AtuartigukIsumaginninnermut, Suliffeqarnermut, Nunamut Namminermut, Avatangiisinullu Naalakkersuisoq Qaqortumi utoqqaat illuanut Ajarsivasimmut pulaarpoq.
Nassiussisuuvoq: Isumaginninnermut, Suliffeqarnermut Nunamullu Namminermut Naalakkersuisoqarfik
Isumaginninnermut, Suliffeqarnermut Nunamut Namminermut Avatangiisinullu Naalakkersuisoq Bentiaraq Ottosen Qaqortumi tikeraarnermini utoqqaat illuat Ajarsivasik pulaarpaa.
Pulaarnerminut siunertaraa Naalakkersuisut utoqqaat pillugit inatsimmik suliaqaqqinnissamminnut atatillugu utoqqaat oqariartuutaanik tusarnaarnissaq aamma oqaloqatiginninnissaq.
”Naalakkersuisut utoqqaat pillugit, pitsaanerusumik atugassaqarnissaat siunertaralugu, inatsimmik nutaamik suliaqaleruttorput. Tassunga atatillugu Naalakkersuisut pingaartippaat inatsisip suliarineqarnerani susassaqartut ilaatinneqarnissaat tusarniaaffigisarnissaallu. Taamaammat nuannaarutigaara Qaqortumi utoqqaat illuat Ajarsivasik pulaarnissaanut periarfissaqarama, taamaalillunga utoqqaat qanoq oqaasissaqarnersut tusarnaarsinnaallugit.
Attaveqarfissaq
Annertunerusumik paasisaqarniaruit attaveqarfigiuk naalakkersuisup allattaa Anders Samuelsen e-mailikkut: ansa@nanoq.gl imaluunniit oqarasuaatikkut + 299 34 56 11