Napparsimasut katsorsarneqartillutik toqusut angerlamut ataqqinnittumik angallanneqarnissaat Naalakkersuisut qulakkeerpaat

Naalakkersuisut ulloq 15. maj 2025 ataatsimiinnerminni nalunaarut nutaaq akueraat, taanna napparsimasut Kalaallit Nunaanni peqqinnissaqarfimmit misissorneqarlutik katsorsarneqartut toqusimasut angerlarlutik angallanneqarnissaannut malittarisassartaqarpoq – Kalaallit Nunaanni imaluunniit Kalaallit Nunaata avataani pisimanersoq apeqqutaanani.

Aaqqiissummi nutaami napparsimasut suli katsorsarneqarnerminni najugartik qimaqqatillugu ajoraluaqisumik toqusut ilaatinneqarput. Pisuni taamaattuni nunatsinni peqqinnissaqarfik siunissami toqusup qaniginerpaasaasunut angerlamut angallanneqarnissaanut akisussaaffimmik tigusisalissaaq, qimagaasut aningaasaqarnikkut artukkerneqartinnagit.

“Inuttut ataqqinnilluinnartumik aalajangerneruvoq. Innuttaasoq peqqinnissaqarfipput tatigalugu katsorsarneqariartorluni aallaraangami – ilaatigut angerlarsimaffimmit ungasissumut – aamma aqqutaanut akisussaasariaqarpugut. Pisussaq ajornerpaaq aamma pigaluarpat. Inunnut ataasiakkaanut qimagaasunullu ataqqinninnermut tunngavoq" Peqqissutsimut Inunnullu Innarluutilinnut Naalakkersuisoq oqarpoq.

Aaqqiissut 2025-mut aningaasanut inatsimmi 1,8 mio. kr.-nik aningaasaliiffigineqareerpoq, aaqqiissullu kinguartitsinertaqanngitsumik atuutilerpoq.

Aaqqiisut siornatigut malittarisassaqarsimanngilaq, qanigisaasullu pisuni aalajangersimasuni nammineerlutik angerlamut angallassinermut aningaasartuutinik akiliisariaqartarsimapput – pisoq maanna Naalakkersuisut unitsilluinnarpaat.

“Ilaqutariit aliasuuteqartut ilimaginngisamik aamma akiligassamik eqqunngitsumik akiliisarnissaat naleqqutinngilaq. Ataqqinninnermut, toqqissisimanermut akisussaaffimmullu tunngavoq – pisortallu akisussaaffimmik tigusinerat pissusissamisoorpoq" Naalakkersuisoq naggasiivoq.

Nalunaarut saqqummiunneqarpoq, nalunaarutit.gl-milu atuarneqarsinnaavoq.

Sukumiinerusumik paasisaqarusukkuit naalakkersuisup allattaa, Nivé Lynge Biilmann, attavigiuk e-mail: nilb@nanoq.gl