilu sulisoqarniarnerup unammillernartui, Danmarkimi nunap immikkoortuinit pulaartut paasisaqarfigaat. Tassanilu peqqinnissaqarfimmi sulisut nunap isorartunera akimorlugu ataqatigiissaartumik aaqqissuulluakkamik pisariusumik sinaakkuteqartumik sulilluartarnerat paasisaqarfigaattaaq.

Pulaarnermi qitiusumik sammisat suleqatigiinneq misilittakkanillu paarlaaqatigiinnermut tunngasut eqqartorneqarput, uani nakorsat kigutilerisut, peqqinnissakkut neqeroorutit, katsorsaanerit misissuinerillu, qarasaasiakkut nakorsianut nalunaarsuiffik, aamma taakkunannga tarnikkut nappaatilinnik sullissineq, peqqinnissaqarfimmi sulisunut paarlaasarnermut aaqqissuussisarnerit kiisalu sulilersitsineq inuttassarsiornerlu nutarsarneqarnissaat.

“Nuannaangaarpunga Danmarkimi nunap immikkoortuinit aallartitat Kalaallit Nunaanni Peqqinnissaqarfik pillugu soqutiginnillutillu tunniusimammata. Maani nunatsinni atugassarititat immikkut ittut aammalu unammillernertut pillugit piumassuseqarlutik paasisaqarusunnerat kajuminnarlunilu pingaaruteqarpoq. Suleqatigiinneq naalakkersuisooqatigiinnissamik isumaqatigiissummiittunut iluarsiissutaasinnaasunut ataqatigiissaarisunik ujarlerluta ikioqatigiissaagut, ataatsimullu innuttaasunut iluaqutaasinnaasunik pitsanngorsaanissatsinnut qilanaarpunga” taama oqarpoq Peqqissutsimut inunnullu Innarluutilinnut Naalakkersuisoq, Anna Wangenheim.


Danmarkimi nunat immikkoortuinit ataatsimut oqaaseqaat
Peqataasut pulaarnerminni pissarsiaqangaatsiarsimallutik aammalu nunatsinni nakorsianut iluaqutaasumik suleqatigiilluarnissamik toqqammavimmik pilersitsilluartoq naapinnerup naammassilernerani paasissutissiipput.

Suliap ingerlaqqinnera
Pulaarnerup Nunarput Danmarkimilu nunap immikkoortuisa akornanni suleqatigiinnerulernermik aallartitsisoq takutippaa. Piffissami aggersumi ilaatigut suliassaqarfiit uku suliarineqassapput:

• Tarnikkut nappaatilinnik sullissinerup iluani suliat immikkut ittut sulisoqarnikkullu unammillernartut pillugit suleqatigiinneq.
• Nuup avataani kigutileriffinni kigutilerisunik sulisussarsiornerit pillugit suleqatigiinneq.
• Nakorsanik aammalu nunap immikkoortuini napparsimmavinni peqqissaavinnilu, uani paarlaaqatigiittarnermi, sulilertussat pillugit suleqatigiinneq.
• Suliassaqarfinnik aalajangersimasunut tunngassuteqartut pillugit suleqatigiinneq.
• Qarasaasiakkut nakorsianut nalunaarsuiffinnik assigiinngitsunik misilittakkanik ineriartortitsinerit pillugit suleqatigiinneq.

Peqqissutsimut inunnullu Innarluutilinnut Naalakkersuisoqarfiup Danmarkimi nunap immikkoortui tunniusimallutik suleqatigiinnissamullu qilanaartunut qujavoq.

Paasissutissanik sukumiinerusunik pissarserusukkuit Naalakkersuisoqarfimmi pisortaagallartoq Martin Pedersen uunga attaveqarsinnaavutit e-mail: mrpd@nanoq.gl imal. oqa.: +299 34 66 18