Sioorasaarineq pissusilunnerlu aaqqissisinnaanngilaq

Akuersaarneqarsinnaanngitsumik takornarissanut takornarialerisunullu sioorasaarisoqarlunilu nilliasoqarsimasorlu Naalakkersuisunut paasitinneqarput. Isumaqatigiinngittoqarsinnaavoq inissaqartinneqassaarlu, taamaakkaluartorli unnerluutiginninnerit, sioorasaarinerit sakkortusaarnerillu akuerineqarsinnaanngillat unitsinneqartariaqarlutillu.

Aningaasaliiffigingaatsiarsimasatsinni ulappuffiunerpaasumi pisariaqanngitsumik ajornartorsiutilersortoqarpoq.

Ilulissani ukiuni kingullerni takornarialerisunut ataasiakkaanut umiarsuaatileqatigiiffinnullu mattussillutillu akerliussutsimik takutitsisoqartarpoq. Taakkuali saniatigut aamma arlaleriarluni suliffeqarfinnut takornarissanut sullissisunut kiffartuussisuusumut sioorasaarisoqarneranik sakkortuumillu pissusilersortoqarneranillu unnerluutiginnittoqarpoq.

- Isumaqatigiinnginnerit oqallinnerillu immini ajunngillat inissaqartinneqartariaqarlutillu. Taamaakkaluartorli torersumik tamanna ingerlanneqartariaqarpoq. Sioorasaarinerit nilliallunilu pissusilersornerit akuerineqarsinnaanngillat. Pissusilersuutit taakkua tamatsinnut ajortumik kinguneqarsinnaapput, Inuussutissarsiornermut, Aatsitassanut, Nukssiutinut, Inatsisit Atuutsinneqarneranut Naligiissitaanermullu Naalakkersuisoq Naaja H. Nathanielsen oqarpoq.

Taanna nangippoq:

- Takornarialerinermik inuussutissarsiorneq avammut tunisassiorneruvoq,  nunarsuarmioqativullu suleqatigisinnaasariaqarpavut  – sioorasaarinikkulli akuerineqarsinnaanngitsumillu takutitsinikkut suleqatigiinneq pilersinneqarsinnaanngilaq. Tamanna unitsinneqartariaqarpoq, Avannaatalu Kommuniani borgmesteri ersarissumik oqariartuuteqartariaqarpoq takornarissat suliffeqarfiillu takornarialerisut tikilluaqqusaasut.

Naalakkersuisut ukiuni kingullerni takornarialerinermi inuussutissarsiorfik suliassaqarfittut nukittuutut inuiaqatigiinnullu imminut akilersinnaasutut inerisarniarsimavaat. Sulineq inuussutissarsiutillit Inatsisartullu akornanni ingerlanneqarsimavoq.

Suliaqarnerup kingunerisimavaa takornariaqarnerup iluani ukiunut qulinut pilersaarusiorneq, tassanilu ilaatigut anguniagaavoq takornariaqarneq inuiaqatigiinnut iluanaarutaanerpaasussatut suliarineqassasoq. Taassuma saniatigut attaveqaasersuinermut aningaasaliisoqangaatsiarsimavoq, takornariaqarnerullu sumiiffinnut naleqqussarneqarnissaa anguniarlugu inatsisit pisariaqartinneqartut atuutilersinneqarsimallutik.

Inuussutissarsiuteqarfiup iluani suliarineqarsimasut kinguneqanngitsuunngillat takornarialerinermiillu isaatitat ilaqutariinnut amerlasuunut malunnaateqarlutillu pingaaruteqalereerput. Ineriartornerlu tamanna Naalakkersuisunit attatiinnarusunneqarpoq, taamaattumik Naalakkersuisut Ilulissani takornarialerinerup iluani pissuserineqartut ernumanartorujussuartut isigaat.

Paasineqarpoq inuit attaveqaataanni takornarialerinerup takornarissanullu tunngatillugu aningaasaqarnermut attuumassusilinnik eqqunngitsunik siammarterisoqarsimasoq. Tamannalu pillugu Naaja H. Nathanielsen ima oqaaseqarpoq:

- Sukannersumik kaammattuutigerusuppara oqallinnermi oqaasiinnaat aallaaviginagit paasissutissat tunngavigineqassasut. Taamaattumik naqissuserniarpara Ilulissani takornarialerinermi ukiumut 1,9 milliardinik isertitaqartoqartarneranik oqaaseqarnerup ilumuunnginnera. Kisitsisit taakkua 2023-mut nunamut tamarmut attuumassuteqarput. Aammattaaq suliffeqarfiit nunap avataani inissisimasut akileraarutinut akiliinaveersaartarnerat oqaatigineqarpoq. Tamannalu Naalakkersuisunit ilisimaneqanngilaq.

Takornariaqarnermi suliarisat sumiiffinnut naleqqussarneqarnissaat Naalakkersuisut tamakkiisumik tapersersorpaat, takornariaqarnerlu pillugu inatsimmi nutaami akuerineqarsimasumi tamanna anguniakkatut aamma allassimallugu. Tassungalu tunngatillugu Naaja H. Nathanielsen ima oqarpoq: 

- Kikkulli sumiiffiimmeersuunersut ersarissarneqarnissaat pisariaqartinneqarsimavoq. Sumiiffimmi ingerlatsisoq tassaavoq ingerlatsisoq Kalaallit Nunaanni najugalik. Ingerlatsisup inuiaqatigiissusaa kommuniluunniit angerlarsimaffigisaa isigineqarneq ajorpoq. Kalaallit Nunaanni najugallit kikkulluunniit inuussutissarsiummik Kalaallit Nunaanni sumiluunniit ingerlatsisinnaapput, Naaja H. Nathanielsen oqarpoq.

Tamanna isumaqarpoq assersuutigalugu ingerlatsisoq Ilulissani najugalik Qasigiannguani takornarialerinermik ingerlatsisinnaasoq, aammalu ingerlatsisoq Qaqortumi najugalik Tasiilami takornarialerinermik ingerlatsisinnaasoq, tassungalu Naaja H. Nathanielsen ima oqarpoq:

- Inuussutissarsiorneq kommuninut minnernut aggorniarutsigu tamatsinnut ajoqutaassaaq. Eqqarsaatigilaarsiuk kommunerisap iluani taamaallaat ingerlatsisinnaagaanni tamanna aalisarnermut sanaartornermulluunniit qanoq inguneqassanersoq. Suna tamarmi unittuussagaluarpoq, Naalakkersuisullu tamanna politikkerinngilaat aamma politikkerilernavianngilaat. Nuna pitsaanerulersissagutsigu suleqatigiittariaqarpugut, Inuussutissarsiornermut, Aatsitassanut, Nukssiutinut, Inatsisit Atuutsinneqarneranut Naligiissitaanermullu Naalakkersuisoq, Naaja H. Nathanielsen, naggasiivoq.

Naalakkersuisut maluginiarsimavaat Avannata Kommuniani borgmesteri ingerlatsiviit aalajangersimasut taakkartorlugit akerliussutsimik takutitsinermut aggersaasimasoq. 

- Kommunip tamakkiisumik politikkia Borgmesterip sinnerpaa, akerliussutsimik takutitsinissamut aggersarneqarmat ersarittumik takutinneqarpoq Avannaata Kommunia takornarialerisut akuerisaasut akerliliineqartut naapinneqarsinnaallutik, pisortanit aaqqissugaanik. Tulluanngivippoq pisortaqarfimmit suliaqarneq ilungersuutigisamik ingerlatsinermullu akulerussilluni.

2025-mi umiarsuit takornariartaatit arlallit Ilulissiarnissaraluartik taamaatiinnarsimavaat, umiarsuillu takornariartaatit arlaqartut Ilulissiaratik allamukaannarsinnaanissartik eqqarsaatigaat.

2022-mi Ilulissat umiarsuarnit takornariartaatinit tikinneqarnerpaami 3-nngorpoq, 2024-milu 5-maattut inissisimalersimalluni.

Paasissutissat sukumiinerusut pissarsiariniaraanni Bibi Nathansen attaveqarfigineqarsinnaavoq, e-mail: bina@nanoq.gl

Inuussutissarsiornermut, Aatsitassanut, Nukissiutinut, Inatsisit atuutinneqarnerannut aamma Naligiissitaanermut Naalakkersuisoqarfik. Email: isiin@nanoq.gl, oqarasuaat +299 34 50 00.