AtuartigukKalaallit Nunaanni marloriaammik qularnaveeqqusiisarneq atorunnaassaaq
Nassiussisuuvoq: Avatangiisinut Pinngortitamullu Naalakkersuisoqarfik
Kalaallit Nunaanni pisiniarfiit atuisullu imeruersaatit Danmarkimeersut puukuinik utertitsinissamut nalunaaqutsersimasunik pisigaangamik Danmarkimut Nunatsinnullu puukunik utertitsinissamut qularnaveeqqutinik tamanik akiliisarunnaassapput.
Kalaallit Nunaanni pisiniarfiit atuisullu imeruersaatinik Danmarkimeersunik utertitsinissamut nalunaaqutsersimasunik pisigaangamik Danmarkimut Nunatsinnullu puukunik utertitsinissamut qularnaveeqqutinik tamanik ullumikkut akiliisoqartarpoq. Tamanna maanna allanngortinneqassaaq. Ulloq 1. juuli imeruersaatit puuinik utertitsisarneq pillugu nalunaarutip allannguutissaa atuutilissaaq, taamaalilluni danskit suliffeqarfiutaat Dansk Retursystemimut utertoorutissanik noqqaassuteqarsinnaapput, utertitsinissamut nalunaaqutsersimasunik puunik ataasiagassanik Kalaallit Nunaannut nioqquteqarsimanertik uppernarsarsinnaagunikku. Taamaalillutik Nunatsinni pisiniarfiit atuisullu puukut utertitassat qularnaveeqqutaannik Danmarkimut akiliuteqartsinneqartarunnaassapput.
”Puukut utertitassat qularnaveeqqutaannik Danmarkimut akiliisarneq Nunatsinni pisiniarfinnut aamma atuisunut immikkut aningaasartuutaasarnera ajornartorsiutaasimavoq. Taamaattumik Naalakkersuisut suleqatigalugit pitsaasumik aaqqiissuteqarpugut, taamaalilluni Kalaallit Nunaanni imeruersaatinik Danmarkimi tunisassiarineqartunik tuniniaanermi imaluunniit pisinermi Danmarkimut Nunatsinnullu puukut utertitassat qularnaveeqqutaannik akiliisoqartarunnaassammat," Magnus Heunicke avatangiisinut ministeri oqarpoq.
"Nunatsinni namminerisamik utertitsisarnermut aaqqissuussineq 1. januar 2024-mi ingerlanneqalerpoq, Danmarkimi avatangiisinut ministeri suleqatigalugu aaqqiissuteqarnerput nuannaarutigaara, taamaalilluta suli imeruersaatit Danmarkimit eqqussisinnaavugut, kisianni puukut utertitassat qularnaveeqqutaannik Danmarkimut akiliisariaqarunnaarluta," Isumaginninnermut, Suliffeqarnermut, Nunami Namminermi Pissutsinut Avatangiisinullu Naalakkersuisoq Bentiaraq Ottosen oqarpoq.
Paasissutissat allat:
Danmark
Tusagassiuutilerisoq: Oqa. +45 20 91 59 01 (SMS-imik tigusaqarsinnaanngilaq). Maili: presse@mim.dk
Kalaallit Nunaat
Naalakkersuisumut allatsi, Anders Samuelsen, ansa@nanoq.gl
• Imeruersaatit puuinik utertitsisarneq pillugu nalunaarut ulloq 1. juli 2025-mi atuutilissaaq.
• Imeruersaatit puuinik utertitsisarneq pillugu nalunaarut Avatangiisinut Aqutsisoqarfimmit isumagineqartarpoq.
• Kalaallit Nunaanni imeruersaatit puuinik utertitsisarnermut aaqqissuussaq 1. januaari 2024 atuutsilersinneqarpoq.
• Dansk Retursystemimit Danmarkimi puunik utertitsisarnermut aaqqissuussineq ingerlanneqarpoq. Suliffeqarfiit imeruersaatinik danskit nioqqutaattut nalunaaqutsersimasunik nittarsaassigaangamik Dansk Retursystemimut siumoortumik puukunik utertitassat qularnaveeqqutaannik akiliisarput. Dansk Retursystemimit akilerallagaq akilerneqartarpoq, puukut imaqanngitsoq utertinneqaraangata. Puukullu imaqanngitsoq utertinneqanngippata, kisiannilu Nunatsinniiginnarpata, puukunut utertitassanut qularnaveeqqutitut akiliut Dansk Retursystemimi isertitarineqaannassaaq. Danmarkimi niuertarfissuit siumoortumik puukunik utertitassat qularnaveeqqummut akiliutertik utertissinnaanngikkaangamikku aningaasartuut Kalaallit Nunaanni imaluunniit Savalimmiuni eqqussisunut aningaasartuutinngortittarpaat. Naggataatigut atuisut aningaasartuutinut matussusiisarput.
• Malittarisassat nutaat atorlugit danskit suliffeqarfii Dansk Retursystemimut imeruersaatinut Danmarkimiit Nunatsinnut aamma Savalimmiunut anninneqartunut qularnaveeqqummut akiliutigisami utertinnissaannut noqqaassuteqarsinnaapput, nuna tamakkerlugu puukunik utertitsisarnermut aaqqiisuussamut ilaasunut.