Kulturikkut nersornaat Miké Thomsenimut, kajumissaammullu nersornaat Malu Langemut

Ukioq manna kulturikkut nersornaat isiginnaartitsisartumut nipilersortartumullu Miké Thomsenimut tunniunneqarpoq, aammalu kajumissaaserneqarluni assilialiortartoq Malu Lange.

Ilinniartitaanermut, Kultureqarnermut, TImersornermut Ilageeqarnermullu Naalakkersuisoq Nivi Olsen Katuami nersornaatit Inuiattut Ullorsiorfimmi juunip 21-ani 2025 tunniuppai.

Miké Thomsen pillugu Nivi Olsen ilaatigut oqarpoq:

- Aliikkusersuisartoq, erinarsortartoq nipilersortartorlu aamma isiginnaartitsisartoq pimoorussisoq sungiussilluarsimasoq. Kulturikkut malunnaatilik, inuunermut isumalioqqissaartoq, isummaminillu annissinissamut tunuarsimaanngitsoq. Nunatsinni eqqumiitsuliortut tamatigoortut amerlanngitsut ilagaat, tamanna nipilersornikkut isiginnaartitsisarnikkullu takutissimavaa. Isiginnaartitsisarfimmiissinnaaneq, pilersitsinissamut kiffaanngissuseqarneq, unammillersinnaaneq, pisinnaanerlu imaannaanngitsuunngilaq. Kiffaanngissuserlu taannarpiaq nersornaaserneqartussap eqqumiitsuliornikkut sammivigisimavaa.

Malu Lange pillugu Nivi Olsen ilaatigut oqarpoq:

- Piviusorsiorpalaartumik assilialiornermi erinitsajuissuseqartariaqarpoq, teknikkitigut pikkorissuusariaqarlunilu assilialiornermi annertuumik paasinnittaaseqartariaqarpoq. Tamaasa allallu piginnaaffeqarfigalugit takutissimavat. Suliatit aqqutigalugit qaaqquatsigut silarsuarmik takunnissinnaaqqulluta, illit takunnittarnerit aqqutigalugu: eqqortumik, mianerinnittumik immikkullu ersarissusilimmik. Tunissutaavoq, taamaammallu una kajumissaatitut nersornaat ilinnut tulluarpoq. Eqqumiitsuliortutut ingerlaaqqinnerit malinnaaffigissallugu qilanaaraarput.

Naalakkersuisut Kulturikkut Nersornaat 1982-mi pilersippaat. Nersornaat 50.000 kr.-nik aningaasartaqartoq inummut ataatsimut arlalinnulluunniit, peqatigiiffinnut kattuffinnulluunniit eqqumiitsuliornikkut kulturilerinikkulluunniit immikkut suliniuteqarluarsimasunut tunniunneqartarpoq. Nersornaat ukiut tamaasa Inuiattut Ullorsiornitsinni juunip 21-ani tunniunneqartarpoq. Naalakkersuisut kajumissaatitut nersornaasiuttagaat 10.000 kr.-nik aningaasartaqartoq 2016-mi pilersinneqarpoq. Nersornaat inuusuttumut piginnaanilimmut Kulturikkut Nersornaasiisoqarnerani tunniunneqartarpoq.

Annertunerusumik paasisaqarusunnermi saaffigineqarsinnaavoq naalakkersuisup allattaa Kresten Lennert, Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfimmi, Toqq/direkte 34 5675, maili krlt@nanoq.gl