Immikkut ilisimasallit misissuinerat kinguarpoq

Naartunaveersaatinik atuisitsineq pillugu suliami 1960-ikkunninngaanniit ullumikkumut ingerlasumi, inuit pisinnaatitaaffii pillugit isiginniffinnik immikkut ittumik ilisimasallit misissuisut, qaammatinik sisamanik, ulloq 31. januar 2026-ip tungaanut kinguartitsisoqarnissaa noqqaassutigisimavaat.

Immikkut ittumik ilisimasallit 2025-imi majimi suliap killiffiata qiteqqunnerani nalunaarusiaq tunniussimavaat, tassanilu kinguartitsisoqarnissaa pillugu noqqaassuteqarput. Atortussat tikinneqarsinnaannginnerinik kiisalu atortussat tikinneqarnissaannut utaqqineq kinguartitsinermut pissutaavoq.

Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoq Naaja H. Nathanielsen, ima oqaaseqarpoq:

”Misissuineq massakkut kinguaattoormat, soorunami uggornarpoq. Kisianni suliap peqqissaartumik suliarineqarnissaa, aamma immikkut ittumik ilisimasallit suliaminnik naammagisimaakkaminnik tunniussinissaat uannut pingaarneruvoq. Spiralilersuisimaneq pillugu kalaallit-qallunaallu arlaannaannulluunniit attuumassuteqanngitsumik qulaajaanerannit inerniliinernik immikkut ittumik ilisimasallit massakkut atuisinnaanerisa periarfissaalernera, kinguartitsinermi pitsaasumik saniatigut sunniutaavoq. Immikkut ittumik ilisimasallit, naak kinguaattoortoqaraluartoq, sulilluarnissaannik kissaappakka.”

Piviusut

• 1960-ikkunnit ullumikkumut naartunaveersaatinik atuisitsineq aamma naartunaveersaatilersuinerit allat pillugit sulisaatsini inuit pisinnaatitaaffii pillugit isiginniffiit pillugit immikkut ittumik ilisimasalinnit misissuisitsineq Naalakkersuisut aallartitissimavaat.
• Nunat tamat akornani akuerisaallutik immikkut ittumik ilisimasallit gruppiata, immikkut ilisimasalinnit misissuisitsinermik suliaqartup, inuttarai Dalee Sambo Dorough, Miriam Cullen, Jonas Christoffersen aamma Jensine Nedergaard.
• Immikkut ittumik ilisimasallit misissuinerisa nunarsuarmi tamarmi inuit pisinnaatitaaffiisa aamma nunap inoqqaavisa pisinnaatitaaffiisa innarlerneqarnerat pisimanersoq qulaajassavaat. Tamatuma saniatigut innarliinerit inuiannik toqoraanerup nassuiarneqarneranut naammassinninnersut nalilerneqassaaq.
• Ilisimatusartut gruppiannit, piffissami 1991-imiit 1960 ilanngullugu spiralilersuisimaneq pillugu arlaannaannulluunniit attuumassuteqanngitsumik qulaajaanermik suliaqartunit, attaveqanngitsumik immikkut ittumik ilisimasallit sulipput.
• Naartunaveersaatinik atuisitsineq pillugu ataatsimut isiginninneq, uani nassaarineqarsinnaavoq: www.naalakkersuisut.gl

Suliaq pillugu paasisaqarnerorusuttoqarpat, uunga saaffiginnittoqarsinnaavoq: asn@nanoq.gl