Kullorsuarmi, Qasigiannguani, Narsamilu inuusuttunut inissialiorneq

Ineqarnermut, Attaveqaasersuutinut, Isorliunerusunullu Naalakkersuisup Aqqaluaq B. Egedep nuannaarutigingaarlugu maanna paasissutissiissutigisinnaanngorpaa Kullorsuarmi, Qasigiannguani, Narsamilu inuusuttunut inissialiornissamut aningaasanik atugassanngortitsinissamik Naalakkersuisut noqqaassuteqarnerat Inatsisartut Aningaasaqarnermut Akileraartarnermullu Ataatsimiititaliaata akuersissutigimmagu.

Atortussat inniminneerneqarsinnaalerlutik, sanaartornissarlu aasaq manna aallartinneqarsinnaalersillugu akuersissuteqarnermi sanaartornermut akigititassat inaarutaasut isumaqatigiissutigineqarsinnaalerput. Inuusuttunut inissiassat 2026-p naanerani tunniunneqassangatinneqarlutillu atulissangatinneqarput.

Inoqarfinni pingasuni tamani neqeroortitsinermi najukkani sanaartugassanik suliassinneqartartut ajugaasuupput.

Ineqarnermut, Attaveqaasersuutinut, Isorliunerusunullu Naalakkersuisoq Aqqaluaq B. Egede ima oqaaseqarpoq:
”Inoqarfinni mikinerusuni inuusuttut pisariaqartitaannut naleqqussakkanik inissianik pisariaqartitsineq iliuuseqarfigissallugu, taamaalillunilu inuusuttut inersimasunngornerminni aalajaatsumik aallartinnissaminnut tunngavissinneqarnissaat inuusuttunut inissiassanut najoqqutassiap siunertaraa. Taamaattumik inuusuttut pisariaqartitaminnut naleqqussakkanik inissiartaarsinnaalersillugit, inuusuttut inissiassaannik amerlanerusunik sanaartornerit maanna aallartissinnaaleratsigit nuannaarutigaara.”

Kullorsuarmi inissiat marluk kuuffittaqanngitsunik perusuersartarfissallit, imermullu tankeqartussat sanaartorneqassapput.

Qasigiannguani inissiat pingasut, ukioq kaajallallugu imermik pilersorneqartussat, kuuffissuaqartussat, avataaniillu kiassarneqartussat sanaartorneqassapput.

Narsami inissiat sisamat kuuffissuaqartussat, naqitsinerlu atorlugu imeqartinneqartussat sanaartorneqassapput.

Inuusuttunut inissianut najoqqutassiaq pillugu
Inuusuttunut inissiat, assigiissaartutut najoqqutassami ilaatillugu, ineriartortinneqarput, tassani aallaavigineqarluni inissiat inoqarfinni minnerusuni sananeqarnissaat pisariitsuussasoq, aammalu piujuartitsinissaq pitsaassuseqartitsinissarlu pillugit pingaarnertigut takorluukkanut naapertuutissasoq, tassani aningaasaqarnerup, avatangiisit, silap pissusaata inooqatigiinnerullu oqimaaqatigiinnissaat eqqarsaatigineqarluni.

Suliassaq inuusuttup nammineerluni najugaqarnissamut ikiorneqarluni inersimasunngornissamut inuusuttup alloriarfissaatut eqqarsaatigineqarpoq. Iserternermi attartortussap inissinnialernermini aningaasartuutissai annikinnerpaaffimmiisinniarlugit, inuusuttup alloriarnissaa ajornannginnerulersinniarlugu inissiat tamarmik aamma assigiissaakkanik pequtilersugaassapput.

Inissiat ataatsimik initalittut inissiatut aaqqissuunneqassapput angissusaa tamakkerluni 45 m² missaanniissalluni, tassani isaariami torsuusap angisuup saniatigut errorfilimmik errorsivimmullu inissaqartillugu igaffik affarleqartillugu aaqqissuunneqassalluni. Igaffiup affarlianiit uffarfimmut/perusuersartarfimmut isertarfeqassaaq isersimaartarfeqassallunilu. Isersimaartarfimmiissapput igaffik nerinissamut inissaqarluni, isersimaartarfittut immikkoortumi sofaqarlunilu ikkami qarajarluusanngorlugu siniffiliaqassaaq siniffilerneqarsinnaasumik. Qerititsivimmut piniarnermullu atortunut, quimi tassunga atasumi inissinneqarsinnaasunik uninngasuutigineqarsinnaasunillu, inissaqartitsinissamik pisariaqartitsinissaq, ilanngullugu aamma eqqarsaatigineqarpoq.


Annertunerusumik paasisaqarusunnermi Ineqarnermut, Attaveqaasersuutinut, Isorliunerusunullu Naalakkersuisoqarfik attaveqarfigineqassaaq, uunga box909@nanoq.gl