Immikkut ilisimasalinnik suleqatigiissitaq soraarnerussutisiaqartitsinermut aaqqissuussaq isumaginninnikkut oqimaaqatigiittoq siunissamut isumannaagaq anguniarlugu ilusiliinernik siunnersuusiussaaq

Naalakkersuisut avataanit immikkut ilisimasalinnik suleqatigiissitamik, namminersortut pisortallu soraarnerussutisiarititaat akimorlugit patajaatsumik ataqatigiittumillu soraarnerussutisiaqartitsinermik aaqqissuusseqqinnissamut kaammattuutinik suliaqartussamik pilersitsissapput. Suleqatigiissitap immikkut ilisimasalinnik inuttaqartup kaammattuutai 2026-mi saqqummiunneqassapput. Kaammattuutit 2026-mi naalakkersuinikkut isumaqatigiissuteqarnissamut tunngaviussapput

Kaammattuutit ataatsimut soraarnerussutisiaqartitsinermik aaqqissuusseqqinnermik suliaqarnermut atorneqassapput. Utoqqaat malunnaatilimmik amerleriartussaapput 2036-llu nalaani amerlanerpaassallutik, peqatigalugu sulisinnaasut 18-iniit 66-inut ukiullit amerlassusaat 2050 tikivillugu annertuumik appariartussaallutik. Inuiaqatigiit agguataarnerisa ineriartornerat inuiaqatigiit aningaasaqarnerannut immikkuullarissunik unammilligassaqartitsissapput.

”Naalakkersuisut kissaatigaat soraarnerussutisiaqartitsinermik aaqqissuussaq tamarmi ataatsimoortutut isigineqassasoq. Soraarnerussutisiaqartitsinermik aaqqissusseqqinneq suliarilluagaassaaq, minnerunngitsumik soraarnerussutisiaqartitsinermik aaqqissuussinerit tamaasa akimorlugit ataqatigiissalluni. Immikkut ilisimasalinnik suleqatigiissitamik pilersitsinikkut innuttaasut naalakkersuinermillu ingerlataqartut soraarnerussutisiaqartitsinermik aaqqissuusseqqinnerup sunik imaqarsinnaaneranik erseqqissumik paasisaqartillugillu, minnerunngitsumik soraarnerussutisiat qaffasissusaat ullumikkutut siunissamilu Nunatsinni attatiinnarnissaannut aningaasaqarnitta nammassinnaaneranut suut pisariaqartinneqarnersut.” Isumaginninnermut, Suliffeqarnermut, Nunamut Namminermut Avatangiisinullu Naalakkersuisoq, Bentiaraq Ottosen oqaaseqarpoq.

Aningaasaqarnermut Akileraartarnermullu Naalakkersuisoq, Múte B. Egede, tapersiivoq:
”Naalakkersuisut ersarissumik anguniagaqarput soraarnerussutisiaqartitsinermik aaqqissusseqqinnissap ingerlanneqarnissaa pisariaqartoq. Taamaattumik Naalakkersuisut periutsinik arfinilinnik pilersitsipput, immikkut ilisimasalinnik suleqatigiissitap sulinermini tunaartatut atugassaannik. Immikkut ilisimasalinnik suleqatigiissitap siunnersuuteqarnikkut utoqqalinersiat ajorseriarpallaartinnissaat pinngitsoorniarlugu taamaaliortoqarpoq, imaassinnaammammi aningaasaqarneq eqqarsaatigalugu naapertuunnerpaatut tamanna iliornerusoq. Periutsit ilaat tassaavoq utoqqalinersiat ajorseriarpallaartinneqassanngitsut. Utoqqalinersialittatsinnut taamaaliorsinnaanngilagut.”

“Naalakkersuisut isumaqarput pingaaruteqarluinnartoq, Nunaata aningaasaqarnera patajaatsunngortinniarlugu siunissamullu piareersarniarlugu qanoq iliortoqassanersoq arlaannaanulluunniit attuumassuteqanngitsumik misissueqqissaarnermik ingerlatsisoqassasoq. Naalakkersuisut qilanaarivaat immikkut ilisimasalinnik suleqatigiissitap kaammattuutaasa atuarnissaat, tamatumalu kingorna soraarnerussutisiaqartitsinermik aaqqissuusseqqinneq ataqatigiittoq akisussaassuseqartorlu suliarineqassasoq saqqummiunneqarlunilu”, Isumaginninnermut, Suliffeqarnermut, Nunamut Namminermut Avatangiisinullu Naalakkersuisoq, Bentiaraq Ottosen naggasiilluni oqaaseqarpoq.

Periutsit arfinillit immikkut ilisimasalinnik suleqatigiissitap sulinermini tunngavissai tassaapput:

1. Utoqqalinersiat ajorseriarpallaartinnissaat pinngitsoortinneqassaaq
2. Utoqqalinersiat pingaarnertut isertitakitsunut sammitinneqassapput
3. Soraarnerussutisiassanut nammineq ileqqaakkat qaffasinnerunissaat ukkatarineqassaaq
4. Sulineq suli pilerinartuussaaq
5. Innuttaasunut pisariitsoq paasiuminartorlu
6. Soraarnerussutisianut aaqqissuussap patajaatsuunissaa

Immikkut ilisimasalinnik suleqatigiissitap soraarnerussutisaqartitsinermik aaqqissuusseqqinnissamut kaammattuutai kingusinnerpaamik 2026-mi saqqummiunneqassasut naatsorsuutigineqarpoq.

Tamatuma saniatigut Naalakkersuisut allaffeqarfik qinnuigaa soraarnerussutisiaqalernissamut aaqqissuussinermut peqataasussaatitaaneq pillugu inatsisip iluarsarnissaanut alloriarnerit siulliit 2025-mi ukiakkut ataatsimiinnissamut piareersareeqqullugit.

Inatsisissatut siunnersuut isumaqassaaq, maannakkut aaqqissuussaq, ileqqaagaqarnissamut pisussaaffiit naammassineqanngitsut innuttaasut akileraartarnermut allagartaanni akileraarutit qaffannerisigut akilersorneqaqqusaasinnaanerat, 2026-mi 2027-milu unitsikkallarneqassasut.

Immikkut ilisimasalinnik suleqatigiissitap inatsimmut, soraarnerussutisiaqalernissamut aaqqissuussinermut peqataasussaatitaaneq pillugu inatsisup naleqqussarnissaanut pisariaqartitat takuneqarsinnaalerpata, allannguutissatut siunnersuummik ataatsimoortumik saqqummiussissasut naatsorsuutigineqarpoq.

Attaveqarfissaq 
Paasissutissat erseqqinnerusut pillugit naalakkersuisup allattaa Anders Samuelsen email ansa@nanoq.gl oqarasuaatilluunniit normua +299 345611 atorlugu attaveqarfigisinnaavat