AtuartigukNaalakkersuisunngortoq Kalaallit Nunaanni erngup nukinganit nukissiorfinngorsinnaasut annersaanni neqerooruteqartitsisoq
Nassiussisuuvoq: Inuutissarsiornermut, Nukissiutinut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik
Naalakkersuisunngortoq Naaja H. Nathanielsen Tasersiarmi Tarsartuullu Tasersuani erngup nukinganit nukissiorfiunngorsinnaasuni suliarinnissin-naasunik neqerooruteqartitsivoq. Erngup nukinganit nukissiorfinngorsinnaasut ukiumut 9.500 GWh sinnillit nukissiarisinnaassavaat. Annertussutsip taassuma Kalaallit Nunaanni nukissiornermit pisariaqartitsineq tamakkiisoq sinnertussaassavaa.
Naaja H. Nathanielsen oqarpoq:
”Pinngortitap pissaqartilluarpaatigut avatangiisinik mianerinnerusumut saakkiartornitsinni pingaaruteqarlualersinnaasumik. Erngup nukinganit nukissiorfinngorsinnaasunik atorluaaneq avatangiisinik mianerinnilluni atorluaanerinnaanngilaq aammali inuussutissarsiornermik ineriartortitsinissaq qulakkeerniassavaa, najukkani suliffissanik pilersitsisoqassaaq kiisalu nunatsinni isertitatigut periarfissanik amerlanerusunik pilersitsissalluni. Qilanaaraara erngup nukinganit nukissiorfinngorsinnaasunut anertuunut suliarinnissinnaasunik neqoroortitsinissap nangillugu suliarinissaa.
Piffissami aggersumi niueqatigiinnissaq siunniullugu selskabinik soqutiginnittunik oqaloqateqarnerit nangissavakka. Pinngortitap pissarititaanik atorluaanissaq pillugu selskabimik suleqateqalernissaq angisuumik pisussaaffiliivoq. Taamatut aalajangiinissaq siunissamut ungasinnerusumut pingaaruteqalersussaavoq. Neqerooruteqartitsinerup siunertaraa Kalaallit Nunaannut suleqatissaqqissumik nassaarnissaq taamalu aaqqiissutissamik najukkamut nunarsuatsinnullu iluaqutaasumik nassaarnissaq. Taamaattumik qaammatini tulliuttuni niueqatigiinnissaq siunniullugu oqaloqatigiinnissamut selskabinik soqutiginnittunik qaaqqusivunga.”
Nalunaarusiat kiisalu paasissutissat sukumiinerusut niueqatigiinnissaq siunniullugu oqaloqatigiinnissanut tunngasut uani nassaassaapput: www.hydropower.gl