Tarnikkut nappaatilinnik sullissineq pillugu allakkat ammasunut akissut

Naalakkersuisut Jens NapãtôK-p, Partii Naleraq ammasumik allagaqarnerat qujaffigerusuppaat kiisalu tarnikkut nappaatilinnik sullissinermi nukinnginnartumik inissisimaffiusumi ukkataqarnerannut. Naalakkersuisut tarnikkut nappaatilinnik susassaqarfik nukittorsarneqarnissaanik pisariaqartitsineq tamakkiisumik akuersaarpaat– siunissami qaninnerusumi ungasinnerusumilu.

Naalakkersuisut erseqqissallugu pingaartippaat, tarnip nakorsaanit misissorneqarsinnaanerup unitsinnissaa politikkikkut aalajangerneqarnikuunngimmat.

Taamaattoq tamanna unammillernartuusoq ilisimaneqarluarpoq, napparsimasut pinasuartumik pisariaqartitsinngitsut misissorneqarnissaannik utaqqisut amerlatsikkiartuinnarnerat. Tamanna ilaatigut napparsimasut nalilersorneqarnissamik pisariaqartitsisut imaluunniit kissaateqartut amerlanerulernerannik pissuteqarpoq, ilaatigullu tarnikkut napparsimasunut immikkoortortaqarfimmut sulisussarsiornermi ataavartumik unammillernartoqarnera pissutaavoq. Sulinngiffeqarnerup nalaani, soorlu massakkut aasaanerani sulinngiffeqarnermi amerlassutsit suli annerusumik eqqorneqarput, tamannalu unitsitsinani misissuinissamut utaqqisarneq sivitsorneqarneranik kinguneqartitsisarpoq.

Ajornartorsiut una nutaajunngilaq. § 37-apeqqummut nr. 042/2024 akissuteqarnermi ersarippoq, peqqinnissaqarfimmit pingaartinneqartoq pinasuartumik katsorsartariallit, napparsimasut unitsinneqarnissaminnik pisariaqartitsisut itigartinneqarsinnaanngitsut, tarnikkut nappaatillit pinerluuteqarsimasut kiisalu pinannginnerusumik tarnikkut napparsimasut taakkua salliunneqassasut. Tamanna isumaqarpoq, unitsitaallutik napparsimasunik itigartinneqarsinnaasut sivisunermik utaqqisariaqassasut.

Naalakkersuisut politikkikkut ataavartumik iluarsiisoqarnissaa akisussaaffigaat, erseqqissumittaaq oqaatigineqarpoq suliat maannatut ingerlaqqinnissaat periarfissaanngitsoq. Piviusumiippugut nutaami, tamannalu isumaqarpoq ataatsimoorluta aaqqiissutissanik nassaartariaqassasugut – minnerunngitsumik nunatta aningaasaqarnerata inissisimaffia pillugu. Taamaammat Naalakkersuisut iliuuseqarput, tassanilu peqqinnissaq pillugu isumaqatigiissut 2023-meersup killiffia pillugu partiit tamarmik oqallinnissamut qaaqquneqarlutik. Peqqinnissaq pillugu isumaqatigiissutip alliniarneqarnera aallartereerpoq, tarnikkullu nappaatilinnik sullissineq aamma inuit ersinngitsumik nappaatillik sammisani qitiusumik qulequtarineqassapput.

Nuna tamakkerlugu tarnikkut napparsimasunut ajoqusersimasunut passussisarfeqarnissaa Naalakkersuisooqatigiit sinaakkusiinissaq siunertaralugu siunnerfeqarput. Peqqissutsimut inunnullu Innarluutilinnut Naalakkersuisutut tarnikkut nappaatilinnut sullissisunik qanimut oqaloqateqarpunga, tassanilu piffissaq ungasinnerusoq eqqarsaatigalugu pilersaarusiornissaq aammalu atorfeqalertussat qitiutinneqarnissaat pisariaqarluinnartoq oqariartuutigineqarput.

Atorfinitsitsiniartarnermik, ilinniarnermik aammalu peqqissaasut piginnaanngorsarneqarnissaat pillugu Partii Naleqqap siunnersuuteqarnera ilassuteqarneralu pingaaruteqarpoq. Arlalitsigut periusissianut naapertuuppoq, tamannalu Naalakkersuisut sulissutigalugu aallartereerpaat. Pissutsit taakkorpiaat suliami peqqinnissaqarfiup siunissaa qulakkeerniarlugu qajannaatsuutinniarlugulu qitiutinneqarput– tassani timikkut tarnikkullu napparsimasunit atorluarneqarniassammata.

Naalakkersuisut peqqissutsikkut ilinniagaqarsimasunik sulisussarsiorneq aamma sulisoriinnarnissaannut anguniakkat nukittorsarnissaat sulissutigaat. Ilutigisaanik ataavartumik atorfeqarnissamut atugassarititaasut aaqqissuunneri pitsanngorsarnissaat, nunatsinnilu ilinniarsinnaanngornissamik periarfissat aammalu nunani allaneersunik suleqateqarneq, uani Danmarki – katsorsaaneq sulisussarsiornerlu eqqarsaatigalugit. Naalakkersuisut isumaqarput, nunat tamalaat suleqatigilluarsinnaaneri atorluarneqartariaqartoq, pingaartumik kalaallit napparsimasunut katsorsaanissaq nukittorsarniarneranut atatillugu.

Ukiut arlallit qaangiuppata tarnikkut napparsimasunut illorsuassaq naammassissaaq, tassanilu massakkut inissat 12-iliit 22-nut annertusinermik kinguneqassaaq. Ineriartorneq taanna tarnikkut napparsimasunut immikkoortortaqarfimmi ineriartortitsivoq aammalu qanoq nukittorsarneqarnissaa aqunneqarnissaalu pillugit politikkikkut sukumiisumik oqallittoqarnissaa pisariaqarpoq – suliassaqarfimmi, aningaasatigut aamma aaqqissuussaanermi. Taamaattumik pingaarnertut suliassanik suussusersinissaq, sulisut pisariaqartinneqartut aammalu suliassaqarfimmi piumasaqaatit qulakkeerneqarnissai pillugit massakkut politikkikkut periusissiorluni suliaqarneq aallartinneqarnissaa pingaaruteqarpoq, taamaalilluni atortut nutaat piujuartitsisumik pitsaassutsimillu atorneqarluarniassammata.
Peqqinnissaqarfiup siunissaa ataatsimut ineriartortinneqassaaq. Naalakkersuisut akisussaaffiit pingaartut tigunissaannut piareersimapput, neriuutigaallu partiit tamarmik tapersiilluarlutik kinguneqarluartumittaaq suleqataajumaartut.


Inussiarnersumik inuulluaqqusillunga

Anna Wangenheim
Peqqissutsimut inunnullu Innarluutilinnut Naalakkersuisoq