Naalakkersuisut akuersaangillat: Peqqissutsimut suliaqartut ilinniagaat ataqqineqassooq - atornerlunneqarnani

Naalakkersuisut PPK-p isumaqatigiissutissaat nutaaq suliarineqarnerata maannamut killiffia paasivaat ataqqillugulu, taamaattorli Peqqissutsimut Inunnullu Innarluutilinnut Naalakkersuisoq, Anna Wangenheim aammalu Aningaasaqarnermut Akileraartarnermullu Naalakkersuisoq, Múte Bourup Egede pisariaqartumik maluginiaqquaat, peqqissutsimut suliaqartunut oqalutsitut sulisinneqarnissaanik oqariartorneq sakkortuumik akuersaangilaat, pingaartumik aningaasatigut tapitaqanngitsumik.

Naalakkersuisut naqissuserumavaat, peqqissutsimut suliaqartut ilinniagaat aallaavigalugu sulinerat ataqqineqassasoq, taamannalu politikkikkut taperserumavaat malitsigisaanilu akuersaarnagu qaavatigut aningaasatigut taperneqanngitsumik piumasaqaatinngortinniarneqassappat oqalutsitut sulisinneqassappata.

“Peqqissutsimut suliaqartut oqalutsiunngillat. Qaavatigut nammakkersorneqassanngillat kalaallisut oqaaseqartuunertik peqqutigisaanik. Tamanna naapertuutinngilaq aammalu ilinniarsimassutsip aqqani illersorneqarsinnaanani,” Anna Wangenheim oqarpoq.

“Politikkikkut anguniagaqarpugut najukkami sumiiffimmilu sulisorisanut atugassarititaasut pitsaanerunissaat. Tamanna aamma oqaatsitigut naligiimmik inissisimatitsinermi aammalu sulisorisat suliassaanut attuumassuteqartumik,” Múte Bourup Egede oqarpoq.

Naalakkersuisut isumaqatiginninniarnerit ataqqinnittumik malinnaaffigivaat, ilaasortallu maanna qisuariaataannik, oqariartuutaannik aammalu taasinissaanut killiffigisaat tusarnaarlugillu ataqqillugit.

Naalakkersuisut politikkikut pingaarnersiuinermi pingaartitaat naqissuserumavaat: Peqqinnissaqarfik oqimaaqqatigiissumik attanneqarsinnaasumillu inissisimanissaa qulakkiisallugu, toqqissisimanartunik naapertuilluartunillu atugassaqartitsisoq pikkorissunillu sulisoqartoq.