Naalakkersuisut nunat EU-mi ilaasortat aallartitaannut EU-milu ingerlatsivinni atorfilittanut nuimasunut arlalinnut tikeraartitsipput.
Nassiussisuuvoq: Nunanut Allanut Ilisimatusarnermullu Naalakkersuisoqarfik.jpg?cx=0.49&cy=0.69&cw=975&ch=415&hash=785FDB179C73F05659EFE74556CC5666)
Ulluni 24 – 27 juuli Naalakkersuisoq Ilulissani Nuummilu nunat EU-mi ilaasortat Bruxellesimi aalajangersimasumik aallartitaannut (EU-mut allartitaannut) kiisalu EU-mi ingerlatsivinni atorfilittanut nuimasunut tikeraartitsisuuvoq.
Tikeraarnissaq Danmarkip EU-mi siulittaasuuneranut atatillugu pilersaarusiorneqarpoq, tassanilu 2002-p kingorna EU-mut aallartitat (COREPER II) EU-milu ingerlatsivinni atorfilittat nuimasut danskit siulittaasuutitaqarnerannut atatillugu Kalaallit Nunaannut tikeraartarnerat ileqquuvoq. EU-p Kalaallillu Nunaata akornanni attaveqarnerup nukittorsarnissaa, Kalaallillu Nunaanni pissutsinik paasisaqarnissaq tikeraarnermi siunertarineqarpoq.
Tikeraat Nunanut allanut Ilisimatusarnermullu Naalakkersuisoq Vivian Motzfeldt naapippaat, taassumalu Kalaallit Nunaata EU-llu attaveqarnerata pingaarutaa immikkut erseqqissarlugulu, EU-mut Kalaallillu Nunaannut iluaqutaasumik nukittorsaanerunissamik suleqatigiinnermillu ineriartortitseqqinnissamik kissaateqarneq erseqqissarpaa.
” Danmarkip EU-mi siulittaasuunerani EU -mut allartitat EU-millu atorfilittat nuimasut arlallit Kalaallit Nunaannut aammaarlutik tikeraarnerat nuannaarutigaarput. Kalaallit Nunaata unammilligassaanik periarfissaanillu takutitsinissamut manna periarfissaavoq pingaarutilik.
Ukioq manna Unionimit aninitsinnit Kalaallit Nunaata EU-llu suleqatigiinnerannik ukiunik 40-nngortorsiorpugut. Piffissami tassani suleqatigiinnerput annertusiartorsimavoq, attaveqatigiinnerpullu ingerlaavartumik nalimmassarparput, taamaalilluta tamatsinnut iluaqutaasumik aaqqiissutinik nassaarsinnaaqqulluta. EU-mik suleqateqarnerup suli nukittorsaqqinnissaa qilanaaraarput, taamaalillutalu EU-p Kalaallillu Nunaata piffissami matumani unammilligassat ataatsimoorluta iliuuseqarfigisinnaassavagut” – Vivian Motzfeldt oqarpoq.
Tikeraarnermi angalaqatigiit Naalakkersuisut aatsitassanut nukissiuutinullu immikkoortuni pingaarnersiugaannik kiisalu Silap pissusaanik Ilisimatusarfik silaannaap pissusaata allanngoriartornerani unammilligassat saqqummiunneqarput. Tamatuma saniatigut angalaqatigiit Avannaata Kommunianik, Sulisitsisunik, Kalaallit Nunaanni EU-p allaffianik kiisalu Tusassimik, nalunaarasuartaaserinermut immikkoortumi pilersaarutiminik periusissiaminillu saqqummiussisumik naapitsipput. Taamattaaq angalaqatigiit Ilulissat Kangerluanni angalaarput, kingornalu Ilimanaq Kangiatalu Illorsua pulaarneqarput. Kingullertullu angalaqatigiit sillimaniarnermi politikikkut inissisimaneq pillugu Issittumi sakkutooqarfimmit Ejnar Mikkelsenimi ilisimatinneqarput.
Annertunerusumik paasisaqarusukkuit attavissaq: Naalakkersuisup allattaa Rosa Thorsen, rsth@nanoq.gl mobiltlf.: +299553303
Assitamut oqaasertassat:
“EU-mi nunat aallartitaasa atorfilittallu nuimasut Ilulissat kangianiittut, tassani ilaatigut silaannaap allanngoriartornerata kingunerisaanik Kalaallit Nunaanni unammilligassat ilisimatitsissutigineqarput.” Assiliisoq: Bent Petersen.