Kalaallit Nunaat Nunavullu aalisarnermut tunngasumik atsioqatigiipput Paasinneqatigiinnissamut isumaqatigiissut

(Juulip 31-at 2025 – Nuuk, Kalaallit Nunaat)  Naalakkersuisoq Múte Bourup Egedep, Kalaallit Nunaanni Aningaasaqarnermut Akileraartarnermullu Naalakkersuisup, David Akeeagok, Nunavummi naalakkersuisuni Inuiaqatigiinnik Sullissinermut Naalakkersuisoq, Nunavut Tunngavik Inc.-imi (NTI) President Jeremy Tunraluk aamma Qikiqtani Inuit Associationimi (QIA) President Olayuk Akesuk Paasinneqatigiinnissamut isumaqatigiissummik (MOU) atsioqatigai, Kalaallit Nunaanni Nunavummilu aalisarnermi piujuartitsisumik siuarsaanissamut anguniakkat ataatsimoorussat suleqatigiissutigineruniarlugit.

MOU-mi uani tunngavigineqarpoq Kalaallit Nunaat Nunavullu akornanni isumaqatigiissut 2022-meersoq, 
piujuartitsilluni aalisarneq taperserniarlugu kiisalu nunat akornanni avatangiisinik, aningaasaqarnikkut inulerinikkullu pingaarnersiuinerit siuarsaaviginiarlugit suleqatigiinnermik nukittorsaataasussaq. Aalisarnermut tunngasunik aningaasaliinissamut tunniusimanissamuttaaq tunngavoq inuiaqatigiinnilu aningaasaqarnikkut ineriartornissaq siunertaralugu. 

Kingornussaqaqatigiinnikkut kiisalu Ikersuaq Davisimi Avannaatalu imartaani qangaaniit aalisaqatigiittarsimanikkut, nunat tamarmik marluk avatangiisitigut inulerinikkullu pisariaqartitat aningaasaqarnikkut periarfissaqartitsisut oqimaaqatigiinnissaannut piujuartitsisumik aalisarnissaq pingaartippaat.  Taakku anguniakkat anguniarlugit, Kalaallit Nunaat Nunavullu aalisarnermut ataatsimiititaliaannik pilersitsisoqassaaq, Kalaallit Nunaata Nunavullu naalakkersuisuinit, NTI-mit kiisalu QIA-mit sinniisoqartussamik. Taassuma ataatsimiititaliap oqaloqatigiinnerit, paasissutissanik avitseqatigiinnerit, aalisarnermut tassungalu attuumassuteqartunut  tunngasut suleqatigiilluni ataqatigiissassavaat.

“Aalisarneq Kalaallit Nunaanni kultureqarnikkut, inulerinikkut aningaasaqarnikkullu pingaarnerpaavoq. Aalisarnermik ingerlalluartumik ineriartortitsinissamut misilittakkatsinnik naggueqatitsinnut Nunavummeersunut ingerlatitseqqinnissarput kiisalu Nunatsinni Nunavummilu siuariartortitsinissamut suleqatigiilluarnissamut aaqqissuussinissaq qilanaarutigaavut. Kalaallit Nunaata Nunavullu akornanni aalisarneq pillugu manna isumaqatigiissut naggueqatigiit akornanni piujuartitsisumik aalisarnermik aqutsinermi suleqatigiikkusussuseqarnermik aalisarnermilu piujuartitsisumik ineriartortitsinermik suleqatigiinnermillu pilersitserusunnermik oqariartuuteqarpoq.” taama oqarpoq Naalakkersuisoq Múte Bourup Egede.
“Una isumaqatigiissut Nunavummi aalisarneq pillugu naggueqatitsinnik suleqateqarnitta annertusarnissaanik nutaamik tunngaviliivoq,” naalakkersuisoq Akeeagok oqarpoq. “Kalaallit Nunaanni aalisarnermut naleqqussarnikkut aalisartunut suliffeqarfinnullu minnerusunut periarfissiissaagut siunissamullu ungasissumut aningaasaqarnikkut ineriartortitsinissamut tunngavissiilluta. Taamatut aaqqissuussinikkut aningaasarsiorneq imaaneersuuneruleriartortissavarput, kalaallinut Nunavummiunullu iluaqutaasussanngorlugu.” 

“Kalaallit Nunaanni Nunavummilu Inuit ilaqutariinnut nerisassaqartitsiniarnermut kinguaariippassuarni imaq isumalluutigisarsimavaat. Ullumikkut, Nunavummi Inuit aamma suliffeqarfiit aalisarnermik suliaqartut Inuit pigisaat tamanna periuseq atorpaat. Immap imaanilu uumasut illersornissaat allanngutsaalinissaallu pingaaruteqarluinnarput, uagut Inuit siunissami ungasissumi ilaquttavut pilersorsinnaaniassagatsigit,” oqarpoq NTI-imi President Tunraluk. “Una paaseqatigiinnissamut isumaqatigiissut nunat tamalaat akornanni suleqatigiinnissamut alloriarneruvoq annertooq, Nunavummi Inuit aamma Kalaallit Nunaanni Nunavummilu naalakkersuisut suleqatigisavut peqatigalugit aalisarnikkut inerisaaqatigiinnissaq NTI-p qilanaarutigaa.”

“Qikiqtani Inuit Associationimut, Inuit piniarnermut, aalisarnermut katerittarnernullu peqataatitsinerulersitsiniarneq Inuit kulturiannik, nerisassaqarniarnerannik nerisarissaarniarnerannillu tammatsaaliineruvoq nukittorsaataallunilu, najugaqarfinnilu aningaasaqarnermik tapersiineq kulturitta tammatsaalinissaa pisariaqarluinnarpoq”, QIA-mi President Akesuk oqarpoq. “Aalisarneq Canadap avannaani pingaaruteqarluinnarpoq isumalluutissanik pilersuisuuvoq sumiiffinnilu suliffissaaleqiffiusuni suliffissaqartitsilluni Canadallu sinneranut sanilliullugu akit qaffasillutik, MOU-p Aalisarnermut tunngasup atsiorneratigut naggueqatigiit Kalaallit Nunaanniittut Nunavimmiittullu imaani sumiiffiit suleqatigiiffiginerulernissaannut periarfissaqarnerulersitsivoq, taakkumi kingumut ukiuni tusindtini peqatigisarsimaneranik oqaluttuassartaqarpugut.” 

Attaveqatigiittarfitsigut attavissaq:
Kathryn Devereaux 
Attaveqatigiinnermut aqutsisoq 
Inuiaqatigiinnik sullissinermut naalakkersuisoqarfik
Nunavummi naalakkersuisut
cs@gov.nu.ca

Katrine Kærgaard
Immikkoortortaqarfimmi Pisortaq, Aalisarnermut, Piniarnermut, Nunalerinermut, Imminullu Pilersornermut Naalakkersuisoqarfik
apn@nanoq.gl

Ivaluarjuk Merritt
Attaveqatigiinnermut pisortaaneq
Nunavut Tunngavik Inc. 
media@tunngavik.com

Karen Flaherty 
Pisortaaneq, Attaveqatigiinnermi periusissiat
Qikiqtani Inuit Association
kflaherty@qia.ca
(867) 975 - 8398