AtuartigukAnna Wangenheim aamma Sophie Løhde Københavnimi naapipput
Nassiussisuuvoq: Peqqissutsimut inunnullu Innarluutilinnut Naalakkersuisoqarfik
Peqqissutsimut Inunnullu Innarluutilinnut Naalakkersuisoq, Anna Wangenheim, danskit nunamut pissutsinut- aamma peqqissutsikkut naalakkersuisuat, Sophie Løhde, Københavnimi marlunngormat naapippaa. Tassani nunatsinni peqqinnissaqarfiup pitsanngorsarnissaa ineriartortinneqarnissaalu qiteritinneqarpoq.
Peqqissutsimut tunngasunik danskit kalaallillu akornanni naligiimmik naleqartitsisumillu sullissisoqarnissaa naapinnermi Anna Wangenheimimit erseqqissarneqarpoq. Ilutigisaanik peqqinnissaqarfimmi aaqqissuussaanermik suliaqarneq eqqartorneqarpoq.
Anna Wangenheim ima oqaaseqarpoq:
”Kalaallit Nunaanni Danmarkimilu kalaallit najugallit peqqinnissaqarfimmi assigiimmik pingaarnertullu pitsaanerusumik sullinneqarnissaat qulakkeerneqassappat qanimut oqaloqatigiissinnaanissaq suleqatigiinnissarlu pisariaqarpoq. Peqqinnissaqarfik innuttaasunut iluaqutaassappat, toqqissisimanassappat qularnaatsuussappallu sulisussaqarnerulernissamut ineriartortitsiuartoqarnissaa isumalluutinillu pingaarnersiuisoqarnissaa qanoq pisariaqartigisoq danskit peqqissutsimut naalakkersuisuat aallarniutitut pitsaasumik eqqartueqatigisinnaagakku oqaasinngortissinnaagakkulu nuannerpoq.
Sophie Løhde ima oqaaseqarpoq:
”Anna Wangenheim pitsaasumik suleqatigisinnaagakku qujaffigaara. Kalaallit Nunaanni peqqinnissaqarfimmi tamaviaartumik sulisoqarpoq, aallaqqaammullu arlalitsigut ukiuni takkuttussani allannguuteqassaaq. Tamanna danskit naalagaaffianit tapersersorneqarusuppoq. Kalaallit Nunaanni peqqinnissaqarfik napparsimasunut naleqqussagaaqqullugu iluaqutaaqqullugulu peqqinnissaqarfiup aaqqissuuteqqinneqarnissaata naammassineqarnissaa soorlu ikiueqataaffigerusukkipput. Suleqatigiilluarnitta ingerlaannarnissaa qilanaaraarput.”
Nunami namminermi peqqissutsimullu naalakkersuisoqarfimmi ataatsimiittoqareermat Kalaallit Peqqissartut Illuat Københavnimiittoq Sophie Løhdemit Anna Wangenheimimillu alakkarneqarpoq, tassani kalaallit nakorsiartut katsorsartinnerini misissorneqarnerinilu qanigisatik peqatigalugit inissinneqartarput.
Ukiut tamaasa innuttaasut 1.500-nit amerlanerusut akiliunneqarlutik Danmarkimut katsorsartikkiartornissaannut peqqinnissaqarfimmiit innersuunneqartarput. Taassumalu saniatigut tarnikkut napparsimasunut suliassaqarfik, Region Midtjylland, suleqatigineqarpoq.
Annertunerusumik paasisaqarniaraanni naalakkersuisup allattaa, Nivé Lynge Biilmann, oqarasuaammut attavigineqarsinnaavoq: +299 23 23 50 imaluunniit e-mail: Nilb@nanoq.gl