Folketingimi kalaallit nunaannut attuumassuteqartumut ataatsimiititaliaq peqqissutsimut politikkikkut suliaqarnermi pingaarnersiuineq pillugu saqqummiiffigineqarpoq

Peqqissutsimut inunnullu Innarluutilinnut Naalakkersuisoq, Anna Wangenheim, sapaatip akunnerani uani Folketingimi (Grønlandsudvalg) kalaallit nunaanut attuumassuteqartumut ataatsimiititaliaa naapippaa, peqqissutsimut politikkikkut suliaqarnermi pingaarnersiuineq pillugu saqqummiiffigalugu.

Ataatsimiinnermi ersarissarneqarpoq Kalaallit Nunaat namminerisamik peqqinnissamut suliaqarnermi anguniagaqartoq: Napparsimasut pisinnaatitaaffiannik qaffassaaneq, pinaveersaartitsineq pitsaanerusoq, ineriartortitsinissamut nukittunerusumik tunngavissaqarneq. Immikkut maluginiaqquneqarpoq Kalaallit Nunaat ukiumut 140 mio.kr. Danmarkimut akiliutigisarmassuk, peqqissutsimut passunneqarnissamut. Akiliutigineqartartup ilaannaa tapiissutitut utertinneqartarpoq. Tassunga atatillugu innarluutilinnut suliassaqarfiup aningaasartuutigisartagai, minnerpaamik 100 mio.kr.-miit annikinnerunngitsumik ukiumut Danmarkimut nunatta karsia akiliuteqartarpoq, tassa imaappoq nunatsinni pisariaqartitsinerup aallaavigisaanik, passunneqarsinnaan-nginnerup peqqutigisaanik.

“Kissaatigaarput ataavartumik pilersaarusiorluakkamillu aningaasaleeqataanerit piviusumik pisariaqartitavut aallaavigisaanik pisinnaassasut. Ikiorsiissutituungitsoq, naalagaaffiulli ataatsimoortup akisussaaqataaneratigut. Piffissami sivitsortumi akisussaaffik tamakkiisoq aningaasatigullu amigartumik kivinniarsarisimavarput, tamannalu napparsimasortatta pisinnaatitaaffiannik kalluaalersimavoq”, Anna Wangenheim oqarpoq.

Ukioq manna 2025-mi kontomik immikkut pilersitsisoqarpoq, tassuunakkullu Danskit aningaasatigut tapiissutaat 35 mio.kr. ukiuni 2025-miit 2028-mut nakorsaatinut atuinermut, Rigshospitalimi napparsimasut unnuisarfissaanut inissanut, isinut katsorsaaneq aamma Danmarkimi timikkut nappaateqarnermi katsorsartinnissamut atorneqarnissaat naatsorsuutigineqarpoq.

Naalakkersuisut peqqissutsimut suliassaqarfiit arlaqartut akisussaaffigilissallugit sulissutigaat, tassaasut naartuersittarnermut inatsit, toqusunik misissuineq, kinguaassiorsinnaajunnaarsitsineq, naqissuserumallugulu danskit oqartussaasuinik oqaloqateqarnissap pingaaruteqassusaa anguniagaq tassaasoq tigussaasumik innuttaasunut sunniuteqartussamik suliniuteqartoqarnera siunertaammat.