Qimmitit aasaanerani isumagisassavatit

Qimusserfiusartoq qaangiukkaangat, qimmilittut qimmitit ullut tamaasa ukkatarissallugit eqqaamasariaqarpat, nerisillugit imerneqarnissat aamma isumagisarlugit, apulluunniit ipiitsoq imeritittassallugu.

Qimmit qimuttut aasaanerani qimunneq ajoramik nukinnik kissassimaarnissaminnut atuingaarneq ajorput, taamaattoq nerisittuarnissaat pisariaqarpoq, nerisaat inuussutissanik pisariaqartunik inuussutissaqartassallutik.

Qimmit nerukkarneqarneq ajortut saluttunngortarput. Qimmit saluttut nukeqannginnerusarput taamaalillutillu nukissaqannginnerulersarput, taamaattumik ajoquseqqajaanerusarput tusiannerulersarlutik. Ukiukkut qimuttussanngoraangamik napparsimaneroqqajaanerusarlutik.

Aasami siallertuartumi masannartuartumilu qimmit uunnassimaarniarlutik nukimmik atuisartorujussuupput, panernartillugu nukimmik atuivallaassanatik. Siallertuartumi masannartuartumilu qimmit nerisassaat naleqqussaaffigineqartariaqarput, amerlanerusunik nerisariaqarlutik. Qimmit siallerfigitittuaannaqqunagit oqquiffissaqartinneqartariaqarput.

Aput aatsillugu qimmilivik taseqqerpat masattuaannalerpalluunniit qimmit panertumiinnissaminnut periarfissinneqartarput.

Nalinginnaavoq qimmit arnavissat aasaanerani amerlasuunik piaqqiortarmata. Qimmit naartusut sarliartullu nukimmik atuinerusarmata nalinginnaasumit nerinerusarput, taamaattumik nerukkarluartarnissaat pisariaqarpoq; naartugineqartoq inerinnissaminut inuussutissanik pisariaqartitsinerusarmat piaqqisimagunilu immuliornermini nerinerusariaqarluni.

Nalinginnaavoq qimmeq sarliartoq nalinginnaasumit pingasoriaammik nerinerusarmat, qimmiaqqat amerlassusii tamatumani tunngaviusarlutik. Sarliartoq qimmiaqqallu akornusersorneqanngitsumi ineqarsinnaasariaqarput.

Qimmimik inersimasumik peqqissumik qimmeqarusukkaanni; qimmiaraasoq sapaatip akunnerini sisamanik qaammateqartillugu imerpalanngitsunik nerukkarneqalereertassaaq. Qimmiaqqat aamma qumaajarneqassapput. Qimmiaqqat taama pineqartut inersimasunngortarput pitsaasunik inerilluarsimasunik saaneqarlutik nukittuujullutik. Qumaajaatit TELE-DYRLÆGEN-imit pisiarineqarsinnaapput, tassaasoq qimmit qimuttunut telemedicinikkut aaqqissuussaq. Inniminniiniaruit uumasut@nanoq.gl-imut attaveqassaatit.

Qimmeqarneq pillugu paasissutissat itinerusumik uani atuarsinnaavatit

Apeqqutissat uunga ingerlatinneqassapput:
Kalaallit Nunaanni Uumasunut Nakorsaqarnermut Inuussutissalerinermullu Oqartussaqarfik
Noorlernut 4, st
3900 Nuuk
E-mail: uumasut@nanoq.gl
Telefon: 34 50 00