Kalaallit inuiattut ullorsiornerat Washington DC-milu pisortat nikinnerat ataatsimut ilassinninnermik annertuumik malunnartinneqarpoq

Ataasinngornermi ulloq 23. juni Kalaallit Inuiattut Ullorsiornerat Washington D.C.-milu Kalaallit Nunaata Sinniisoqarfiani pisortat nikinnerat persuarsiorluni ornigarneqarluartumillu nalliussineqarpoq, tamannalu Kalaallit Nunaata Sinniisoqarfianit danskillu USA-mi aallartitaqarfiannit ataatsimoorullugu aaqqissuunneqarpoq.

Immikkut qaaqqusat 200-nit amerlanerit – tassani Amerikami Kongressimi ilaasortat, aallartitaqarfiit sinniisaat, Amerikamiut naalakkersuisuini atorfilittat, eqqarsaqqissaartartut, tusagassiortut kiisalu Kunngikkormiutut Ataqqinassusillit Prins Joakim Prinsesse Marielu – Amerikap illoqarfiisa pingaarnersaani aasaanerani kiarujussuaraluartoq nalliussinermi peqataapput.

Inatsisartut Siulittaasuat, Kim Kielsen, Danmarkip aallartitaa Jesper Møller Sørensen, sinniisoqarfimmi pisortaajunnaartoq Kenneth Høegh sinniisoqarfimmilu pisortanngortoq Jacob Isbosethsen qaaqqusanik tikilluaqqusipput. Oqalugiarnerni inuiattut ullorsiortarnerup pingaarutaa erseqqissarneqarpoq, soorluttaaq Kalaallit Nunaata Atlantikup avannaani suleqatigiinnermi qitiusumik inissisimanera, ukiullu 80-t sinnerlugit USA-mut qanittutut tutsuinigartutullu suleqataasimanera erseqqissarneqarput.

Jacob Isbosethsenip periarfissaq atorlugu Kenneth Høeghip ukiuni kingullerni sisamangajanni Kalaallit Nunaata Washingtonimi sinniisoqarfiani pisortatut nukittuumik tunniusimasumillu sulisimaneranik qujassuteqarfigaa. Kalaallit Nunaata Sinniisoqarfiata 2014-mi pilersinneqarnera erseqqissaatigaa -tamannalu nunatta nunanut allanut politikimi inissisimanerata nukittorsarnerani pingaarutilimmik alloriarneruvoq. USA-p Nuummi generalkonsulateqarfia – 1940-mi ammaqqaartoq – 2020-mi ammaqqinnera, nutartikkamillu suleqatigiinnerup itinerusumik ingerlanneqarnissaanut illuatungeriit soqutiginninnerannik tamatuma takutitsinera tikkuarpaa. Piffissami kingullermi Amerikamiunit oqariartuutigineqartartunut tunngatillugu, Kalaallit Nunaata tuniniagaannginnera tiguneqartussaannginneralu, inuiaalli kalaallit tusarneqarnissamik naligiimmillu suleqatitut ataqqineqarnissamik kissaateqarnerat, nalliussinermi ilanngullugu erseqqissarneqarpoq. Siunissami suleqatigiinnerup ataqqeqatigiinnermik, naligiinnermik ammasumillu oqaloqatigiinnermik sanarfineqarnissaa – Kalaallillu Nunaatalu ataatsimut naleqartitanik soqutigisanillu toqqammaveqarluni nukittuumik piujuartitsisumillu USA-mik Danmarkimillu peqateqarnissaq suli kissaatigigaa, oqaaseqarnerni erseqqissarneqarpoq.

Pisoq Kalaallit Inuiattut Ullorsiornerattut Kalaallillu Nunaanni nunanut allanut sullissinermi kinguaariit nikinnerattuinnaq nalliussineqanngilaq, aammali Kalaallit Nunaata nunarsuarmi inissisimanerata annertusiartorneranut sakkortuumik tamanna oqariartorneruvoq. Kalaallit Nunaat erseqqissumik najuunnera pingaarutilittullu peqatigisanut USA-tut ittunut atassuteqatigiinnermi eqeersimaarnera, Issittup Atlantikullu avannaata nunarsuarmi politikikkut annertusisamik sammineqarnerani aatsaat taama pingaaruteqartigilerpoq. Washington D.C.-mi sinniisoqarfik politikikkut, aningaasaqarnikkut kultureqarnermillu suliaqarnermi qitiulluinnarpoq. Tamannalu piffissami Kalaallit Nunaata nunarsuarmi piffissami imaannaanngitsumi, annertuumik sammineqarfigisaani avataanillu sakkortuumik oqariartortarnerit nalaanni ingammik atuuppoq.

Ilassinninnermi kalaallit mamartuutaat Royal Greenlandip tunissutai sassaalliiutigineqarput, Uummannamilu meeqqat angerlarsimaffianneersut takkuttorpassuarnut kialaarnermik tiguartinnartumik nipilersorlutik aliikkusersuipput.

Ullormit assilisat aajs@nanoq.gl attavigalugu nassiunneqarsinnaapput.

Paasissutissat erseqqinnerusut pillugit uunga attaveqarit: Rebecca Lynge, Souschef, Kalaallit Nunaata Washington D.C.-mi Sinniisoqarfia +299 590432 | rejl@nanoq.gl